பெரிய திரைக்குத் தாவும் சிவகார்த்திகேயன் !

by ரேவதி Thu 17 Nov 2011 - 14:09

'பசங்க' படத்தினை இயக்கிய பாண்டிராஜ் இயக்கி இருக்கும் படம் 'மெரீனா'. இப்படத்தில் நாயகனாக நடித்து வருகிறார் சிவகார்த்திகேயன்.

விஜய் டி.வியின் முன்னணி தொகுப்பாளராக வலம் வருபவர் சிவகார்த்திகேயன். பல்வேறு நிகழ்ச்சிகளில் தனது நகைச்சுவை மிளிரும் நிகழ்ச்சித் தொகுப்பால் அனைவரையும் கலகலப்பாக்கி வந்தார்.

இந்நிலையில் இன்று தனுஷ் நடிக்கும் ' 3 ' படத்தின் ஆடியோ போஸ்டர்களில் தனுஷுடன் இணைந்து சிவகார்த்திகேயனும் நடனமாடுவது போல் அமைந்து இருந்தது.

இதனைடுத்து சிவகார்த்திகேயனை தொடர்பு கொண்டு கேட்ட போது, " தனுஷுடன் இணைந்து ' 3 ' படத்தில் நடித்து இருக்கிறேன். ' 3 ' படத்தில் தனுஷும் நானும் சின்ன குழந்தையில் இருந்து ஒன்றாகவே இருப்பது போல் காட்சிகள் இருக்கும்.

என்னுடைய பல்வேறு நிகழ்ச்சிகளைப் பார்த்து தனுஷ் எனக்கு இந்த படத்தில் நடிக்கும் வாய்ப்பை அளித்தார். விரைவில் 3ம் கட்ட படப்பிடிப்பு தொடங்க உள்ளது.

'துள்ளாத மனமும் துள்ளும்', 'தீபாவளி' போன்ற படங்களை இயக்கிய எழில் சார் இயக்கும் அடுத்த படத்தில் தனி நாயகனாக நடிக்க இருக்கிறேன். விரைவில் அதற்கான அதிகாரபூர்வ அறிவிப்பு வெளிவரும்" என்று கூறினார்.

'மெரினா', ' 3 ', எழில் இயக்கும் படம் என தனது திரையுலக வாழ்க்கை தொடங்கி இருப்பது சிவகார்த்திகேயனை சந்தோஷத்தில் ஆழ்த்தி இருக்கிறது.

விகடன்