பங்கு வர்த்தக முறைகேடு அமெரிக்க வாழ் இலங்கை தமிழருக்கு ரூ.465 கோடி அபராதம்

**சிவா** · **சிவா** Thu Nov 10, 2011 11:17 pm

அமெரிக்காவில் பங்கு வர்த்தக முறைகேட்டில் ஈடுபட்ட அமெரிக்க வாழ் கோடீஸ்வர இலங்கை தமிழருக்கு ரூ.465 கோடி அபராதம் விதிக்கப்பட்டது.

11 ஆண்டு சிறை

அமெரிக்காவில் வாழும் கோடீஸ்வர இலங்கை தமிழர் ராஜ் ராஜரத்தினம். இவர், வால் ஸ்ட்ரீட் பகுதியில் உள்ள ஒரு நிறுவனத்தில் பணியாற்றி வந்தார். அந்த நிறுவனத்தின் பங்கு மதிப்பு உயருவதை முன்கூட்டியே அறிந்து கொண்டு, அவற்றை ஏராளமாக வாங்கிவைத்தார். பின்னர், அவற்றை அதிக லாபத்துக்கு விற்பனை செய்தார். அமெரிக்க சட்டப்படி இது குற்றம் ஆகும்.

இந்த முறைகேடான பங்கு விற்பனை (இன்சைடர் டிரேடிங்) மூலமாக சுமார் ரூ.270 கோடி வரை சம்பாதித்தார். இதையடுத்து, ராஜரத்தினம் மீது நிïயார்க் கோர்ட்டில் வழக்கு பதிவு செய்யப்பட்டு விசாரணை நடைபெற்று வந்தது. வழக்கு விசாரணை முடிந்த நிலையில், அவருக்கு 11 ஆண்டு சிறைத் தண்டனை விதித்து கடந்த மாதம் தீர்ப்பு வெளியானது.

மொத்தம் ரூ.785 கோடி

இந்த நிலையில், வழக்கின் இறுதிகட்ட தீர்ப்பு நேற்று முன்தினம் வெளியானது. நீதிபதி ஜெட் ரெகோப் தீர்ப்பை வெளியிட்டார். அப்போது, கோடீஸ்வரர் ராஜரத்தினத்துக்கு ரூ.465 கோடி அபராதம் விதிக்கப்பட்டது. மேலும், முறைகேடான பங்கு விற்பனை மூலமாக சம்பாதித்த ரூ.270 கோடியும் பறிமுதல் செய்யப்படுகிறது. இது தவிர, குற்றச்சதிக்காக ரூ.50 கோடி அபராதம் விதித்து நீதிபதி தீர்ப்பளித்தார்.

அதன்படி, மொத்தம் ரூ.785 கோடி அபராதத்தை ராஜரத்தினம் செலுத்த வேண்டும். அமெரிக்க வரலாற்றில் முன் எப்போதும் இல்லாத அளவுக்கு மிகப்பெரிய அளவில் அபராதம் விதிக்கப்பட்டுள்ளது என்பது குறிப்பிடத்தக்கது.

வீம்பு குணம்

நீதிபதி ஜெட் ரெகோப் அளித்த தீர்ப்பில், `பல ஆண்டுகளாகவே வீம்பு குணத்துடன் இத்தகைய முறைகேடான வர்த்தகத்தில் ராஜரத்தினம் ஈடுபட்டு வந்துள்ளார். இந்த தண்டனை மூலமாக, இனிமேல் இன்சைடர் டிரேடிங் குற்றத்தில் ஈடுபடும் எண்ணமே யாருக்கும் ஏற்படக் கூடாது' என தெரிவித்துள்ளார்.

ராஜரத்தினம் தவிர, அமெரிக்காவில் வாழும் இந்தியரும் வால் ஸ்ட்ரீட் பகுதி தொழிலதிபருமான ரஜத் குப்தா மீதும் அமெரிக்க போலீசார் வழக்கு பதிவு செய்துள்ளனர். கோல்ட்மேன் சாச்ஸ், புரோக்டர், கேம்பிள் போன்ற நிறுவனங்களில் பணியாற்றியபோது முறைகேடான பங்கு வர்த்தகத்தில் குப்தா ஈடுபட்டார். அவர் மீதான விசாரணை, அடுத்த ஆண்டு நடைபெறுகிறது.

தினதந்தி