அன்பும் வாழ்வும் (கவிதை)

**kirikasan** · **kirikasan** Sun Nov 20, 2011 11:48 am

வெள்ளை மலர்கள் வீசுந்தென்றல் விடியுங் காலைகளும்
உள்ளம் எங்கும் உண்மையன்பும் உலகின்கண் செய்தாள்
தெள்ளத் தெளியும் நீரோடைநற் தேனாம் கனி வளமும்
அள்ளித் தூவும் மலர்கள் காட்டின் அமைதி அவள் செய்தாள்

துள்ளித் திரியும் மானின்ஓசை, தூங்கும் இலைதொட்டே
தள்ளும் தென்றல் காற்றின் சத்தம் தந்தே எழில் செய்தாள்
வெள்ளிக் கொலுசாய், விரையும் நதியில் விளையும் சிறுஓசை
கொள்ளை யின்பம் யார்தான் செய்தார் கோலத் திருமகளே

பள்ளித் திண்ணை குருவும் பாடம் பயிலப் பலநூல்கள்
கொள்ளத் திறனும் அறிவும் கொண்ட குணமும் குறுமுகமும்
துள்ளித் திரியும் இளமை இன்பம் தேடும் இருவிழிகள்
வெள்ளிச் சுடரும் விண்ணும் வெளியில் வியக்கும் வகைசெய்தாள்

சுற்றுமுலகும் சூழும் அண்டம் சூரிய மண்டலமும்
கற்றும் அறியாக் கற்பனைக் கெட்டாக் காலச் சக்கரமும்
மற்றும் மனமும் மனதில்விரியும், மாபெரும்கற்பனையும்
சற்றும் அறியோம் சக்தி கொண்டோர் சக்திதான் செய்தாள்

குற்றம், கொல்லுங் குணமும், குருவி, கொள்ளப் பருந்தினையும்
வற்றும் குளமாய் வாழ்வும் வற்ற, வாடும் மீன்களென
முற்றும்பாசம் அற்றோர் தானும் மௌனப் பெருமூச்சும்
அற்றோர் ஏங்கும் அவலம் பலவும் அகிலங் கொளவைத்தாள்

விற்றும் வாங்கும் பொருளேயல்ல விளையும் பெருஅன்பு
கற்றுப்பெறுதல், கடனோ அல்லக் கருணை எனும் வெள்ளம்
தொற்றும் நோயாய் பரவி எங்கும் தோற்றம் கொள்வதில்லை
பற்றும் பாசம் படைப்பில் அவளே பார்த்துத் தரவேண்டும்

அன்பே இல்லா உள்ளம் தன்னை அவளே செய்தாளேன்
தென்றல் சீறிப் புயலாய் மாறச் சித்தம் கொண்டாளேன்
நன்பெய் மழையும் நல்லோர் பயிரும் நாட்டில் வளர்வித்தாள்
வன்மை, கொல்லும் மிருகம் செய்து வாழ்வு மழித்தாளேன்?

பேகன் · பேகன் Sun Nov 20, 2011 1:44 pm

**இளமாறன்** · **இளமாறன்** Sun Nov 20, 2011 2:02 pm

விற்றும் வாங்கும் பொருளேயல்ல விளையும் பெருஅன்பு
கற்றுப்பெறுதல், கடனோ அல்லக் கருணை எனும் வெள்ளம்
தொற்றும் நோயாய் பரவி எங்கும் தோற்றம் கொள்வதில்லை
பற்றும் பாசம் படைப்பில் அவளே பார்த்துத் தரவேண்டும்

Sponsored content · Sponsored content

அன்பும் வாழ்வும் (கவிதை)

அன்பும் வாழ்வும் (கவிதை)

Re: அன்பும் வாழ்வும் (கவிதை)

Re: அன்பும் வாழ்வும் (கவிதை)

Re: அன்பும் வாழ்வும் (கவிதை)

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக