பெட்ரோல் விலை லிட்டருக்கு 1 குறைகிறது

**இளமாறன்** · **இளமாறன்** Sat Nov 12, 2011 3:23 pm

பெட்ரோல் விலை லிட்டருக்கு 1 குறைகிறது

பெட்ரோல் விலை கடந்த வாரம் ரூ. 1.80 உயர்த்தப்பட்டது. இதனால் சென்னையில் ஒரு லிட்டர் பெட்ரோலுக்கு ரூ. 72க்கு மேல் கொடுக்க வேண்டியதுள்ளது. நடப்பாண்டில் மட்டும் பெட்ரோல் விலை 4 தடவை உயர்த்தப்பட்டுள்ளது.

இது மக்களிடம் கடும் அதிருப்தியை ஏற்படுத்தியுள்ளது. ஒவ்வொரு தடவை, பெட்ரோல் விலை உயரும் போது காய்கறி உள்ளிட்ட மற்ற அத்தியாவசியப் பொருட்கள் விலை கணிசமாக உயர்ந்து விடுகிறது.

இதனால் பெட்ரோல் விலையை திரும்பப்பெற வேண்டும் என்று பல தரப்பில் இருந்தும் கோரிக்கை விடுக்கப்பட்டன. இந்த நிலையில் சர்வதேச சந்தையில் கச்சா எண்ணை விலை குறைந்துள்ளது.

ஒரு பீப்பாய் எண்ணை 123 டாலரில் இருந்து 115 டாலராக சரிந்துள்ளது. இதனால் டிசம்பர் மாத வினியோகத்துக்கான கச்சா எண்ணை விலை கணிசமான அளவுக்கு வீழ்ச்சி அடைந்துள்ளது. இதே நிலை நீடிக்கும் பட்சத்தில் பெட்ரோல் விலையை குறைக்க முடியும்.

கச்சா எண்ணை விலை வீழ்ச்சியால் பெட்ரோல் விலையை சுத்திகரிப்பு செலவு மற்றும் வரிகள் நீங்கலாக 60 பைசா வரை குறைக்க முடியும் என்று எண்ணை நிறுவன அதிகாரிகள் கூறியுள்ளனர். மத்திய-மாநில அரசுகள் வரி விதிப்பில் மேலும் சலுகை காட்டும் என்று எதிர்பார்க்கப்படுகிறது. அத்தகைய சூழலில் பெட்ரோல் விலை லிட்டருக்கு 80 பைசா முதல் ஒரு ரூபாய் வரை குறையும் என்று கூறப்படுகிறது.

இந்திய எண்ணை நிறுவனங்கள் இது தொடர்பாக வரும் 15-ந்தேதி கூடி ஆலோசிக்க உள்ளன. அப்போது பெட்ரோல் விலையை குறைத்து எண்ணை நிறுவனங்கள் முடிவு செய்யும் என்று எதிர்பார்க்கப்படுகிறது.

நக்கீரன்