திருநள்ளாரில் சனீஸ்வர பகவானுக்கு சிறப்பு பூஜை : லட்சக்கணக்கானோர் குவிந்தனர்

திருநள்ளாறு தர்பார‌ண்யேஸ்வரர் கோயிலில் சனீஸ்வர பகவான் சன்னதி உள்ளது. இக்கோவிலில் இன்று 26ம் தேதி நடக்கும் சனிப்பெயர்ச்சி விழாவையொட்டி லட்சக்கணக்கான பக்தர்கள் குவிந்து வருகின்றனர்.காரைக்கால் மாவட்டம் திருநள்ளாறு சனீஸ்வர பகவான் கோவிலில் சனிப்பெயர்ச்சி விழா இன்று 26ம் தேதி நடக்கிறது. சிம்ம ராசியில் இருந்து கன்னி ராசிக்கு 3.27 மணிக்கு சனீஸ்வரர் இடம் பெயர்கிறார். இதையொட்டி இன்று விடியற்காலை 3 மணிக்கே சன்னதி திறக்கப்பட்டது. காலை 4.30 மணிக்கு உசத்கால பூஜை நடந்தது. 9 மணிக்கு கால சாந்தி பூஜை, 11.30 மணிக்கு உச்சி கால பூஜை நடந்தது. பிற்பகல் 3.27 மணிக்கு சனி பகவான் இடம் பெயர்வதையொட்டி சிறப்பு ஆராதனைகள், பூஜைகள் நடக்கிறது. மாலை 5.30 மணிக்கு சாயரட்சை பூஜை நடக்கிறது. இரவு 8 மணிக்கு தங்ககாசு வாகனத்தில் சுவாமி வீதியுலா நடக்கிறது.


சனிப்பெயர்ச்சி விழாவில் புதுச்சேரி கவர்னர் இக்பால் சிங் உட்பட பலர் கலந்து கொள்கின்றனர். சனிப்பெயர்ச்சியையொட்டி உலகில் பல்வேறு இடங்களில் இருந்து லட்சக்கணக்கான பக்தர்கள் திருநள்ளாற்றில் குவிந்து நளத்தீர்த்தத்தில் நீராடி, சுவாமி தரிசனம் செய்து வருகின்றனர்.கோவில் நிர்வாகத்தில் சார்பில் பக்தர்களுக்காக பல்வேறு ஏற்பாடுகள் செய்யப்பட்டுள்ளன. மாநில போலீஸ் துறை சார்பில் ஆயிரத்து 400 போலீசார் பாதுகாப்பு பணியில் ஈடுபடுத்தப்பட்டுள்ளனர்.


பக்தர்கள் மெட்டல் டிடக்டர் மூலம் சோதனை செய்யப்பட்டு உள்ளே அனுமதிக்கப்படுகிறார்கள். பக்தர்களுக்காக தமிழகம் மற்றும் புதுச்சேரி பகுதியில் இருந்து அரசு சார்பில் சிறப்பு பஸ்கள் இயக்கப்பட்டு வருகிறது.பக்தர்களுக்காக தனியார் நிறுவனங்கள் சார்பில் ஆங்காங்கே குடிநீர் மற்றும் அன்னதானம் வழங்கப்பட்டு வருகிறது.