சினிமா மூலம் தமிழை பரப்புவது சிரமமாக இருக்கிறது - கமலஹாசன்

by **சிவா** Tue Nov 15, 2011 9:36 am

சினிமா மூலம் தமிழை பரப்புவது சிரமமாக இருக்கிறது என்று நடிகர் கமலஹாசன் கூறினார்.

கு.ஞானசம்பந்தன் நூல்கள்

பேராசிரியர் கு.ஞானசம்பந்தன் எழுதிய `சிரித்துக்கொண்டே ஜெயிப்போம்', `மேடைப் பயணங்கள்', `ஜெயிக்கப்போவது நீ தான்' (இந்நூல் தினத்தந்தியில் வெளிவந்த தொடரின் தொகுப்பு), `இலக்கியச் சாரல்', `சந்தித்ததும் சிந்தித்ததும்' ஆகிய 5 நூல்கள் வெளியீட்டு விழா சென்னையில் நடந்தது. நடிகர் கமலஹாசன் விழாவில் கலந்து கொண்டு நூல்களை வெளியிட்டு பேசினார்.

விழாவில் நடிகர் கமலஹாசன் பேசியதாவது:-

கு.ஞானசம்பந்தனும், நானும் பல ஆண்டு நண்பர்கள். அவருடன் பல அறிவார்ந்த விஷயங்களை நான் பகிர்ந்து கொண்டுள்ளேன். எனக்கு ஒரு சுயநலம் உண்டு. நன்கு கற்றறிந்தவர்கள், விஷய ஞானம் உள்ளவர்களிடம் பழகி அவர்களிடமிருந்து பல விஷயங்களை கற்றுக்கொள்ள வேண்டும் என்பது தான் அது.

சினிமாவில் தமிழ்

திரைப்படங்களில் தமிழ் வார்த்தைகளைப் பயன்படுத்துகிற போது, அது அனைவருக்கும் சென்று சேருமோ, சேராதோ என்ற சந்தேகம் ஏற்படுகிறது. ஒரு திரைப்படத்தில் `ஓவர் சுவீட்' என்ற ஆங்கில வார்த்தையை பயன்படுத்தச் சொன்னார்கள். அதற்கு பதிலாக `திகட்டுதல்' என்ற தமிழ் வார்த்தையை பயன்படுத்தலாமே என்று கூறினேன். ஆனால் அது எல்லோருக்கும் சென்று சேராது என்று தவிர்த்து விட்டார்கள். இதில் கொடுமை என்னவென்றால் `ஓவர் சுவீட்' என்பது கூட சரியான ஆங்கில வார்த்தை அல்ல என்பது தான்.

திரைப்படத் துறையில் நடிகர் வி.கே.ராமசாமி யதார்த்தமாக நடிப்பதில் பெயர் பெற்றவர். கைகளை ஆட்டாமலேயே நடித்து அனைவரையும் சிரிக்க வைத்துவிடுவார். நாகேஷை எடுத்துக்கொண்டால் அவர் தனது உடல் மொழியிலேயே சிரிக்க வைத்துவிடுவார். இப்படி ஒவ்வொருவருக்கும் ஒரு பாணி இருக்கும். அதுபோல ஞானசம்பந்தனும் தனக்கென ஒரு பாணியை வைத்துள்ளார். அவருடைய நகைச்சுவை இயல்பான ஒன்று. அவர் சிறந்த இலக்கியவாதி. ஆனாலும் தன்னுடைய புலமையை அனைவரும் புரிந்து கொள்ளும் வகையில் மிக எளிமையாக இந்த புத்தகத்தில் கூறியுள்ளார்.

படிப்பை முடிக்காததால்

பகுத்தறிவு தான் எனக்கு பிடித்தது; வசதியானது. ஆனால் ஆன்மிகத்தை தெரிந்து கொள்வது அவசியமானால் அதையும் கற்றுக்கொள்வேன். நான் பள்ளிக்கூடப் படிப்பை முழுவதுமாக கற்றுக்கொள்ளாத காரணத்தால், இன்று வரை தொடர்ந்து கற்றுக்கொண்டே இருக்கிறேன். ஒருவேளை பள்ளிப்படிப்பை முடித்திருந்தால் இந்த கற்றுக்கொள்ளும் ஆர்வம் எனக்கு இருந்திருக்குமோ என்னவோ?

இவ்வாறு கமலஹாசன் பேசினார்.

இந்த நூல்களை நடிகர் பாண்டியராஜன், அப்துல் கலாம் தொழில்நுட்ப ஆலோசனை மையத்தின் தொழில்நுட்ப ஆலோசகர் வி.பொன்ராஜ், வேலம்மாள் கல்வி குழுமத்தின் முதன்மை செயல் அதிகாரி எம்.வி.எம்.வேல்முருகன், புதுடெல்லி தமிழ்ச்சங்க செயலாளர் ஆர்.முகுந்தன் ஆகியோர் பெற்றுக்கொண்டனர். விழாவில் எழுத்தாளர்கள் மாலன், பாக்கியம் ராமசாமி, தினமலர் இணை ஆசிரியர் ஆர்.ராமசுப்பு, டெல்லி முத்தமிழ் பேரவை துணைத்தலைவர் கே.வி.கே.பெருமாள் ஆகியோர் வாழ்த்தி பேசினார்கள்.

தினதந்தி