தங்கம் விலை ஒரேநாளில் பவுனுக்கு ரூ.496 உயர்ந்தது

**சிவா** · **சிவா** Wed Nov 09, 2011 9:45 am

ஐரோப்பிய நாடுகளில் உள்ள நிதிநிறுவனங்கள், வங்கிகள் தங்கத்தை அதிக அளவில் வாங்கி இருப்புவைப்பதால், தங்கத்தின் விலை ஒரேநாளில் பவுனுக்கு ரூ.496 உயர்ந்தது, ஒரு பவன் ரூ.22 ஆயிரத்தை நெருங்குகிறது.

தங்கம் விலை உயர்வு

அமெரிக்க டாலர் மதிப்பு மற்றும் பங்குசந்தை நிலவரம் ஆகியவற்றை பொறுத்து தங்கம் விலை ஏறுவதும், பின்னர் சற்று குறைவதுமாக இருந்து வருகிறது. இந்த நிலையில் தற்போது ஐரோப்பிய நாடுகளின் பொருளாதாரம் வீழ்ச்சி அடைந்து வருவதாலும் தங்கம் விலை மீண்டும் உயரத் தொடங்கியுள்ளது. நேற்று முன்தினம் ஒரு பவுன் தங்கம் ரூ.21,080-க்கு விற்பனையானது.

இந்த நிலையில் நேற்று ஒரு கிராமுக்கு ரூ.62-ம், பவுனுக்கு ரூ.496-ம் உயர்ந்து, ஒருபவுன் தங்கம் ரூ.21,576-க்கு விற்பனையானது. நேற்று ஒரேநாளில் பவுனுக்கு ரூ.496 உயர்ந்துள்ளது குறிப்பிடத்தக்கதாகும்.

தங்கம் விலை உயர்வு குறித்து சென்னை தங்கம் மற்றும் வைர நகை வியாபாரிகள் சங்க செயலாளர் சுல்தான் கூறியதாவது:-

ஐரோப்பிய நாடுகள் பொருளாதாரம்

பிரான்ஸ் நாட்டில் உள்ள கேன்சில் நகரில் ஜி.20 மாநாடு கடந்த சில நாட்களாக நடைபெற்றுவந்தது. இந்த மாநாட்டில் ஐரோப்பிய நாடுகளின் பொருளாதார வீழ்ச்சிக்கு முடிவு எடுக்கப்படும் என்று எதிர்பார்க்கப்பட்டது. ஆனால் மாநாட்டில் ஐரோப்பிய பொருளாதார வீழ்ச்சிக்கு எந்த முடிவும் எடுக்கப்படவில்லை. இதனால் தங்கம் விலை ஏறுமுகமாக உள்ளது. ஐரோப்பிய நாடுகளின் உள்ள நிதி நிறுவனங்கள், வங்கிகள் தங்க நகைகளை அதிக அளவில் வாங்கி இருப்பு வைத்து வருகிறார்கள். இது மட்டும் அல்லாமல் இந்தியாவில் உள்ள நிதிநிறுவனங்கள் மற்றும் வங்கிகளும் தங்கங்களை வாங்கி சேமித்து வருகிறார்கள். இதனால் தங்கத்திற்கு தட்டுப்பாடு ஏற்பட்டு விலை உயர்ந்து வருகிறது. திடீர் என்று பங்கு சந்தையின் பங்குகள் மதிப்பு, அமெரிக்க டாலர் மதிப்பு உயர்ந்தால் மட்டுமே தங்கத்தின் விலை சற்று குறைய வாய்ப்பு உள்ளது. இல்லாவிட்டால் இன்னும் ஒரு வாரத்திற்கு தங்கத்தின் விலை மேலும் உயரும் என்று எதிர்பார்க்கப்படுகிறது.

இவ்வாறு சுல்தான் கூறினார்.

தினதந்தி