90 கிமீ வேகத்துக்கு மேல் போகக்கூடாது : ஆம்னி பஸ்களுக்கு ஐகோர்ட் தடை!

by **இளமாறன்** Fri Nov 11, 2011 3:05 pm

சென்னை : 90 கிமீ வேகத்துக்கு மேல் போகக்கூடாது. ஆம்னி பஸ்களில் டிசம்பர் மாதம் 22ம் தேதிக்குள் வேகக் கட்டுபாட்டு கருவி பொருத்த வேண்டும். இல்லாவிட்டால் கடும் நடவடிக்கை எடுக்கப்படும் என்று சென்னை உயர் நீதிமன்றம் உத்தரவிட்டுள்ளது. உயர் நீதிமன்றத்தில் வக்கீல் காசிநாதபாரதி தாக்கல் செய்த பொதுநல வழக்கில் கூறியிருப்பதாவது:

ராணிப்பேட்டை அருகே காவேரிபாக்கத்தில் நடந்த ஆம்னி பஸ் விபத் தில் 23 பேர் உடல் கருகி பலியானார்கள். அதிக வேகமும், படுக்கை வசதி இருந்ததும்தான் அதிக உயிரிழப்புக்கு காரணம் என கூறப்பட்டது. படுக்கை வசதி பஸ்கள் இயக்க தமிழகத்தில் அனுமதியில்லை. புதுவையில் அனுமதி பெற்று தமிழ்நாட்டில் இயக்கி வருகிறார்கள். தமிழகத்தில் 686 ஆம்னி பஸ்கள் இயக்கப்படுகின்றன.

இதில் 310 பஸ்களுக்குதான் பெர்மிட் உள்ளது. கோடை விடுமுறை காலத்தில் இஷ்டத்துக்கு கட்டணத்தை உயர்த்திக் கொள்கிறார்கள். இதனால் பொது மக்கள் மிகவும் பாதிக்கப்படுகிறார்கள். எனவே ஆம்னி பஸ்களின் கட்டணம், வேகம் ஆகியவற்றை கட்டுப்படுத்த கமிட்டி அமைத்து புதிய விதிமுறை உருவாக்க வேண்டும். படுக்கை வசதி பஸ்கள் மற்றும் பெர்மிட் இல்லாத பஸ்கள் இயக்க தடை விதிக்க வேண்டும்.

இவ்வாறு வழக்கில் கூறியிருந்தார். இந்த வழக்கை நீதிபதிகள் டி.முருசேன், கே.கே.சசிதரன் ஆகியோர் நேற்று விசாரித்து தீர்ப்பு அளித்தனர். தீர்ப்பில் கூறியிருப்பதாவது:
ஆம்னி பஸ்கள் உள்பட அனைத்து கனரக வாகனங்களும் வேகக் கட்டு பாடு கருவி பொருத்துவது தொடர்பாக தமிழக அரசு, மத்திய அரசின் மோட்டார் வாகன சட்ட விதிமுறைகளை பின்பற்றி புதிய உத்தரவு பிறப்பிக்க வேண்டும். இதுதொடர்பாக விரைவில் ஒரு அறிக்கையை அரசு வெளியிட வேண்டும். தேசிய நெஞ்சாலைகளில் அடிக்கடி விபத்து நடப்பதால், ஆம்னி பஸ்கள் டிசம்பர் 22ம் தேதிக்குள் வாகன கட்டுபாடு கருவியை பொருத்த வேண்டும்.

அப்படி பொருத்த தவறினால் அந்த ஆம்னி பஸ்கள் மீது அதிகாரிகள் உரிய நடவடிக்கை எடுக்க வேண்டும். அந்த பஸ்களுக்கு கொடுத்த லைசென்சை ரத்து செய்ய வேண்டும். தேசிய நெஞ்சாலைகளில் ஆம்னி பஸ்கள் உள்பட அனைத்து கனரக வாகனங்களும் 90 கிமீ வேகத்திற்கு மேல் செல்லக் கூடாது. அப்படி சென்றால் அதிகாரிகள் அதை கண்டுபிடித்து டிரைவர்களின் லைசெ ன்சை ரத்து செய்ய வேண்டும். டிரைவர்கள் குடிபோதையில் வாகனங்கள் ஓட்டினால் அவர்கள் மீது நடவடிக்கை எடுக்க வேண்டும்.

அவர்கள் தொடர்ந்து வாகனத்தை ஓட்டவும் அனுமதிக்க கூடாது. ஆம்னி பஸ்களை தவிர மற்ற வாகனங்கள் 3 மாதத்திற்குள் வேகக் கட்டுபாட்டு கருவியை பொருத்த வேண்டும்.
இல்லாவிட்டால் அந்த வாகனங்கள் மீது அதிகாரிகள் உரிய நடவடிக்கை எடுக்க வேண்டும். எங்களது இந்த உத்தரவு நகலை தமிழகம் முழுவதும் உள்ள மண்டல அதிகாரிகள், ஆர்.டிஓ.க்களுக்கு , மோட்டார் வாகன இன்ஸ்பெக்டர்களுக்கு அனுப்ப வேண்டும். இவ்வாறு தீர்ப்பில் கூறியுள்ளனர்.

விதிகள் இருக்கிறது கடைபிடிப்பதே இல்லை

தேசிய நெடுஞ்சாலைகளில் விபத்தை தடுக்க பல விதிகள் உள்ளன. அவற்றை கடைபிடிப்பதே இல்லை. இதுவே விபத்துகளுக்கு முக்கிய காரணம்.

1. தேசிய நெடுஞ்சாலைகளில் இருக்கும் அறிவிப்பு பலகைகள், சாலை விதிகளை கட்டாயம் படிக்க வேண்டும். அதன்படி வாகனங்களை இயக்க வேண்டும்.
2. வாகனங்களின் முன்னும், பின்னும், ஒளிரும் பட்டைகள் கட்டாயம் இருக்க வேண்டும்.
3. பஞ்சாயத்து, நகராட்சி இணைப்பு சாலைகளில் வேகத்தடைகளை கவனத்தில் கொண்டு மெதுவாக செல்ல வேண்டும்.
4. சுற்றுலா கார், லாரி, பஸ்கள் ஆகியவை ஒரு மணிநேரத்திற்கு 65 கிலோ மீட்டர் வேகத்தில் தான் செல்ல வேண்டும்.
5. டிரெய்லர் வாகனங்கள், பைக்குகள் உள்ளிட்டவை ஒரு மணிநேரத்திற்கு 50 கிலோ மீட்டர் வேகத்தில் தான் செல்ல வேண்டும்.
6. பயணிகள் செல்லும் அரசு மற்றும் ஆம்னி பஸ்களில் தீ விபத்து முன்னெச்சரிக்கை கருவிகள், அவசரகால ஜன்னல்கள், முதலுதவி பெட்டி ஆகியவை கட்டாயம்.

தினகரன்