டேம் 999 படத்தை தமிழ்நாட்டில் திரையிட தமிழக அரசு தடை - ஜெயலலிதா உத்தரவு

by **சிவா** Fri Nov 25, 2011 5:49 am

`டேம் 999' படத்தை தமிழ்நாட்டில் திரையிட தமிழக அரசு தடை விதித்துள்ளது. இதற்கான உத்தரவை முதல்-அமைச்சர் ஜெயலலிதா பிறப்பித்துள்ளார்.

தமிழக அரசின் சார்பில் தலைமை செயலாளர் தேபேந்திரநாத் சாரங்கி வெளியிட்டுள்ள செய்தி குறிப்பில் கூறியிருப்பதாவது:-

`டேம் 999' திரைப்படம்

கடற்கரை மாலுமியாக பணியாற்றி திரைப்பட இயக்குனராக மாறிய கேரளாவை சேர்ந்த சோஹன் ராய் என்பவர் இயக்கிய `டேம் 999' என்ற ஆங்கில படம் தமிழில் டப்பிங் செய்யப்பட்டு இன்று (வெள்ளிக்கிழமை) தமிழகத்தில் திரையிடப்பட உள்ளது.

ஊழல் மேயர் ஒருவர் வலுவற்ற அணையை கட்டுவதாகவும், அந்த அணையின் உடைப்பால் வெள்ளம் பெருக்கெடுத்து ஓடுவது போலவும் அதன்காரணமாக குழந்தைகள், முதியவர்கள் உள்பட லட்சக்கணக்கான மக்கள் பலியாவது போலவும் காட்சிகள் அமைக்கப்பட்டுள்ளன.

மேலும் டேம் 999 என்னும் தலைப்பு முல்லைபெரியாறு அணையை கருத்தில் கொண்டு வைக்கப்பட்டது போல் உள்ளது. மேலும் இந்தப்படத்தின் இயக்குனர் அளித்த பேட்டிகளிலும், வெளியிட்ட அறிக்கைகளிலும் 1975-ம் ஆண்டு சீனாவில் ஏற்பட்ட அணை உடைப்பு பேரிடர் அபாயம், முல்லைப்பெரியாறு அணையிலும் உள்ளது என்றும், புதிய அணையை கட்டுவதற்கு தமிழக அரசே ஒத்துழைக்கும் என்றும் கூறியுள்ளார். முல்லைப்பெரியாறு அணையை நேரடியாக காண்பிக்காவிட்டாலும் கேரளமாநிலம் ஆலப்புழையில் படமாக்கப்பட்ட காட்சிகள், முல்லைப்பெரியாறு அணையை நினைவு கூர்வதாக உள்ளது.

திரையிட தடை

படத்தின் தலைப்பு முல்லைப்பெரியாறு அணை பிரச்சினை பற்றி மறைமுகமாக எடுத்துக்கூறி மக்களிடையே பீதியை ஏற்படுத்தி, தமிழக கேரள மக்களிடையே வேற்றுமையை உருவாக்கவும், தமிழகத்தில் சட்டம் ஒழுங்குப்பிரச்சினையை ஏற்படுத்தும் விதமாகவும், இந்தப்படம் அமைந்துள்ளதால், 25-11-2011 முதல் திரையிட உள்ள `டேம் 999' என்ற படத்திற்கு தடை விதிக்க முதல்-அமைச்சர் ஜெயலலிதா உத்தரவிட்டுள்ளார்.

இவ்வாறு அந்த செய்தி குறிப்பில் அரசின் தலைமைச்செயலாளர் தேபேந்திரநாத் சாரங்கி தெரிவித்துள்ளார்.

தினதந்தி