கமல்ஹாசன் பிறந்தநாள்! ரசிகர்கள் உடல் உறுப்பு தானம்!!

ரேவதி · ரேவதி Sat Nov 05, 2011 5:01 am

கமல்ஹாசன் பிறந்தநாளையொட்டி,
7-ந் தேதி சென்னையில், ரசிகர்கள் ரத்த தானம் மற்றும் உடல் உறுப்புகள் தானம்
செய்கிறார்கள். இதுதொடர்பாக அகில இந்திய கமல்ஹாசன் நற்பணி இயக்கம்
சார்பில் அதன் மாநில பொறுப்பாளர் ஆர்.தங்கவேல் வெளியிட்டுள்ள அறிக்கையில்
கூறியிருப்பதாவது: வருகிற 7ம்தேதி நற்பணி இயக்க தலைவர் கமல்ஹாசனின் பிறந்த
நாள். இதையொட்டி தமிழகத்தின் அனைத்து மாவட்டங்களிலும் ரத்த தானம் மற்றும்
நல உதவிகள் வழங்கும் நிகழ்ச்சிகள் நடைபெற உள்ளது. மேலும் நவம்பர் 6 மற்றும்
7ம்தேதிகளில், சென்னையில் கமல்ஹாசன் நற்பணி இயக்கம் சார்பில் நடைபெறும்
நிகழ்ச்சிகள் பற்றிய விவரமும் வெளியிடப்பட்டுள்ளது.

அதன்படி,
6ம்தேதி காலை 8 மணிக்கு காக்கும் கரங்கள் முதியோர் இல்லத்துக்கு ரூ.10
ஆயிரம் மதிப்புள்ள மருந்து பொருட்கள் மற்றும் 100 பேருக்கு வேட்டி-சேலைகள்
வழங்கப்படுகிறது. காலை 9 மணிக்கு சேத்துப்பட்டு பகுதி நற்பணி இயக்கத்தின்
சார்பில், சென்னை மாநகராட்சி பள்ளியில், கீழ்ப்பாக்கம் அரசு
மருத்துவமனைக்கு 100 ரசிகர்கள் ரத்த தானம் செய்கிறார்கள். காலை 10 மணிக்கு
ராயபுரம் அரசு மருத்துவமனைக்கு 25 கல்லூரி மாணவ-மாணவிகள், 100 ரசிகர்கள்
பங்குகொள்ளும் ரத்ததான நிகழ்ச்சி மற்றும் 7 ரசிகர்கள், உடல் உறுப்புகள் தான
பத்திரம் வழங்குகிறார்கள். 11 மணிக்கு பெரம்பூரில், குழந்தைகள்
காப்பகத்துக்கு பீரோ, மளிகை பொருட்கள், சீருடை மற்றும் உணவு
வழங்கப்படுகிறது. இந்த நிகழ்ச்சியில், நடிகர் `மகாநதி சங்கர் கலந்து
கொள்கிறார். மதியம் 2 மணிக்கு ஆழ்வார்பேட்டையில் ரத்த தானம் மற்றும்
எச்.ஐ.வி.யால் பாதிக்கப்பட்ட குழந்தைகளுக்கு உணவு மற்றும் நோட்டு
புத்தகங்கள் வழங்கப்படுகிறது. மாலை 6 மணிக்கு சென்னை பழைய பெருங்களத்தூர்
புதிய கிளை இயக்கம் திறப்பு விழா மற்றும் தாம்பரம் அனாதை இல்லத்துக்கு உணவு
வழங்குதல்.

7ம்தேதி காலை 9 மணிக்கு திருவள்ளுவர் கிழக்கு மாவட்ட
இயக்கம் சார்பில் 50 ஆட்டோ டிரைவர்களுக்கு சீருடை, 50 பெண்களுக்கு சேலைகள்
மற்றும் மகாலட்சுமி ஆசிரமத்துக்கு ஒரு மாதத்துக்கான உணவு பொருட்கள்
வழங்குதல். மாலை 6 மணிக்கு பாரிமுனை ராஜா அண்ணாமலை அரங்கத்தில்,
மாணவர்களுக்கு கல்வி உதவி தொகை, தையல் எந்திரம், 58 பேருக்கு வேட்டி-சேலை
வழங்கப்படுகிறது.

இவ்வாறு அந்த அறிக்கையில் கூறப்பட்டுள்ளது.

நன்றி தினமலர்