கூடங்குளம் அணுமின் நிலையத்தை திறக்க கோரி காங்கிரஸ் ஆர்ப்பாட்டம்

கூடங்குளம் அணுமின் நிலையத்தை திறக்க வலியுறுத்தி காங்கிரஸ் ஐ.என்.டி.யு.சி. தொழிற்சங்கம் சார்பில் நேற்று பாளையங்கோட்டையில் ஆர்ப்பாட்டம் நடைபெற்றது.

காங்கிரஸ் ஆர்ப்பாட்டம்

கூடங்குளம் அணு மின் நிலையம் திறக்கப்பட இருந்த சூழ்நிலையில், அந்த பகுதி மக்கள் அதை மூட வலியுறுத்தி தொடர் போராட்டம் நடத்தி வருகின்றனர்.

இந்த நிலையில் காங்கிரஸ் ஐ.என்.டி.யு.சி. தொழிற்சங்கம் சார்பில் கூடங்குளம் அணு மின் நிலையத்தை திறக்க வலியுறுத்தி பாளையங்கோட்டை மார்க்கெட் திடலில் நேற்று ஆர்ப்பாட்டம் நடந்தது. ஐ.என்.டி.யு.சி. மாநில அமைப்பு செயலாளர் பி.ஆவுடையப்பன் தலைமை தாங்கினார். ஐ.என்.டி.யு.சி. மாநில பொதுச்செயலாளர் பி.கதிர்வேல் போராட்டத்தை தொடங்கி வைத்தார். எஸ்.எஸ்.ராமசுப்பு எம்.பி., முன்னாள் மத்திய மந்திரி தனுஷ்கோடி ஆதித்தன், முன்னாள் எம்.எல்.ஏ. வசந்தகுமார் ஆகியோர் கோரிக்கையை வலியுறுத்தி பேசினார்கள்.

எஸ்.எஸ்.ராமசுப்பு எம்.பி. பேசுகையில் கூறியதாவது:-

மக்கள் நலனே குறிக்கோள்

காங்கிரஸ் கட்சி நாட்டு மக்கள் வளர்ச்சிக்காக தொடர்ந்து செயல்பட்டு வருகிறது. கூடங்குளம் அணுமின் நிலைய திட்டம் ராஜீவ் காந்தியால் ரஷிய நாட்டுடன் ஒப்பந்தம் செய்யப்பட்டு கொண்டு வரப்பட்டது. அந்த திட்டம் கடந்த 15 ஆண்டுகளாக படிப்படியாக வளர்ச்சி அடைந்து, விஞ்ஞானிகள் மூலம் பணிகள் முடிக்கப்பட்டு தயார் நிலையில் உள்ளது. கூடங்குளம் அணுமின் நிலையம் பாதுகாப்பானது, உறுதியானது என்று விஞ்ஞானிகள் பலமுறை கூறி உள்ளனர்.

மக்கள் ஒத்துழைப்பு தேவை

கூடங்குளம் பகுதி மக்களை திசை திருப்பி, நாட்டின் வளர்ச்சியையும், அந்த பகுதி வளர்ச்சியையும் தடுக்கும் வகையில் சமூக விரோத செயலில் சிலர் ஈடுபட்டு வருகின்றனர். இதற்கான ஆதிமூலத்தை மத்திய உளவுப்பிரிவினர் கண்டுபிடித்து தடுக்க வேண்டும்.

சமீபத்தில் முன்னாள் ஜனாதிபதியும் விஞ்ஞானியுமான அப்துல் கலாம் நேரில் வந்து ஆய்வு செய்து யாரும் பயப்பட தேவையில்லை, கூடங்குளம் அணு மின் நிலையம் மிகவும் பாதுகாப்பானது என்று உறுதி அளித்து உள்ளார். எனவே கூடங்குளம் பகுதி மக்கள் யாரும் பயப்பட தேவையில்லை. கூடங்குளம் அணு மின் நிலையத்தில் மின் உற்பத்தியை தொடங்க அந்த பகுதி மக்கள் ஒத்துழைப்பு அளிக்க வேண்டும்.

இவ்வாறு எஸ்.எஸ்.ராமசுப்பு எம்.பி. பேசினார்.

தனுஷ்கோடி ஆதித்தன்

முன்னாள் மத்திய மந்திரி தனுஷ்கோடி ஆதித்தன் பேசுகையில் கூறியதாவது:-

கூடங்குளம் அணு மின் நிலையம் குறித்து மக்கள் மத்தியில் தவறான பிரசாரம் செய்யப்பட்டு வருகிறது. உலகம் முழுவதும் 29 முன்னேறிய நாடுகளில் 529 அணுமின் உலைகள் உள்ளன. அதன் மூலம் 3,78,908 மெகாவாட் மின்சாரம் தயாரிக்கப்படுகிறது. இதில் கூடங்குளம் அணு உலைகள் மற்ற நாடுகளில் இல்லாத வகையில் பாதுகாப்பு அம்சங்களுடன் நிறுவப்பட்டு உள்ளது. கூடங்குளம் அணு மின் நிலையத்தால் எந்த பாதிப்பும் ஏற்படாது. அது விரைவில் திறக்கப்பட வேண்டும்.

இவ்வாறு முன்னாள் மத்திய மந்திரி தனுஷ்கோடி ஆதித்தன் பேசினார்.

உண்ணாவிரதம்

இதற்கிடையே, கூடங்குளம் அணுமின் நிலையத்தை மூடக்கோரி இடிந்தரை கிராமத்தில் நடைபெற்று வரும் உண்ணாவிரத போராட்டம் நேற்று 25-வது நாளாக நீடித்தது. இந்தநிலையில் கூடங்குளம் அணுமின் நிலையத்துக்கு எதிர்ப்பு தெரிவித்தும், அணு உலையை மூடக்கோரியும் செட்டிகுளம் பஸ் நிலையம் பகுதியில் நேற்று ஒரு நாள் அடையாள உண்ணாவிரதம் நடந்தது. இதில் சுமார் 5 ஆயிரம் பேர் கலந்து கொண்டனர்.

உண்ணாவிரதத்தில் போராட்டக்குழு ஒருங்கிணைப்பாளர் உதயகுமார் பேசுகையில்; அணு உலைக்கு எதிரான போராட்டம் அமைதி வழியில் தொடர்ந்து நடைபெறும் என்றும், வருகிற 18-ந்தேதி வள்ளிïரில் ஒரு நாள் அடையாள உண்ணாவிரதம் நடைபெறும் என்றும் கூறினார்.

தினதந்தி