முன்னாள் அமைச்சர் வீடுகளில் சோதனை

தி.மு.க. முன்னாள் அமைச்சர் துரைமுருகன் மீது லஞ்ச ஒழிப்பு போலீசார் சொத்துக்குவிப்பு வழக்கு பதிவு செய்துள்ளனர். இதையொட்டி, அவரது வீடுகள் மற்றும் அலுவலகங்களில் லஞ்ச ஒழிப்பு போலீசார் நேற்று சோதனை நடத்தினார்கள்.

சொத்து குவிப்பு வழக்குகள்

தி.மு.க. முன்னாள் அமைச்சர்கள் மீது வருமானத்துக்கு அதிகமாக சொத்து சேர்த்ததாக வழக்குப்பதிவு செய்து, லஞ்ச ஒழிப்பு போலீசார் தொடர்ந்து நடவடிக்கை எடுத்து வருகிறார்கள். தற்போது முன்னாள் அமைச்சர் துரைமுருகன் மீதும் வருமானத்துக்கு அதிகமாக சொத்து சேர்த்ததாக வேலூர் லஞ்ச ஒழிப்பு போலீசார் வழக்குப்பதிவு செய்துள்ளனர். இதுதொடர்பாக நேற்று துரைமுருகனின் வீடுகள் மற்றும் அலுவலகங்களில் லஞ்ச ஒழிப்பு போலீசார் திடீர் சோதனை நடத்தினார்கள். காலை 6.30 மணியில் இருந்து இரவு வரை இந்த சோதனை வேட்டை நீடித்தது.

துணை போலீஸ் சூப்பிரண்டுகள் பொன்னுசாமி, முரளி, அலிபாஷா, விஜயராகவன், ராமச்சந்திரன் நாச்சியப்பன், சோமசுந்தரம், கன்னியப்பன், இன்ஸ்பெக்டர்கள் உச்சப்பட்டி பரமசாமி, அசோகன், செல்லமுத்து ஆகியோர் அடங்கிய 50-க்கும் மேற்பட்ட லஞ்ச ஒழிப்பு தனிப்படை போலீசார் இந்த சோதனை வேட்டையில் ஈடுபட்டனர். சோதனையில் முக்கிய ஆவணங்கள் கைப்பற்றப்பட்டதாக லஞ்ச ஒழிப்பு போலீஸ் தரப்பில் தெரிவிக்கப்பட்டது.

சோதனை நடந்த 9 இடங்கள்

சோதனை நடந்த இடங்கள் விவரம் வருமாறு:-

1. வேலூர் காந்தி நகரில் உள்ள துரைமுருகனின் வீடு. அதே பகுதியில் துரைமுருகனின் மனைவி சாந்தகுமாரி பெயரில் உள்ள இன்னொரு வீடு.

2. காட்பாடி காந்தி நகர் 2-வது கிழக்கு மெயின் ரோட்டில் உள்ள துரைமுருகனின் தம்பி துரைசிங்காரத்தின் வீடு.

3. துரைமுருகனின் குடும்பத்தினருக்கு சொந்தமான அருவி மினரல் வாட்டர் கம்பெனி (டைட்டல் வாட்டர் சப்ளை நிறுவனம்). இந்த கம்பெனி வேலூர் மாவட்டம் காட்பாடி தாலுகா கசம் கிராமத்தில் உள்ளது.

4. காட்பாடி காந்தி நகர் 2-வது கிழக்கு மெயின் ரோட்டில் உள்ள மினரல் வாட்டர் கம்பெனியின் குடோன் (துரைமுருகனின் தம்பி துரைசிங்காரத்தின் வீட்டுக்கு எதிரே உள்ளது). அதே பகுதியில் துரைமுருகனின் மகன் கதிர் ஆனந்த் ஏஜென்சி எடுத்துள்ள ஐ.டி.சி. சிகரெட் சப்ளை நிறுவனத்தின் குடோன்.

5. காட்பாடி மேட்டுகுளம் புத்தூர் மெயின் ரோட்டில் உள்ள கிங்ஸ்டன் என்ஜினீயரிங் கல்லூரி (இந்த கல்லூரி துரைமுருகன் பெயரில் உள்ள கல்வி அறக்கட்டளைக்கு சொந்தமானதாகும்). அதே வளாகத்தில் உள்ள ஆசிரியர் பயிற்சி கல்லூரியிலும் (பி.எட்.) சோதனை நடைபெற்றது.

