அன்னிகேரி மண்டை ஓடு குவியல்கள்

Print | E-mail
சனிக்கிழமை, 12, நவம்பர் 2011 (8:14 IST)



அன்னிகேரி மண்டை ஓடு குவியல்கள்

அன்னிகேரியில் கண்டெடுக்கப்பட்ட மண்டை ஓடு குவியல்கள் 180 ஆண்டுகள் பழமையானவை என்றும், அவை வறட்சியால் இறந்தவர்களின் மண்டை ஓடுகளாக இருக்கலாம் என்றும் அமெரிக்க ஆய்வக முடிவில் தெரியவந்து உள்ளது.



தார்வார் மாவட்டம் நவல்குந்து தாலுகா அன்னிகேரியில் கழிவுநீர் கால்வாயை தூர்வாரும் பணியில் கடந்த ஆண்டு ஆகஸ்டு மாதம் தொழிலாளர்கள் ஈடுபட்டனர். அப்போது தோண்ட, தோண்ட மண்டை ஓடு குவியல்கள் வந்தவண்ணம் இருந்தன.

வரிசையாக அடுக்கி வைக்கப்பட்டிருந்த 600-க்கும் அதிகமான மண்டை ஓடுகள் கண்டெடுக்கப்பட்டன. இது பெரும் பரபரப்பை ஏற்படுத்தியது.


ஆங்கிலேயர்கள் ஆட்சியின்போது, மொத்தமாக கொலை செய்யப்பட்டு, அவர்களின் தலை அங்கு புதைக்கப்பட்டதா? அல்லது மன்னர்கள் காலத்தில் சிரச்சேதம் செய்து புதைக்கப்பட்ட தலையா? என்று பல்வேறு கேள்விகள் அப்போது எழுந்தது.


மண்டை ஓடுகள் எந்த காலத்தை சேர்ந்தவை என்பதை கண்டறிவதற்காக, மாதிரிகள் ஐதராபாத்தில் உள்ள ஆய்வகத்துக்கு அனுப்பி வைக்கப்பட்டது.

ஆனால், அங்கு ஆய்வுக்குரிய போதிய வசதி இல்லாததால், புவனேஸ்வரத்தில் உள்ள இயற்பியல் நிறுவனத்துக்கு அனுப்பி வைக்கப்பட்டது.

அங்கு மண்டை ஓடுகளின் காலத்தை கண்டறிவதற்கான `கார்பன்-14' சோதனை மேற்கொள்ளப்பட்டது. ஆய்வு முடிவில், அந்த மண்டை ஓடுகள் 638 ஆண்டுகள் பழமைவாய்ந்தவையாக இருக்கலாம் என்று தெரியவந்தது.


இந்த ஆய்வு அறிக்கை கடந்த மே மாதம் தார்வார் மாவட்ட நிர்வாகத்துக்கு அனுப்பி வைக்கப்பட்டது.

பின்னர் மாவட்ட நிர்வாகம் மேலும் ஒரு ஆய்வு மேற்கொள்ள முடிவு செய்தது. இதற்காக, மண்டை ஓடு மாதிரிகளை அமெரிக்காவில் புளோரிடாவில் உள்ள ஆய்வகத்துக்கு அனுப்பி வைத்தது.

அங்கு `ரேடியோ கார்பன்' சோதனை செய்ததில், மண்டை ஓடுகள் 181 ஆண்டுகள் பழமையானவை என்று தெரியவந்தது. மேலும் அவை வறட்சி காரணமாக இறந்தவர்களின் மண்டை ஓடுகளாக இருக்கலாம் என்றும் ஆய்வு முடிவில் தெரிவிக்கப்பட்டு உள்ளது. அந்த ஆய்வு அறிக்கை தார்வார் மாவட்ட நிர்வாகத்துக்கு கிடைத்து உள்ளது.

நக்கீரன்