ஆந்திராவில் ரூ.25 கோடி சொத்து குவித்த துணை சூப்பிரண்டு கைது: வீடுகளில் அதிரடி சோதனை

ஐதராபாத்,நவ.12-

ஆந்திரமாநிலம் ரங்கா ரெட்டி மாவட்டத்தில் துணை போலீஸ் சூப்பிரண்டாக பணியாற்றிவர் சர்வேஸ்வர் ரெட்டி. இவர் `சமுதாயத்தில் போலீசின் பங்கு' என்ற தலைப்பில் அம்பேத்கார் பல்கலைக்கழகத்தில் படித்து பி.எச்.டி பட்டம் பெற்றார். இந்த நிலையில் சர்வேஸ்வர் ரெட்டி மீது வருமானத்துக்கு அதிகமாக ரூ.25 கோடி அளவுக்கு சொத்து குவித்து இருப்பதாக புகார் கூறப்பட்டது.

இது பற்றி லஞ்ச ஒழிப்பு போலீசார் விசாரணை நடத்தி துணை சூப்பிரண்டு மீது வழக்கு பதிவு செய்தனர். மேலும் துணை சூப்பிரண்டின் வீடுகள் மற்றும் சொந்த ஊரான கச்சி பவ்லியில் உள்ள வீடுகளில் லஞ்ச ஒழிப்பு போலீசார் திடீர் சோதனை நடத்தினார்கள். இதில் அவர் முறைகேடாக பல கோடி சொத்துக்கள் குவித்து இருப்பது கண்டுபிடிக்கப்பட்டது. மகபூர் நகர் மாவட்டத்தில் சிக்க டோனி பள்ளி கிராமத்திலும் சொத்துக்கள் வாங்கி இருப்பது தெரிய வந்தது.

இதையடுத்து துணை சூப்பிரண்டு சர்வேஸ்வர் ரெட்டி லஞ்சஒழிப்பு போலீசாரால் கைது செய்யப்பட்டார். போலீசார் நடத்திய சோதனையில் இவருக்கு சொந்தமான 6 பங்களாக்கள்,15 பிளாட்டுகள், 26 ஏக்கர் விளை நிலங்கள் இருப்பது தெரிய வந்தது. இதன் மதிப்பு ரூ.3.30 கோடி. இது தவிர அவரது குடும்பத்தினர் மற்றும் பினாமிகள் பெயரில் ரூ.5 கோடி சொத்துக்கள் வாங்கி இருக்கிறார். 140 கிராம் தங்க நகைகள், ரொக்கம், ஹூண்டாய் கார், ஸ்கார்பியோ கார், நிஸ்ஸான் மைக்ரா கார்,ரூ.6.4 லட்சம் மதிப்புள்ள வீட்டு உபயோக பொருட்கள், 3 துப்பாக்கிகள்,ரூ.11 லட்சம் மதிப்புள்ள எல்.ஐ.சி. முதலீடு, ரூ.5 கோடி சொத்துக்களுக்கான பத்திரம் உள்பட மொத்தம் ரூ.25 கோடிக்கு சொத்துக்கள் வாங்கி குவித்து இருப்பதாக போலீசார் தெரிவித்தனர்.

கைதான துணை சூப்பிரண்டு எந்த வழியில் முறைகேடாக சொத்து சேர்த்தார் என்பது குறித்து தொடர்ந்து விசாரணை நடக்கிறது.


மாலைமலர்

`

சமுதாயத்தில் போலீசின் பங்கு' என்ற தலைப்பில் அம்பேத்கார் பல்கலைக்கழகத்தில் படித்து பி.எச்.டி பட்டம் பெற்றார்