கொல்கத்தா டெஸ்ட்: தோல்வியை தவிர்க்க வெஸ்ட் இண்டீஸ் போராட்டம்

கொல்கத்தா, நவ. 16-

இந்தியா-வெஸ்ட் இண்டீஸ் அணிகள் மோதும் 2-வது டெஸ்ட் கிரிக்கெட் போட்டி கொல்கத்தா ஈடன்கார்டன் மைதானத்தில் நடைபெற்று வருகிறது. இந்திய அணி முதல் இன்னிங்சில் 7 விக்கெட் இழப்புக்கு 631 ரன் குவித்து டிக்ளேர் செய்தது. டிராவிட் (119 ரன்), வி.வி.எஸ்.லட்சுமண் (176 ரன், அவுட் இல்லை), கேப்டன் டோனி (144 ரன்) ஆகியோர் சதம் அடித்தனர்.

வெஸ்ட்இண்டீஸ் தரப்பில் டாரன்சேமி, கேமர் ரோச் தலா 2 விக்கெட் கைப்பற்றினார்கள். பின்னர் விளையாடிய வெஸ்ட் இண்டீஸ் நேற்றைய 2-வது நாள் ஆட்ட நேரமுடிவில் 2 விக்கெட் இழப்புக்கு 34 ரன் எடுத்து இருந்தது. எட்வர்ட்ஸ் 12 ரன்னிலும், டாரன் பிராவோ 4 ரன்னிலும் ஆட்டம் இழக்காமல் இருந்தனர்.

இன்று (புதன்கிழமை) 3-வது நாள் ஆட்டம் நடந்தது. 597 ரன்கள் பின் தங்கிய நிலையில் கைவசம் 8 விக்கெட் என்ற நிலையில் வெஸ்ட்இண்டீஸ் தொடர்ந்து விளையாடியது. நேற்றைய ஆட்டம் வெளிச்சமின்மையால் முன்னதாக முடித்துக் கொள்ளப்பட்டதால் இன்றைய ஆட்டம் 30 நிமிடம் முன்னதாக தொடங்கியது. சுழற்பந்து வீரர்களான அஸ்வின், ஒஜாவின் பந்து வீச்சில் வெஸ்ட்இண்டீஸ் விக்கெட்டுகளை இழந்து திணறியது. எட்வர்ட்ஸ் 16 ரன்னில் ஒஜா பந்தில் எல்.பி.டபிள்யூ ஆனர்.

கடந்த டெஸ்டில் சதம் அடித்த சந்தர்பாலை தமிழக வீரர் அஸ்வின் எளிதில் `அவுட்' செய்தார். அவர் 4 ரன்னில் எல்.பி.டபிள்யூ ஆனார். அஸ்வின் கைப்பற்றிய 2-வது விக்கெட் ஆகும். நேற்று அவர் பிராத் வெயிட் விக்கெட்டை கைப்பற்றினார். வெஸ்ட் இண்டீஸ் 46 ரன் எடுப்பதற்குள் 4 விக்கெட்டை இழந்து பரிதாப நிலையில் இருந்தது.

5-வது விக்கெட்டான டாரன் பிராவோ- சாமுவேல்ஸ் ஜோடி மிகவும் நிதானத்துடன் விளையாடியது. கேப்டன் டோனி பந்து வீச்சில் மாற்றத்தை கொண்டு வந்தார். உமேஷ் யாதவின் அபாரமான பந்து வீச்சால் மேலும் விக்கெட்டுகள் சரிந்தன.

டாரன் பிராவோ (30 ரன்) சாமுவேல்ஸ் (25) ஆகியோரது விக்கெட்டை அவர் கைப்பற்றினார். இருவரும் உமேஷ் யாதவ் பந்தில் போல்டு ஆனார்கள். வெஸ்ட் இண்டீஸ் அணி 99 ரன்னில் 6 விக்கெட்டுகள் இழந்து இருந்தது. தொடர்ந்து இந்தியாவின் பந்து வீச்சை தாக்குப்பிடிக்க முடியாமல் வெஸ்ட் இண்டீஸ் அணி 153 ரன்னில் சுருண்டு பாலோ ஆன் ஆனது.

பாலோ ஆனதைத் தொடர்ந்து வெஸ்ட் இண்டீஸ் அணி 2-வது இன்னிங்சை தொடங்கியது. வெஸ்ட் இண்டீஸ் அணியின் ஸ்கோர் 23 ரன்னாக இருக்கும்போது பிராத் வெயிட் 9 ரன்னில் யாதவ் பந்தில் அவுட் ஆனார்.

அவரைத் தொடந்து பரத் 62 ரன்களுக்கும்,எட்வர்ட்ஸ் 60 ரன்களுக்கும் ஆட்டமிழந்தனர்.மூன்றாம் நாள் ஆட்ட நேர முடிவில் வெஸ்ட் இண்டீஸ் அணி 195 ரன்கள் எடுத்து 3 விக்கெட்களை இழந்துள்ளது. பிராவோ 38 ரன்களுடனும்,சந்தர்பால் 21 ரன்களுடனும் களத்தில் உள்ளனர்

மாலைமலர்