பிரசவம்

by அனந்தம் ஜீவ்னி Wed Nov 09, 2011 10:57 pm

மருத்துவ மனையின்
பிரசவ வார்டுகளில்
மரண அவஸ்தையோடு
கர்ப்பிணி பெண்கள்

பெண்ணாகக் பிறக்கக்கூடாதென
ஒரு பாமர பெண்ணின்
மாரியம்மன் பிரார்த்தனை

பெருமை பொங்க
ஒருத்தி பார்க்கிறாள்
மலடிப் பட்டம் கட்டிவிட்ட
மாமியாரை நோக்கி

செவிலித் தாய்களின்
எரிச்சலோடு
எச்சில் தெறிக்க
வந்து விழும் வார்த்தைகள்

திடீரென
வலி தாக்கும் கணங்கள்
வதையின் விளிம்பு காட்ட
எல்லாம் முடிந்து
ஈன்ற அந்த குழந்தை
முந்தானையை சமீபித்திருக்கையில்
நரம்புகள் குவியும் பொன்னம்பலமேட்டில்* ஏற்றப்படுகிறது
பெண்மையின் மகரஜோதி

பிரசவத்துக்கு பின்னும்
சுமக்கின்றன
கங்காருகள்
குப்பை தொட்டிகளும்
இங்கு
குழந்தைக்கு தொட்டிலாய்

மருந்து வீச்சம் அடிக்கும் வராந்தாக்களில்
பிரசவத்தால் வரும் பிரச்சனையோடு
நடந்து செல்கின்றனர் ஆண்கள்
பிரசவமே பிரச்சனையாக அமர்ந்திருக்கின்றனர்
இன்றைய பெண்கள்.

*பொன்னம்பலமேடு -சபரி மலையில் மகர ஜோதி ஏற்றும் இடம் .