கட்டணத்தை செலுத்தாத குழந்தைக்கு கல்வி மறுக்கக்கூடாது

Print | E-mail
புதன்கிழமை, 16, நவம்பர் 2011 (9:4 IST)


கட்டணத்தை செலுத்தாத குழந்தைக்கு கல்வி மறுக்கக்கூடாது



கல்வி கட்டணம் செலுத்தாத குழந்தைக்கு கல்வியை மறுக்காமல் உடனடியாக வகுப்பில் சேர்க்க வேண்டும் என்று 2 பள்ளிகளுக்கு சென்னை ஐகோர்ட்டு உத்தரவிட்டுள்ளது.


கடலூர் மாவட்டம், வேப்பூரில் உள்ள ராமகிருஷ்ணா மெட்ரிக் பள்ளியில் கே.சிவகுமார் என்பவரின் மகன் லட்சுமணகுமார் முதல் வகுப்பு படிக்கிறார். அதுபோல் காஞ்சீபுரம் மாவட்டம், தண்டலத்தில் உள்ள பாரதீய வித்யாலயா மெட்ரிக் பள்ளியில் பி.மோகன் என்பவரின் மகள் சத்யா, மகன் விஷ்ணு ஆகியோர் 6 மற்றும் 4-ம் வகுப்பு படிக்கின்றனர்.


இவர்கள் அந்த பள்ளியில் கல்வி கட்டணம் செலுத்தவில்லை. எனவே அவர்களை பள்ளி நிர்வாகம் அனுமதிக்கவில்லை.

குழந்தைகளை பள்ளிக்குள் அனுமதிக்காத பள்ளி நிர்வாகத்தை எதிர்த்து சென்னை ஐகோர்ட்டில் சிவகுமார் மற்றும் மோகன் வழக்கு தாக்கல் செய்தனர்.


இந்த வழக்கை நீதிபதி என்.பால்வசந்தகுமார் விசாரித்தார். மனுதாரர்கள் தரப்பில் வக்கீல் எம்.பாரி ஆஜராகி வாதிட்டார்.


அவர் மத்திய அரசின் கட்டாய கல்வி உரிமைச்சட்டம் 2009-ன்படி, 14 வயதுக்கு உட்பட்ட அனைவருக்கும் கல்வியை இலவசமாக பெறும் உரிமை உள்ளது. இந்த சட்டம், அரசு உதவி பெறாத பள்ளிகளுக்கும் பொருந்தும்.

அப்படிப்பட்ட பள்ளிகளில் படிக்கும் மொத்த மாணவர்களில் எஸ்.சி., எஸ்.டி, மிகவும் பிற்படுத்தப்பட்டோர், பிற்படுத்தப்பட்டோர் வகுப்பினர் மற்றும் பொருளாதார விளிம்பு நிலையில் இருக்கும் மாணவர்கள் 25 சதவீதம் பேருக்கு இலவச கல்வி தரவேண்டும்.


ஆனால் இந்த சட்டத்தின் அடிப்படையிலான உத்தரவை தமிழக அரசு இன்னும் பிறப்பிக்கவில்லை. என்றாலும், அந்த சட்டத்தின்படி மனுதாரரின் குழந்தைகளுக்கு இலவச கல்வி பெறுவதற்கு உரிமை உண்டு. எனவே அவர்களை பள்ளியில் அனுமதிக்க உத்தரவிட வேண்டும் இவ்வாறு அவர் வாதிட்டார்.


அரசு தரப்பில் ஆஜரான அட்வகேட் ஜெனரல் நவநீதகிருஷ்ணன், ராமகிருஷ்ணா பள்ளியில் கல்விக் கட்டணமாக ரூ.2,600-ம், தண்டலம் பள்ளியில் 4-ம் வகுப்புக்கு ரூ.4,400 மற்றும் 6-ம் வகுப்புக்கு ரூ.7,050-ம் கட்டணமாக கட்டண நிர்ணயக்குழு நிர்ணயித்துள்ளது என்று குறிப்பிட்டார்.


இந்த வழக்கில் நீதிபதி என்.பால்வசந்தகுமார் பிறப்பித்த இடைக்கால உத்தரவில்,


’’மனுதாரர்கள் குழந்தைகள் தாழ்த்தப்பட்ட வகுப்பைச் சேர்ந்தவர்கள். கட்டாய கல்விச் சட்டத்தின்படி அவர்களுக்கு இலவச கல்விக்கான உரிமை உண்டு. உடனடியாக பள்ளிகளில் அந்த குழந்தைகள் அனுமதிக்கப்பட வேண்டும். இன்னும் 2 நாட்களுக்குள் அவர்களுக்கு இலவச சீருடை, பாடப்புத்தகங்களை கல்வி அதிகாரிகள் வழங்க வேண்டும்.



ஐகோர்ட்டு மறு உத்தரவு பிறப்பித்த பிறகு, இந்த பள்ளிக்கு செலுத்த வேண்டிய கட்டணத்தை அரசிடம் இருந்து மனுதாரர் பெற்றுக்கொள்ளலாம். வழக்கு விசாரணை வரும் 21-ந் தேதிக்கு தள்ளி வைக்கப்படுகிறது’’என்று கூறப்பட்டுள்ளது. தினகரன்