பெண் எரித்து கொலை: கள்ள காதலன் கைது

திருவண்ணாமலை மாவட்டம் ஆரணி அடுத்த பெரணமல்லூரை சேர்ந்தவர் செல்வம்(25), கட்டிட தொழிலாளி. இவர் கட்டிட வேலைக்காக அடிக்கடி சென்னை சென்று வருவாராம். அப்போது செல்வத்துக்கும், சென்னை கே.கே.நகர் குறிஞ்சி தெருவை சேர்ந்த கங்கா (எ) கற்பகத்துக்கும்(35) கள்ளத்தொடர்பு ஏற்பட்டது.

கங்காவுக்கு திருமணம் ஆகி 2 ஆண் குழந்தைகள் உள்ளன. இதற்கிடையில் கங்கா தன்னை திருமணம் செய்து தனிக்குடித்தனம் நடத்துமாறு செல்வத்தை வற்புறுத்தி வந்தாராம்.

இந்நிலையில் 07/11/2011 அன்று செல்வம், கங்காவை தனது பைக்கில் சென்னையில் இருந்து கண்ணமங்கலம் அடுத்த ஆவணியாபுரத்துக்கு அழைத்து வந்துள்ளார். அங்குள்ள காட்டுப்பகுதியில் இருவரும் உல்லாசமாக இருந்ததாக கூறப்படுகிறது.

அப்போது கங்கா தன்னை உடனடியாக திருமணம் செய்து கொள்ளுமாறு வற்புறுத்தியுள்ளார். இதனால் ஆத்திரம் அடைந்த செல்வம், கங்காவை கல்லால் சரமாரியாக தாக்கியுள்ளார். இதில் படுகாயம் அடைந்து மயங்கி விழுந்த அவரை பனை ஓலையில் படுக்க வைத்து தீ வைத்தாராம். அப்போது கங்காவின் அலறல் சத்தம் கேட்டு அக்கம், பக்கத்தினர் திரண்டு வந்து தீயை அணைத்தனர். அங்கிருந்த செல்வத்தை பிடித்து கண்ணமங்கலம் போலீசுக்கு தகவல் தெரிவித்தனர்.

அதன்பேரில் போலீசார் விரைந்து சென்று படுகாயம் அடைந்த கங்காவை ஆரணி அரசு மருத்துவமனையில் சேர்த்தனர். ஆனால் அங்கு சிகிச்சை பலனின்றி கங்கா 07/11/2011 அன்று இரவு இறந்தார். இதுதொடர்பாக போலீசார் கொலை வழக்கு பதிவு செய்து செல்வத்தை கைது செய்து விசாரித்து வருகின்றனர்.

நக்கீரன்

இப்படியெல்லாம் நடப்பதற்கு ஒரு வயது வித்தியாசம் வேண்டாமா?அறிவு என்பதே கிடையாதா.