மாநகர பஸ்களில் இனி நான்கு சேவைகள் மட்டுமே : உடனடியாக அமலுக்கு வந்தது கட்டண உயர்வு

கடந்த தி.மு.க., ஆட்சியில், மாநகர பஸ்களில் அறிமுகப்படுத்தப்பட்ட எல்.எஸ்.எஸ்., எம்.சர்வீஸ் உள்ளிட்ட சேவைகள் அனைத்தும், ரத்து செய்யப்பட்டுள்ளன. தற்போது மாநகர பஸ் சேவை, நான்கு வகையாக பிரிக்கப்பட்டு, கட்டணம் நிர்ணயிக்கப்பட்டுள்ளது.

தமிழகத்தில், கடந்த 2001ம் ஆண்டு, டிசம்பர் மாதம் கடைசியாக பஸ் கட்டணம் உயர்த்தப்பட்டது. அதன்பின், நேற்று முன்தினம் கட்டண உயர்வு அறிவிக்கப்பட்டது. ஆனால், கடந்த தி.மு.க., ஆட்சியில், மாநகர பஸ் சேவைகளில் வேறுபாடு ஏற்படுத்தி, அதன் மூலம் கட்டணம் உயர்த்தி வசூலிக்கப்பட்டது.

கடந்த ஆட்சியில், பழுதடைந்த பஸ்களுக்கு மாற்றாக, மாநிலம் முழுவதும் 8,000க்கும் மேற்பட்ட புதிய பஸ்கள் வாங்கப்பட்டன. இவற்றில் பெரும்பாலானவை சென்னை, கோவை, மதுரை உள்ளிட்ட மாநகரங்களில், சேவைக்காக இயக்கப்பட்டன.

மறைமுக கட்டண உயர்வு: அதுவரை மாநகர பஸ்கள் அனைத்திலும், ஒரே மாதிரியான கட்டணம் வசூலித்த போக்குவரத்துக் கழகம், புதிய பஸ்களை இயக்கும்போது, புது வகையான சேவைகளை அறிமுகப்படுத்தியது. இதன்படி, சாதாரண வகை; எல்.எஸ்.எஸ்.,; விரைவு சேவை; எம்.சர்வீஸ்; சொகுசு பஸ்; வால்வோ குளிர்சாதன சேவை; தொடர் பஸ்கள் என பல வகையான சேவைகளில் பஸ்கள் இயங்கின.

இவை ஒவ்வொன்றிற்கும், ஒவ்வொரு வகையான கட்டணங்கள் நிர்ணயிக்கப்பட்டன. சாதாரண பஸ்களின் எண்ணிக்கை வெகுவாக குறைக்கப்பட்டது. இதன் மூலம், மறைமுகமாக கட்டணம் உயர்த்தி வசூலிக்கப்பட்டது. சாலையில் வருகின்ற பஸ்களில், எந்த பஸ்சில் என்ன கட்டணம் வசூலிக்கப்படும் என்று தெரியாமல், பயணிகள் குழம்பும் நிலை ஏற்பட்டது.

இந்த மறைமுக கட்டண உயர்வு குறித்து, அப்போது எதிர்கட்சியாக இருந்த அ.தி.மு.க., குற்றஞ்சாட்டியதோடு, கண்டன ஆர்ப்பாட்டமும் நடத்தியது. அ.தி.மு.க., ஆட்சி அமைந்தபின், இந்த கட்டண உயர்வில் மாறுதலின்றி தொடர்ந்து வந்தது.

]நான்கு சேவைகள்: நேற்று முன்தினம் பஸ் கட்டணத்தை உயர்த்திய தமிழக அரசு, மாநகர பஸ் சேவையை நான்காக பிரித்து, கட்டண நிர்ணயம் செய்துள்ளது. இதன் மூலம், ஏற்கனவே வெவ்வேறு சேவைகள் மூலம் கட்டணத்தை உயர்த்தி வசூல் செய்து வந்த நடைமுறை முடிவுக்கு வந்துள்ளது. மாநகர பஸ்கள் இனிமேல் சாதாரண; விரைவு; சொகுசு; வால்வோ வகை என நான்கு சேவைகளில் இயங்கும்.

கட்டண விவரம்: இதில், சாதாரண பஸ்களில் குறைந்தபட்ச கட்டணம், மூன்று ரூபாயாகவும், அதிக பட்ச கட்டணம், 14 ரூபாயாகவும் இருக்கும். விரைவு (எக்ஸ்பிரஸ்) பஸ்களில் குறைந்தபட்ச கட்டணம் ஐந்து ரூபாயாகவும், அதிக பட்ச கட்டணம் 21 ரூபாயாகவும் இருக்கும்.

சொகுசு (டீலக்ஸ்) பஸ்களில் குறைந்தபட்ச கட்டணம், ஏழு ரூபாயாகவும், அதிகபட்ச கட்டணம், 29 ரூபாயாகவும் நிர்ணயிக்கப்பட்டுள்ளது. மாநகரங்களில் இயங்கும் வால்வோ ஏ.சி., பஸ்களில் குறைந்தபட்ச கட்டணமாக 15 ரூபாயும், அதிகபட்சமாக 75 ரூபாயும் கட்டணமாக வசூலிக்கப்படும்.

இதுதவிர, எந்த மாநகர பஸ்களிலும், "விருப்பம் போல் பயணம் செய்யத்தக்க' ஒரு நாள் பயணச்சீட்டுக்கு 50 ரூபாயும், வாராந்திர பயணச்சீட்டுக்கு 300 ரூபாயும், மாதாந்திர பயணச்சீட்டுக்கு 1,000 ரூபாயும் கட்டணம் நிர்ணயிக்கப்பட்டுள்ளது. இக்கட்டண உயர்வு நேற்று முதல் அமலுக்கு வந்தது

- நமது சிறப்பு நிருபர் - தினமலர்

இலவசங்களை பார்த்து ஓட்டு போதும் மக்களுக்கு இதுவும் வேண்டும்,இதற்கு மேலும் வேண்டும்.இலவசம் வேண்டும் என்றால் அவர்கள் எங்கிருந்து கொடுப்பார்கள் என்று சிந்திக்க வேண்டும்.இப்படி ஏதாச்சும் செய்து தான்
இலவசங்கள் கொடுக்க வேண்டும்