சாக்கடை குழியில் விழுந்து ஆசிரியை பலி:

சென்னை, நவ. 6-

சென்னை எம்.ஜி.ஆர். நகரைச் சேர்ந்த ஆசிரியை சரளா. தி.நகர் வடக்கு உஸ்மான் ரோட்டில் உள்ள ஒரு மையத்தில் ஆங்கில பயிற்சி பெற்று வந்தார். நேற்று முன்தினம் மாலை பயிற்சி வகுப்புக்கு சென்ற இவர் பின்னர் வீடு திரும்ப வில்லை. மறுநாள் காலையில் அங்குள்ள சாக்கடை கால்வாயில் சரளா பிணமாக மிதந்தார்.

மகளை தேடி அப்பகுதி முழுவதும் அலைந்த சரளாவின் தாய், தான் மகளின் உடல் சாக்கடை குழிக்குள் கிடந்ததை முதலில் பார்த்துள்ளார். இதன்பிறகு பித்து பிடித்தவர்போல, அவர் சாக்கடைக்குழியை சுற்றி வந்துள்ளார். ஒரு கட்டத்தில் சாக்கடை குழியில் இறங்க முயன்ற வரை அங்கிருந்தவர்கள் தடுத்து நிறுத்தி காப்பாற்றி உள்ளனர்.

எதிர்கால கனவுகளுடன் வாழ்ந்து கொண்டிருந்த இளம் ஆசிரியையின் உயிர் அதிகாரிகளின் அலட்சியத்தால் பறிக்கப்பட்டுள்ளது. இச்சம்பவம் குறித்து பாண்டி பஜார் போலீசார் வழக்குப்பதிவு செய்துள்ளனர். 304ஏ ஐ.பி.சி. (கவனக்குறைவு மற்றும் அலட்சிய போக்கால் மரணம் ஏற்படுதல்) என்ற சட்டப்பிரிவின் கீழ் வழக்குப்பதிவு செய்துள்ளனர். ஆசிரியை சரளாவின் உயிரை பறித்த சாக்கடை குழியை சுற்றி தடுப்பு வேலிகள் அமைத்திருந்தால் உயிர்ப்பலி ஏற்படுவதை தடுத்திருக்கலாம் என்று பொதுமக்கள் குற்றம் சாட்டியுள்ளனர்.

பாதாள சாக்கடை கால்வாய் கட்டும் பணியை மேற்கொண்ட பொதுப் பணித்துறை அதிகாரிகளும், சாக்கடை கால்வாயை பராமரிக்கும் மாநகராட்சி அதிகாரிகளுமே இதற்கு பொறுப்பேற்க வேண்டும் என்பதே சமூக ஆர்வலர்களின் கோரிக்கையாக உள்ளது.

பாதாள சாக்கடை கட்டுமான பணியை மேற்கொண்ட காண்டிராக்டரே இதற்கு முழு பொறுப்பாகும் என்று போலீஸ் அதிகாரி ஒருவர் கூறினார். இது தொடர்பாக விசாரணை நடத்தப்பட்டு வருவதாகவும், விரைவில் அவர் கைது செய்யப்படுவார் என்றும் போலீஸ் தரப்பில் தெரிவிக்கப்பட்டது.

முழுமையாக முடிக்கப்படாத பாதாள சாக்கடை பணிகளை, மாநகராட்சி மற்றும் பொதுப்பணித்துறை அதிகாரிகள் கண்டறிந்து அதனை சுற்றி தடுப்பு வேலி அமைப்பதுடன் எச்சரிக்கை போர்டுகளையும் வைக்க வேண்டும். இதனை செய்ய தவறிய குற்றத்துக்காக சம்பந்தப்பட்ட துறை அதிகாரிகள் மீதும் நடவடிக்கை எடுக்க வேண்டும் என்ற கோரிக்கை வலுப்பெற்றுள்ளது. இது தொடர்பாக விசாரணை நடத்தப்பட்டு வருகிறது.

அலட்சிய போக்குடன் செயல்பட்ட அனைவர் மீதும் கைது நடவடிக்கை எடுக்கப்பட உள்ளது. சென்னையில் பாதாள சாக்கடை, மழைநீர் கால்வாய் ஆகியவற்றை அமைப்பதற்காக பெரும்பாலான இடங்களில் பணிகள் நடைபெற்று வருகிறது. இதற்காக தோண்டப்பட்ட பள்ளங்கள் எந்தவித பாதுகாப்புமின்றி திறந்தே கிடக்கிறது. அதனை சுற்றி தடுப்புவேலிகள் எதுவும் அமைக்கப்படாமலேயே உள்ளது. ஆசிரியை சரளா பலியான அதே பகுதியில் அருகில் உள்ள சாலையிலும் இதேபோல சாக்கடை கால்வாய் திறந்து கிடக்கிறது.

கொடுங்கையூர் ஆர்.வி. நகரில் இயங்கி வரும் சமையல் எண்ணை நிறுவனத்தின் அருகில் பாதாள சாக்கடை பணிக்காக தோண்டப்பட்ட பள்ளம் ஆபத்தை விளைவிக்கும் வகையில் பொதுமக்களை அச்சுறுத்திக் கொண்டிருக்கிறது. இதுபோன்ற பள்ளங்களை கணக்கெடுத்து உடனடியாக மூடுவதற்கு மாநகராட்சி நிர்வாகம் நடவடிக்கை மேற்கொண்டால் மட்டுமே உயிர் பலிகளை தடுக்க முடியும்.

மாலைமலர்