பாகிஸ்தானில் இந்து டாக்டர்கள் 4 பேர் சுட்டுக்கொலை

பாகிஸ்தானில் சிந்து மாநிலத்தில் உள்ள ஷிகார்பூர் என்ற இடத்துக்கு அருகில் உள்ள சக் நகரில் இந்துக்கள் கணிசமாக வசித்து வருகிறார்கள். அங்கு மட்டும் 50 ஆயிரம் இந்துக்கள் வசிக்கிறார்கள் என்று கூறப்படுகிறது. அந்த நகரில் டாக்டர்களாக தொழில் செய்து வருபவர்கள் டாக்டர் அசோக், டாக்டர் நரேஷ், டாக்டர் அஜீத், டாக்டர் சத்யபால் ஆகியோர் ஆவார்கள்.

இந்த 4 பேரும் நேற்று மாலை சக் டவுன் என்ற இடத்தில் உள்ள தங்கள் கிளினிக்குகளில் இருந்தனர். அப்போது அங்கு வந்த ஆயுதம் தாங்கிய கும்பல் ஒன்று அவர்களை சுட்டுக்கொன்றது. இதில் அந்த 4பேரும் அந்த இடத்திலேயே இறந்தனர். இது அங்கு வசிக்கும் இந்துக்கள் மத்தியில் பீதியையும், அச்சத்தையும் ஏற்படுத்தி உள்ளது.

இந்து மதத்தை சேர்ந்த 4 டாக்டர்கள் பலியானதை முன்னாள் சட்டசபை உறுப்பினரும், பாகிஸ்தான் இந்து கவுன்சில் பாதுகாவலருமான டாக்டர் ரமேஷ் குமார் உறுதிப்படுத்தினார்.

எங்கள் சமூகத்தை சேர்ந்தவர்கள் இப்படி தாக்கப்படுவது இது முதல் முறை அல்ல என்றும், இதுபோன்ற தாக்குதல்களில் ஈடுபடுபவர்களுக்கு போலீசார் ஆதரவு தருகிறார்கள். இது தான் எங்களுக்கு கவலை அளிக்கிறது என்றும் குறிப்பிட்டார்.

முஷரப் ஜனாதிபதியாக இருந்தபோது இந்துக்கள் பாதுகாப்பாக இருந்தனர். இப்போது நாங்கள் தீவிரவாதிகளுக்கும், கிரிமினல்களுக்கும் இரையாகி வருகிறோம் என்றும் அவர் தெரிவித்தார்.

இது தொடர்பாக 2 பேரை போலீசார் கைது செய்தனர். மற்ற குற்றவாளிகளை போலீசார் தேடி வருகிறார்கள்.

இந்து மதத்தை சேர்ந்த இளம் பெண் ஒருவர் தொடர்பாக சில இந்துக்களுக்கும், உள்ளூரைச்சேர்ந்த ஒரு கும்பலுக்கும் தகராறு ஏற்பட்டது. இதை தொடர்ந்து தான் இந்த கொலை நடந்து உள்ளதாக கூறப்படுகிறது.

தினதந்தி

இந்து மத டாக்டர்களை கொன்றவர்கள் மீது நடவடிக்கை எடுக்க வேண்டும், பாகிஸ்தான் அரசுக்கு அமெரிக்கா வற்புறுத்தல்


பாகிஸ்தானில் சிந்து மாநிலத்தில் ஷிகார்பூர் நகரில் இந்து மதத்தை சேர்ந்த 3 டாக்டர்களை சுட்டுக்கொன்றவர்கள் மீது பாகிஸ்தான் அரசு நடவடிக்கை எடுக்க வேண்டும். அவர்களை சட்டத்தின் முன் நிறுத்த வேண்டும் என்று அமெரிக்கா வலியுறுத்தி உள்ளது.

மதச்சிறுபான்மையினரை சுட்டுக்கொன்றதற்கு அமெரிக்கா கண்டனமும் தெரிவித்து உள்ளது. வெளிநாட்டு இலாகா அதிகாரி ஒருவர் இந்த தகவலை தெரிவித்தார்.

பாகிஸ்தானில் உள்ள முஸ்லிம் பயோ சமூகத்தினர் தான் இந்த கொலைகளை செய்து உள்ளனர். இதைத்தொடர்ந்து இந்த பகுதியில் வசிக்கும் இந்துக்கள் காலவரையறையின்றி வேலை நிறுத்தம் செய்து வருகிறார்கள். இந்து மத வர்த்தகர்கள் இந்த கொலைக்கு எதிர்ப்பு தெரிவித்து தங்கள் கடைகளை மூடினார்கள். இந்த சம்பவம் குறித்து விசாரணை நடத்த அதிபர் சர்தாரி உத்தரவிட்டு இருக்கிறார்.