வவுனியா முகாமில் இருந்து விடுவிக்கப்பட்ட 35 ஆயிரம் தமிழர்கள் வேறு முகாம்களில் அடைப்பு

விடுதலைப்புலிகளுடன் நடந்த இறுதிக்கட்ட போரின் போது இடம் பெயர்ந்த தமிழர்கள் வவுனியாவில் ராணுவத்தினரின் முகாம்களில் தஞ்சம் புகுந்தனர். போர் முடிந்த நிலையில் தங்களை சொந்த ஊர்களில் மீண்டும் குடியமர்த்தும்படி வலியுறுத்தினர்.
உலக நாடுகளும் இதையே வலியுறுத்துகின்றன. இந்த நிலையில் வவுனியா முகாம்களில் அடைத்து வைக்கப்பட்டிருந்தவர்களில் 40 ஆயிரம் பேர், அவர்களின் சொந்த பகுதிகளில் குடியேற்றப்பட்டுள்ளதாக இலங்கை அமைச்சரவையின் செய்தி தொடர்பாளர் அனுரா பிரியதர்சன யாப்பா தெரிவித்துள்ளார்.
இந்த நிலையில் வவுனியா முகாம்களில் இருந்து விடுவிக்கப்பட்ட 35 ஆயிரம் தமிழர்களை மீண்டும் அவர்களது சொந்த பகுதியில் குடியமர்த்தவில்லை. யாழ்ப்பாணம், திரிகோணமலையில் உள்ள வேறு முகாம்களில் அடைத்து வைக்கப்பட்டுள்ளனர் என்ற தகவல் கிடைத்துள்ளது.
இந்த தகவலை தமிழ் தேசிய கூட்டமைப்பின் எம்.பி. சம்பந்தன் தெரிவித்துள்ளார். ஒரு முகாமில் இருந்து மற்றொரு முகாமுக்கு அகதிகளை இடமாற்றம் செய்வதால் அவர்களின் பிரச்சினைக்கு தீர்வு காண முடியாது என்றும் கூறியுள்ளார்.
இணைய தளம் ஒன்றுக்கு அளித்த பேட்டியில் இந்த தகவலை அவர் தெரிவித்துள்ளார். மீண்டும் குடியமர்த்த சொந்த மாவட்டங்களுக்கு அழைத்து வரப்பட்டவர்களின் பெரும்பாலான வர்கள் விடுதலை செய்யப்படவில்லை.

தொடர்ந்து வேறு முகாம்களில் அடைத்து வைக்கப்பட்டுள்ளனர். இந்த தகவலை அதிகாரிகள் உறுதிப்படுத்தி உள்ளனர். அவர்களை உரிய முறையில் பதிவு செய்ய வேண்டியிருப்பதால் அவர்கள் மீண்டும் அடைத்து வைக்கப்பட்டுள்ளதாக அறிவிக்கப்பட்டுள்ளது. இருந்தபோதிலும் அவர்களை பதிவு செய்வதற்கான நடவடிக்கைகள் எதுவும் எடுக்கப்படவில்லை என அரசு சார்பற்ற நிறுவனங்களை சேர்ந்த பணியாளர்கள் தெரிவித்தனர்