ஈரான் மீது தாக்குதல் நடத்த அமெரிக்கா, ஐ.நா. எதிர்ப்பு

அணுகுண்டு தயாரித்து வரும் ஈரான் அணு உலைக்கூடங்கள் மீது ராணுவ தாக்குதல் நடத்துவதற்கு அமெரிக்காவும், ஐ.நா.வும் எதிர்ப்பு தெரிவித்துள்ளன. ஈரான் மீது புதிய பொருளாதார தடை விதிக்க அமெரிக்கா பரிசீலித்து வருகிறது.

காமெனி மிரட்டல்

சர்வதேச விதிமுறைகளை மீறி, ஈரான் அணுகுண்டு தயாரிக்கும் பணியில் ஈடுபட்டுள்ளதாக ஐ.நா. அமைப்பான சர்வதேச அணுசக்தி கழகம் தனது அறிக்கையில் தெரிவித்துள்ளது. இதனால் ஈரானுக்கு ஆதரவாகவும், எதிராகவும் உலக நாடுகள் வரிந்து கட்டி நிற்கின்றன. ஈரான் அணு உலைக்கூடங்கள் மீது இஸ்ரேல் ராணுவ தாக்குதல் நடத்தும் என்று அச்சம் எழுந்துள்ளது.

ஆனால் அப்படி தாக்குதல் நடத்தினால், இரும்புக்கரம் கொண்டு முறியடிப்போம் என்று ஈரான் சுப்ரீம் தலைவர் காமெனி மிரட்டல் விடுத்துள்ளார்.

அமெரிக்கா பின்வாங்கியது

ஈரானை எதிரியாக கருதி வரும் அமெரிக்கா, ஈரான் மீது தாக்குதல் நடத்துவதை ஆதரிக்கும் என்று எதிர்பார்க்கப்பட்டது. ஆனால் அமெரிக்காவோ மாறுபட்ட நிலையை எடுத்துள்ளது. இதுகுறித்து அமெரிக்க ராணுவ மந்திரியும், சி.ஐ.ஏ. முன்னாள் தலைவருமான லியோன் பானட்டா கூறியதாவது:-

ஈரான், அணு ஆயுத பரவல் தடை ஒப்பந்தத்தில் கையெழுத்திட்ட நாடு. எனவே, சர்வதேச விதிமுறைகளை பின்பற்றி நடந்து கொள்ளும் என்று எதிர்பார்த்தோம். ஆனால், ஈரான் அப்படி நடந்து கொள்ளவில்லை என்பது சர்வதேச அணுசக்தி கழகத்தின் அறிக்கையில் இருந்து தெரிகிறது. எனவே, ஈரான் மீது கூடுதலாக பொருளாதார தடை விதிப்பது குறித்து எங்கள் நட்பு நாடுகளுடன் ஆலோசனை நடத்தி வருகிறோம். ஈரான் மீது புதிய பொருளாதார தடைகளை விதிக்க உலக நாடுகள் ஒன்றுசேர வேண்டும்.

ராணுவ தாக்குதல் கூடாது

அதே சமயத்தில், இப்பிரச்சினைக்காக, ஈரான் அணு உலைக்கூடங்கள் மீது ராணுவ தாக்குதல் நடத்தினால், அது எதிர்பாராத பின்விளைவுகளை ஏற்படுத்தி விடும். அந்த பிராந்தியத்தில் உள்ள அமெரிக்க படைகளுக்கு கடுமையான பாதிப்பை உண்டாக்கி விடும். எனவே, கவனமாக இருக்க வேண்டும். ராணுவ நடவடிக்கை என்பது கடைசி வழிமுறையாகவே இருக்க வேண்டும்.

இவ்வாறு அவர் கூறினார்.

ஐ.நா. சபை

ஐ.நா. பொதுச் செயலாளர் பான் கி மூனும் ஈரான் மீது ராணுவ தாக்குதல் நடத்துவதை ஆதரிக்கவில்லை. பேச்சுவார்த்தை மூலம் இப்பிரச்சினைக்கு தீர்வு காண்பதுதான் ஒரே வழி என்று அவர் வலியுறுத்தி உள்ளார். ஐ.நா. பாதுகாப்பு கவுன்சில் விதிமுறைகளுக்கு கட்டுப்பட்டு நடக்குமாறு அவர் ஈரானை கேட்டுக்கொண்டுள்ளார்.

இதற்கிடையே, ஈரான் மீது புதிய பொருளாதார தடைகளை விதிப்பது பற்றி ஐரோப்பிய நாடுகள் கூட்டமைப்பு பரிசீலித்து வருகிறது. இதுதொடர்பான அறிவிப்பு சில வாரங்களில் வெளியாகிறது.

ஆனால், ஈரான் மீது புதிய பொருளாதார தடைகள் விதிப்பதற்கு ரஷியா, சீனா ஆகிய நாடுகள் எதிர்ப்பு தெரிவித்துள்ளன.

தினதந்தி

நானும் இதை எதிர்க்கிறேன். அமெரிக்கா என்ன பெரிய கொம்பா.
முட்டாள் பசங்க.