வாக்காளர் பட்டியலில் பெயர் சேர்க்க 7 லட்சம் மனுக்கள் குவிந்தன

வாக்காளர் பட்டியலில் பெயர் சேர்ப்பதற்காக தமிழகம் முழுவதும் 7 லட்சம் பேர் மனு செய்துள்ளனர்.

அலைமோதிய கூட்டம்

வாக்காளர் பட்டியலில் புதியதாக பெயர் சேர்க்க மற்றும் திருத்தம் செய்வதற்கு நேற்று கடைசி நாளாகும். இதையொட்டி நேற்று சென்னையில் உள்ள மண்டல அலுவலகங்கள் மற்றும் வாக்குசாவடியில் அமைக்கப்பட்டிருந்த மையங்களில் ஏராளமானவர்கள் குவிந்தனர். அவர்கள் வாக்காளர் பட்டியலில் பெயர் சேர்ப்பதற்கான விண்ணப்பங்களை பூர்த்தி செய்து, அந்தந்த அதிகாரிகளிடம் வழங்கினர்.

சென்னை மட்டுமின்றி காஞ்சீபுரம், திருவள்ளூர் உள்பட தமிழகத்தின் அனைத்து மாவட்டத்திலும் கடைசிக்கட்ட பெயர் சேர்ப்பு விறுவிறுப்பாக நடைபெற்றது. சில இடங்களில் விண்ணப்பங்கள் குறைவாக இருந்ததால் பலருக்கு விண்ணப்பங்களை கொடுக்க முடியாத சூழ்நிலை ஏற்பட்டது. ஒரு சிலர் நிரப்பப்படாத விண்ணப்பங்களை ஜெராக்ஸ் எடுத்து நண்பர்களுக்கு வழங்கி, பெயர் சேர்ப்புக்கு துணை நின்ற காட்சிகளை பல இடங்களில் பார்க்க முடிந்தது.

ஆன்லைனில் பதிவு

விரிவாக்கப்பட்ட சென்னை மாநகராட்சிக்கு உட்பட்ட பகுதிகளில் 15 மண்டலங்களில் பெயர் சேர்ப்பு பணி எந்தவித தொய்வும் இன்றி நடைபெற்றது. விண்ணப்பங்களை முறையாக பூர்த்தி செய்து கொடுத்தவர்களுக்கு அதிகாரிகள் ஒப்புகை சீட்டு வழங்கினர்.

இந்த ஆண்டு ஆன்லைன் மூலமாகவும் வாக்காளர் பட்டியலில் பெயர் சேர்த்துக்கொள்ளலாம் என்று அறிவிக்கப்பட்டு இருந்ததால், ஏராளமானோர் ஆன்லைன் மூலம் தங்களது பெயர்களை பதிவு செய்து கொண்டனர். இதன்மூலம் நகர்புறத்தில் 40 சதவீதத்தினர் ஆன்லைன் மூலம் தங்களது பெயர்களை பதிவு செய்து கொண்டனர். மற்ற பகுதியில் 10 சதவீதத்தினர் ஆன்லைனில் பதிவு செய்து கொண்டனர்.

7 லட்சம் மனுக்கள்

இதுவரையில் தமிழகம் முழுவதும் சுமார் 7 லட்சம் பேர் பெயர் சேர்ப்பதற்காக விண்ணப்பங்களை வழங்கியுள்ளனர். ஆன்லைன் மூலம் பதிவு செய்தவர்களுக்கு வீடு வீடாக வந்து ஆவணங்களை சரி பார்க்கும் பணி இன்னும் சில நாட்களில் தொடங்க இருக்கிறது.

அதனை தொடர்ந்து பட்டியல் தயாரிக்கப்பட்டு அடுத்த ஆண்டு ஜனவரி 5-ந் தேதி இறுதி வாக்காளர் பட்டியல் வெளியிடப்படும். புதியதாக பெயர் சேர்த்தவர்களுக்கு ஜனவரி 25-ந் தேதி புகைப்படத்துடன் கூடிய வாக்காளர் அட்டைகள் வழங்க ஏற்பாடு செய்யப்பட்டுள்ளது.

ஏமாற்றம்

சில இடங்களில் விதிமுறைகள் தெரியாத அதிகாரிகளால் தங்களது பெயர்களை சேர்க்க முடியாமல் பலர் ஏமாற்றத்துடன் திரும்பிச் சென்ற காட்சிகளை பார்க்க முடிந்தது. எடுத்துக்காட்டாக 18 வயது முதல் 21 வயது உள்ளவர்களுக்கு தங்களது வயதை நிரூபிக்கும் சான்றிதழ் வேண்டும் என்று விதிமுறையில் கூறப்பட்டுள்ளது. அதற்கு மேல் வயது உள்ளவர்கள் தங்களது விண்ணப்பத்தில் குறிப்படும் வயதையே எடுத்துக்கொண்டால் போதும் என்று தெளிவாக விதியில் கூறப்பட்டுள்ளது.

ஆனால் பல இடங்களில் இதுபோன்ற விதியை தெரியாமல் அதிகாரிகள் தேவையற்ற சான்றிதழ்களை கேட்டதால் வாக்காளர் பெயர் பட்டியலில் தங்களது பெயர்களை சேர்க்க வந்தவர்கள் பெரும் குழப்பத்தில் ஆழ்ந்தனர்.

யாருக்கு வயது சான்றிதழ் தேவை?

எடுத்துக்காட்டாக அண்ணாநகர் பகுதிக்கான வாக்காளர் பதிவு அலுவலகம் கீழ்ப்பாக்கம் ஈகா தியேட்டர் எதிரே அமைந்துள்ளது. அங்கே வி.ஜாஸ்மி என்ற பெண் தன் குடும்பத்தாரின் விண்ணப்பத்தோடு இணைந்து தன்னுடைய விண்ணப்பத்தையும் கொடுத்தார். அவருக்கு 25 வயது ஆகிறது. அவர் வாக்காளர் பட்டியல் விதி முறையை குறிப்பிட்டு தனக்கு வயது சான்றிதழ் தேவையில்லை என்று கூறியுள்ளார். ஆனால் அவரது விண்ணப்பத்தை வாங்காமல் அதிகாரிகள் அவரை திருப்பி அனுப்பி விட்டனர். விதிகளை அவர் குறிப்பிட்டு எடுத்துக்காட்டியும் அதிகாரிகள் ஏற்றுக்கொள்ளவில்லை.

`அதிகாரிகளுக்கு விதி தெரியாத காரணத்தால் எனது ஜனநாயக கடமையாற்ற நான் வாக்காளர் பட்டியலில் என் பெயரை சேர்க்க விரும்பினாலும், அதிகாரிகள் என் பெயரை சேர்க்கவில்லை. இதுபோன்ற நிலைமைகளை பொதுவாக தவிர்ப்பதற்கு தேர்தல் கமிஷன் நடைமுறைகளை கொண்டு வர வேண்டும்' என்று வி.ஜாஸ்மி தெரிவித்தார்.

இதுபோன்று வாக்காளர் பட்டியலில் பெயர் சேர்க்க அதிகாரிகளை நியமிக்கும் போது நன்றாக விதிகளை தெரிந்தவர்களை நியமிக்க வேண்டும் என்பது தான் பொது மக்களின் கோரிக்கையாகும்.

தினதந்தி