மாயாவதியை விமர்சித்த ஐ.பி.எஸ்., அதிகாரி மனநல மருத்துவமனையில் சேர்ப்பு

உ.பி., முதல்வர் மாயாவதியையும், மாநில அரசையும், கடுமையாக விமர்சித்த
ஐ.பி.எஸ்., அதிகாரி, வலுக்கட்டாயமாக, மனநல மருத்துவமனையில் சேர்க்கப்பட்ட
பரபரப்பான சம்பவம் நடந்துள்ளது.
உ.பி., மாநில தீயணைப்புத் துறையில், டி.ஐ.ஜி.,யாக பணிபுரிந்து வருபவர்
தேவேந்திர தத் மிஸ்ரா. இவர், ஓய்வு பெறுவதற்கு, இன்னும் இரண்டு ஆண்டுகள்
உள்ளன. இந்நிலையில், சமீபத்தில் பத்திரிகையாளர்கள் கூட்டத்தைக் கூட்டிய
மிஸ்ரா, உ.பி., மாநில அரசு மீதும், முதல்வர் மாயாவதி மீதும், கடுமையான
விமர்சனத்தை முன்வைத்தார்.

அவர் கூறியதாவது:நான் பார்த்ததிலேயே, மிக மோசமான ஊழல் அரசு,
மாயாவதி தலைமையிலான அரசு தான். உ.பி., மாநிலத்தில், அரசுத் துறைகளில் ஊழல்
அதிகரித்து விட்டது. மூத்த அதிகாரிகளே, ஊழலையும், லஞ்சத்தையும்
ஊக்குவிக்கின்றனர்.தீயணைப்புத் துறைக்கு, உபகரணங்கள் வாங்குவதற்காக
ஒதுக்கப்பட்ட நிதி, முறைகேடாகப் பயன்படுத்தப்படுகிறது. இது தொடர்பான தவறான
ஆவணங்களில் கையெழுத்திடும்படி, மூத்த அதிகாரிகளே என்னைக்
கட்டாயப்படுத்துகின்றனர். பொருட்கள் வாங்குவதற்கு, அதிகாரிகள் கமிஷன்
கேட்கின்றனர். இது தொடர்பான ஆவணங்களை வெளியிடவும் தயங்க மாட்டேன்.ஊழலை
அம்பலப்படுத்துவதால், என் உயிருக்கு ஆபத்து ஏற்பட்டுள்ளது. முதல்வர்
மாயாவதியால் எனக்கு ஆபத்து உள்ளது. இதற்காக நான் பயப்பட மாட்டேன். ஊழலுக்கு
எதிராக, காந்திய வழியில் தொடர்ந்து போராடுவேன்.இவ்வாறு, மிஸ்ரா கூறினார்.

இதைத் தொடர்ந்து, போலீஸ் அதிகாரிகளால், வலுக்கட்டாயமாக அழைத்துச்
செல்லப்பட்ட மிஸ்ரா, லக்னோவில் உள்ள மன நல மருத்துவமனையில், சிகிச்சைக்காக
அனுமதிக்கப்பட்டார்.

இதுகுறித்து, உ.பி., மாநில முதன்மைச் செயலர் தீபக் குமார் கூறுகையில்,
"மிஸ்ராவை பரிசோதித்த டாக்டர், அவருக்கு மன நல பாதிப்பு ஏற்பட்டுள்ளதாகக்
கூறினார்.அவரின் ஆலோசனைப்படி, மருத்துவமனையில், மிஸ்ரா
அனுமதிக்கப்பட்டுள்ளார். கடந்த ஒரு மாத காலமாகவே, அவருக்கு மன ரீதியான
பாதிப்புகள் இருந்ததாகவும், தற்போது தெரிய வந்துள்ளது' என்றார்.

மாநில அரசு செய்தி தொடர்பாளர் கூறுகையில், ""தன் புகார் என்ன
என்பதை, மீடியாக்களிடம் தெரிவிப்பதற்குப் பதிலாக, சம்பந்தபட்ட
அதிகாரிகளிடம், மிஸ்ரா தெரிவித்திருக்க வேண்டும். மிஸ்ராவின் இந்த
நடவடிக்கை ஏற்கத்தக்கது அல்ல. இருந்தாலும், அவர் கூறிய புகார் குறித்து
விசாரிக்கப்படும்'' என்றார்.



தினமலர்

மீடியாவைக்கூட்டினால் பைத்தியம் தான்..

ஆளும் கட்சியை எதிர்த்தா பைதியம்தான்