ஹரித்துவார் அருகே கூட்ட நெரிசலில் சிக்கி 16 பேர் பலி

ஹரித்துவார் அருகே கூட்ட நெரிசலில் சிக்கி 16 பேர் பலியானார்கள். பலியானவர்களின் குடும்பத்தினருக்கு பிரதமர் மன்மோகன்சிங் மற்றும் சோனியா காந்தி ஆகியோர் அனுதாபம் தெரிவித்து உள்ளனர்.

நூற்றாண்டு விழா

உத்தரகாண்ட் மாநிலத்தில் உள்ள புனித ஸ்தலமான ஹரித்துவார் அருகே கங்கை நதிக்கரையோரம் சாந்திதீப் காட் என்ற இடத்தில் சாந்திகஞ்ச் ஆஸ்ரமம் உள்ளது. இதன் நிறுவனர் ஆச்சார்யா பண்டிட் ஸ்ரீராம் சர்மா. `சர்வதேச காயத்ரி பரிவார்' என்ற அமைப்பையும் இவரே நிறுவியவர்.

இவரது நூற்றாண்டு விழாவுக்கு காயத்ரி பரிவார் அமைப்பினர் ஏற்பாடு செய்து இருந்தனர். அதன்படி விழா கடந்த சில நாட்களாக கோலாகலமாக நடந்து வந்தது.

நெருக்கடியில் சிக்கி

வட மாநிலங்களில் கும்பமேளாவுக்கு அடுத்தபடியாக இந்த விழா பிரசித்தி பெற்றது. விழாவின் உச்சக்கட்ட நிகழ்ச்சியாக நேற்று யாகசாலை பூஜைகள் நடந்தன. இந்த பூஜை மற்றும் யாகத்தில் இமாச்சலப்பிரதேச மாநில முதல்-மந்திரி பிரேம்குமார் துமால், மத்திய பிரதேச மாநில முதல்-மந்திரி சிவராஜ் சிங் சவுகான், பா.ஜனதா தலைவர் நிதின் கட்காரி உள்பட ஏராளமான பிரமுகர்களும், வட மாநிலங்களை சேர்ந்த பல லட்சம் பக்தர்களும், வெளிநாடுகளைச் சேர்ந்த பக்தர்களும் கலந்து கொண்டனர்.

நேரம் அதிகம் ஆக, ஆக மக்கள் யாகசாலை பந்தலுக்குள் முண்டியடித்துக்கொண்டு செல்ல முயன்றனர். ஒரே நேரத்தில் ஏராளமானவர்கள் முண்டியடித்துக்கொண்டு செல்ல முயன்றதால் கடும் நெரிசல் ஏற்பட்டது.

16 பேர் பலி

அப்போது, யாகசாலையில் இருந்து கடுமையான புகை மூட்டம் ஏற்பட்டது. இந்த புகையில் சிக்கி பலர் மூச்சு திணறினார்கள். இதனால் அவர்கள் பீதியில் அலறியடித்துக்கொண்டு யாகசாலையை விட்டு வெளியேற தலைதெறிக்க ஓடினார்கள்.

இந்த நெரிசலில் சிக்கி 16 பேர் பலியானார்கள். அவர்களில் 14 பேர் பெண்கள். 50-க்கும் மேற்பட்டோர் படுகாயம் அடைந்தனர். அவர்கள் அருகில் உள்ள ஆஸ்பத்திரிகளில் அனுமதிக்கப்பட்டு உள்ளனர்.

சோனியா அனுதாபம்

இந்த சம்பவம் பற்றி அறிந்த பிரதமர் மன்மோகன்சிங் நெரிசலில் சிக்கி பலியானவர்களின் குடும்பத்தினருக்கு ஆழ்ந்த இரங்கலை தெரிவித்து உள்ளார். படுகாயம் அடைந்தவர்களுக்கு நன்கு சிகிச்சை அளிக்க உத்தரவிட்டு உள்ள அவர், காயம் அடைந்தவர்கள் விரைவில் குணமடையவும் வாழ்த்து தெரிவித்து உள்ளார். அத்துடன் உயிர் இழந்தவர்களின் குடும்பத்தினருக்கு தலா ரூ.1 லட்சமும், காயம் அடைந்தவர்களுக்கு தலா ரூ.50 ஆயிரம் வழங்கவும் மன்மோகன்சிங் உத்தரவிட்டு உள்ளார்.

இதேபோல், காங்கிரஸ் கட்சி தலைவர் சோனியா காந்தியும் இந்த சம்பவம் பற்றி அறிந்து மிகுந்த அதிர்ச்சியும், துயரமும் அடைந்ததாக காங்கிரஸ் கட்சி வெளியிட்டு உள்ள அறிக்கையில் தெரிவிக்கப்பட்டு உள்ளது. மேலும், விபத்தில் பலியானவர்களின் குடும்பத்தினருக்கு அவர் தனது ஆழ்ந்த இரங்கலையும், அனுதாபத்தையும் தெரிவித்து இருப்பதாகவும், சம்பவ இடத்துக்கு உடனடியாக அதிகாரிகள் விரைந்து சென்று நிவாரணப்பணிகளை மேற்கொள்ளுமாறு அவர் உத்தரவிட்டு இருப்பதாகவும் அந்த அறிக்கையில் தெரிவிக்கப்பட்டு உள்ளது.

பா.ஜனதா தலைவர் நிதின் கட்காரியும் இந்த துயர சம்பவத்துக்கு அனுதாபம் தெரிவித்து உள்ளார்.

கலெக்டர் விரைந்தார்

இந்த விபத்து பற்றிய தகவல் கிடத்ததும் மாவட்ட கலெக்டர் டி.செந்தில் பாண்டியன் உடனடியாக சம்பவ இடத்துக்குச் சென்று விசாரணை நடத்தினார். ஆஸ்பத்திரிக்கு சென்று அங்கு சிகிச்சை பெறுகிறவர்களை பார்த்து அவர் ஆறுதல் கூறினார். சம்பவம் குறித்து கூடுதல் கலெக்டர் ஜி.எஸ்.ரவாத் நீதி விசாரணை நடத்த உத்தரவிட்டு இருப்பதாகவும், அவரது அறிக்கை கிடைத்தவுடன் அடுத்த கட்ட நடவடிக்கை எடுக்கப்படும் என்றும் அவர் அங்கு நிருபர்களிடம் தெரிவித்தார்.

10-ந் தேதிக்குள் விழாக்குழுவினர் அந்த இடத்தை விட்டு காலி செய்ய வேண்டும் என்றும், அதற்குள் அனைத்து பக்தர்களையும் அவரவர் சொந்த இடங்களுக்கு அனுப்பி வைக்கும் வகையில் உடனடியாக அவர்களை அனுப்பும் பணிகளை தொடங்க வேண்டும் என்று உத்தரவிட்டு இருப்பதாகவும் அவர் கூறினார்.

விழாக் குழுவினர் புகார்

பல லட்சம் பக்தர்கள் கூடும் இந்த விழாவுக்கு போதிய பாதுகாப்பு ஏற்பாடுகளை மாநில அரசு செய்ய வில்லை என்று விழாக்குழுவினர் புகார் தெரிவித்து உள்ளனர்.

தினதந்தி