பண்ணை வீடு

6. ஏலகிரி மலையில் உள்ள துரைமுருகனின் மகன் கதிர் ஆனந்துக்கு சொந்தமான பண்ணை வீடு. அதே ஏலகிரி மலை பகுதியில் அத்தனாவூர் மஞ்சு கொல்லைப்புதூரில் உள்ள துரைமுருகனின் மகனுக்கு சொந்தமான கதிர் நூற்பாலை விருந்தினர் இல்லம். இந்த மில் விரைவில் தொடங்க இருக்கிறது.

7. காஞ்சீபுரம் மாவட்டம், வண்டலூர்-கேளம்பாக்கம் ரோட்டில் மேல்கோட்டையூரில் உள்ள ராஜம்மா ஏற்றுமதி நிறுவனம். இங்கு துவரம்பருப்பு மற்றும் வாசனை பொருட்கள் பேக்கிங் செய்யப்பட்டு, வெளிநாடுகளுக்கு ஏற்றுமதி செய்யப்படுகிறது.

8. சென்னை கோட்டூர்புரம் காந்தி மண்டபம் ரோட்டில் உள்ள துரைமுருகனின் சொந்த வீடு.

9. சென்னை அடையாறு காந்தி நகரில் உள்ள தேவ் ரீஜன்சி அடுக்குமாடி குடியிருப்பில் இருக்கும் 3 வணிக பிளாட்கள். இங்கு ராஜம்மா ஏற்றுமதி நிறுவனத்தின் அலுவலகம் செயல்படுவதாக தெரிய வந்துள்ளது. துரைமுருகனின் மகன் கதிர் ஆனந்தின் அலுவலகமும் இங்கு உள்ளது.

31.3.2006 முதல் 31.3.2009 முடிய உள்ள காலகட்டத்தில் வருமானத்துக்கு அதிகமாக சொத்துக்கள்சேர்த்துள்ளதாக லஞ்ச ஒழிப்பு போலீசார் பதிவு செய்துள்ள வழக்கில் குற்றம் சாட்டப்பட்டுள்ளது.

மேற்கண்ட தகவல்கள் லஞ்ச ஒழிப்பு போலீசார் வெளியிட்டுள்ள செய்திக்குறிப்பில் தெரிவிக்கப்பட்டுள்ளது.

தகவல் கசிந்தது

துரைமுருகன் வீட்டில் லஞ்ச ஒழிப்பு போலீசார் சோதனை நடத்தப்போகும் விஷயம் பற்றி நேற்று முந்தினம் இரவே தகவல்கள் கசிந்துவிட்டதாக தெரிய வந்துள்ளது. நேற்று லஞ்ச ஒழிப்பு போலீசார் சோதனை நடத்திய அனைத்து இடங்களிலும் துரைமுருகனின் வக்கீல்கள் தயார் நிலையில் காத்திருந்தனர்.

ஏலகிரி மலையில் உள்ள துரைமுருகன் மகனின் பண்ணை வீட்டுக்கு லஞ்ச ஒழிப்பு போலீசார் சென்றபோது, `நீங்கள் நேற்றே வருவீர்கள் என்று எதிர்பார்த்தோம். ஒருநாள் காலதாமதமாக வந்திருக்கிறீர்கள்' என்று லஞ்ச ஒழிப்பு போலீசாரை துரைமுருகனின் வக்கீல்கள் வரவேற்றனர்.

சென்னையில் துரைமுருகன் வீட்டில் சோதனை நடந்தபோதும் அங்கு வக்கீல்கள் இருந்தனர். வீட்டு முன்பு ஏராளமான தி.மு.க. பிரமுகர்களும் கூடி இருந்தார்கள். சோதனை நடந்து கொண்டிருக்கும்போது சென்னை நகரின் முன்னாள் மேயர் மா.சுப்பிரமணியன், துரைமுருகன் வீட்டுக்கு வந்தார். அவர் நிருபர்களிடம் கூறும்போது, `அரசியல் ரீதியாக பழிவாங்கும் நோக்கத்தோடு இந்த சோதனை நடைபெறுவதாக தெரிவித்தார்.' சென்னை வீட்டில் சோதனை நடந்த போது அங்கு முன்னாள் அமைச்சர் துரைமுருகனும் இருந்தார்.

தினதந்தி