ஆசை

கானாத்தூர் என்ற அழகிய கிராமத்தில் ஆற்றங்கரையோரம் உள்ள ஒரு மரத்தடியில் அமர்ந்து துறவி தியானம் செய்து கொண்டிருந்தார். அவரைப் பார்க்க ஏழை விவசாயி ஒருவர் வந்தார்.

"சுவாமி வணங்குகிறேன்.''

"வந்த விஷயத்தைச் சொல், பக்தனே'' துறவி வாய் திறந்தார்.

"சுவாமி, நான் சிறுகச் சிறுக சம்பாதித்து, நூறு பவுன் வரை நகை சேர்த்து வைத்திருக்கிறேன். நான் இருப்பதோ, ஓலைக்குடிசை. காலமோ கெட்டுக்கிடக்குது. திருடர்கள் வந்து நகைகளை திருடி விடுவார்களோ என்று தினமும் என் மனம் பதறுகிறது. இரவில் நாய் குரைத்தாலும், ஏதாவது விபரீத சத்தம் கேட்டாலும் திருடன் தான் வருகிறானோ என்று பயமாக இருக்கிறது. அதனால், என் தூக்கம் கெடுகிறது. என் உடமைகளை காப்பாற்ற நீங்க தான் சுவாமி வழிகாட்டணும்.''

"ஆசை கூடாதப்பா.. ஆசையே துன்பத்திற்கு காரணமப்பா'' என்றார், துறவி.

"கவலைப்படாதே, உனக்கு ஒரு வழி சொல்கிறேன். உன் வீட்டின் பின்னால், ஒரு சிறிய வாழைத்தோட்டம் இருக்கிறதே, அது உன்னுடையது தானே?'' என்று கேட்டார்.

"ஆமாம், சுவாமி.''

"தோட்டத்தின் தெற்கு மூலையில் பழமையான ஒரு வேப்பமரம் ஒன்று நிற்கிறதா?''

"நிற்கிறது சுவாமி. அது உங்களுக்கு எப்படி தெரியும் சுவாமி?''

"இந்த துறவிக்கு தெரியாததா?'' என்று தாடியைத் தடவிக்கொண்டே புன்னகைத்தார், துறவி.

"நீ சிறுகச் சிறுகச் சேர்த்து வைத்த நகைகளை ஒரே தங்கக் கட்டியாகச் செய்து கொள். அதை இன்று இரவு அந்த வேப்பமரத்தின் பக்கத்தில் இரண்டு அடி ஆழத்தில் பள்ளம் தோண்டி புதைத்து விடு. நாளை காலை எழுந்ததும், புதைத்த இடத்தை தோண்டிப் பார். இப்படியே தினமும் செய். உன் வீட்டிற்கு திருட வந்தவன், நகையை காணாமல் ஏமாந்து போகட்டும்'' என்றார், துறவி.

"சுவாமி, நல்ல யோசனை சொன்னீங்க. அதன்படியே செய்கிறேன்'' என்று கூறி விடைபெற்றார், விவசாயி.

சில நாட்களுக்குப் பின்னர்...

விவசாயி, பதறியபடி துறவியிடம் ஓடி வந்தார்.

"சுவாமி, தங்கக்கட்டி திருட்டுப் போய்விட்டது சுவாமி... நான் என்ன செய்வேன். அந்த திருடனை எப்படியாவது கண்டுபிடிக்கணும் சுவாமி. நீங்க தான் ஏதாவது ஒரு வழி சொல்லணும் சுவாமி'' என்று வேண்டினான்.

"சொல்றேன்பா, பொறுமையா கேள். களவு போன வேப்பமரத்தில் இருந்து நாலடி தூரத்துல ஒரு பூவரசு மரம் இருக்கிறதா?''

"இருக்கிறது, சுவாமி.!''

"இன்று இரவு, அந்த பூவரசு மரத்தின் அருகே இரண்டு அடி ஆழத்தில் தோண்டி, ஒரு செங்கலை புதைத்து விடு. வழக்கம் போல், காலை எழுந்ததும், தினமும் அதைத் தோண்டிப் பார். தங்கக் கட்டியை எடுத்த திருடன், சில நாட்களில் இதையும் எடுக்க வருவான். அப்படி தோண்டி எடுக்க யாரு வாராங்கன்னு தினமும் இரவு நீ மறைந்து இருந்து கவனி. மீண்டும் தங்க கட்டி இருக்கும்னு நினைச்சு அவன் தோண்ட வருவான். அவன் வரும்போது `லபக்' கென்று பிடித்து விடு என்றார், துறவி.

சரியான நேரத்துல நல்ல யோசனை சொன்னீங்க சுவாமி!'' என்று சந்தோஷத்துடன் சென்றார், விவசாயி.

துறவி சொன்னபடியே செய்தார் விவசாயி.

சில நாட்களில், திருடனை கையும் களவுமாகப் பிடித்து காவலரிடம் ஒப்படைத்தார். இழந்த நகைகளை திரும்பவும் பெற்றார்.

-ஆர்.கே.லிங்கேசன்

நல்ல நீதிக்கதை