பெட்ரோல் விலை லிட்டருக்கு ரூ.1.82 கூடுது : எண்ணெய் நிறுவனங்கள் அரசுக்கு பரிந்துரை

புதுடில்லி : சர்வதேச சந்தையில் கச்சா எண்ணெய் விலை அதிகரித்துள்ளதாலும், ரூபாயின் மதிப்பு குறைந்து வருவதாலும், பெட்ரோல் விலையை லிட்டருக்கு ரூ.1.82 வரை உயர்த்த வேண்டும் என, பொதுத்துறை எண்ணெய் நிறுவனங்கள், அரசுக்கு பரிந்துரை செய்துள்ளன. இதையடுத்து, இன்னும் இரண்டு வாரத்திற்குள் பெட்ரோல் விலை மீண்டும் உயர்த்தப்பட உள்ளது.

சர்வதேச சந்தை நிலவரத்திற்கு ஏற்ப பெட்ரோல் விலையை நிர்ணயிக்கும் உரிமையை, கடந்த ஆண்டு ஜூன் மாதம், எண்ணெய் நிறுவனங்களுக்கு மத்திய அரசு அளித்தது.சர்வதேச சந்தையில் கச்சா எண்ணெய் விலைக்கு ஏற்ப, எண்ணெய் நிறுவனங்கள் உள்நாட்டில் விலையை உயர்த்தி வருகின்றன. விலையை உயர்த்திக் கொள்ளும் அதிகாரத்தை எண்ணெய் நிறுவனங்களுக்கு கொடுத்த பிறகு, 10 முறை பெட்ரோல் விலை உயர்த்தப்பட்டு விட்டது. கடந்த ஜனவரி மாதம் 3.50 ரூபாயும், மே மாதம் 5 ரூபாயும், கடந்த மாதம் 3.14 ரூபாய் என, பெட்ரோலின் விலை உயர்த்தப்பட்டது. இதன் மூலம், ஒரு லிட்டர் பெட்ரோல் விலை 70 ரூபாயை தாண்டிவிட்டது.ஒரு பீப்பாய் கச்சா எண்ணெய் விலை, 5,300 ரூபாயாக உள்ளது. டாலருக்கு எதிரான ரூபாயின் மதிப்பு 49 ரூபாயாக உள்ளது. இதனால், இறக்குமதி செய்யும் கச்சா எண்ணெய்க்கு கூடுதல் விலை கொடுக்க வேண்டியுள்ளது. இதன் காரணமாக, தற்போதைய நிலையில் ஒரு லிட்டர் பெட்ரோலுக்கு 1.50 ரூபாய் அளவுக்கு எண்ணெய் நிறுவனங்களுக்கு இழப்பு ஏற்படுகிறது. உள்ளூர் வரி உள்ளிட்டவற்றை ஈடுசெய்ய ஒரு லிட்டர் பெட்ரோல் விலையை 1.82 ரூபாய் அதிகரிக்க வேண்டும் என, இந்தியன் ஆயில், இந்துஸ்தான் பெட்ரோலியம், பாரத் பெட்ரோலியம் போன்ற எண்ணெய் நிறுவனங்கள், மத்திய அரசை வற்புறுத்தியுள்ளன. விலை உயர்வு பற்றிய அறிவிப்பை அமல்படுத்துவதற்கு முன்பாக, பொதுத் துறை எண்ணெய் நிறுவனங்கள், அரசுக்கு பரிந்துரை செய்வதை சம்பிரதாயமாகக் கொண்டுள்ளன.

இது குறித்து இந்துஸ்தான் பெட்ரோலிய நிறுவன நிதி இயக்குனர் பி.முகர்ஜி குறிப்பிடுகையில், "விலையை உயர்த்தும் படி அரசிடம் கோரியுள்ளோம். இது தொடர்பான பேச்சு வார்த்தை நடந்து வருகிறது. எனவே, எப்போது விலை உயர்த்தப்படும் என்பதை கூறமுடியாது' என்றார்.

டாலருக்கு எதிராக ரூபாய் மதிப்பு ஒரு ரூபாய் குறையும் போது எண்ணெய் நிறுவனங்களுக்கு, 9 ஆயிரம் கோடி ரூபாய் இழப்பு ஏற்படுவதாக அதிகாரிகள் கூறுகின்றனர். எனவே, இந்த இழப்பை சரிக்கட்ட இரண்டு வார காலத்தில், அதாவது பார்லிமென்ட் குளிர்கால கூட்டத்தொடருக்கு முன்னதாகவே பெட்ரோல் விலையை உயர்த்தி அறிவிக்கும்படி எண்ணெய் நிறுவனங்கள், அரசை நிர்பந்தப்படுத்தியுள்ளன. பார்லிமென்ட் கூட்டம் துவங்கிவிட்டால், எதிர்க்கட்சிகளின் எதிர்ப்பை சம்பாதிக்க வேண்டியிருக்கும் என்பதால், அதற்கு முன்பாக அரசு இசைவு தெரிவிக்க வேண்டிய கட்டாயம் ஏற்பட்டுள்ளது.

இழப்பு விவரம்: பெட்ரோலுக்கு மட்டுமே விலை நிர்ணயம் செய்யும் உரிமை, அரசு கட்டுப்பாட்டிலிருந்து எண்ணெய் நிறுவனங்களுக்கு சென்றுள்ளது. டீசல், மண்ணெண்ணெய், சமையல் எரிவாயு ஆகியவற்றின் விலை நிர்ணயம் அரசு கட்டுப்பாட்டில் தான் உள்ளது. இதனால், எண்ணெய் நிறுவனங்களுக்கு ஒரு நாளைக்கு 300 கோடி ரூபாய் வரை இழப்பு ஏற்படுவதாக கூறப்படுகிறது. டீசல், மண்ணெண்ணெய், சமையல் எரிவாயு ஆகியவை மானிய விலையில் வழங்கப்படுவதால், ஒரு லிட்டர் டீசலுக்கு 9.27 ரூபாயும், மண்ணெண்ணெய்க்கு 26.94 ரூபாயும், சமையல் எரிவாயு சிலிண்டர் ஒன்றுக்கு 260.50 ரூபாயும் இழப்பு ஏற்படுவதாக இந்த நிறுவனங்கள் தெரிவிக்கின்றன. இவற்றின் விலையை உயர்த்துவது பற்றி, நிதிஅமைச்சர் பிரணாப் தலைமையிலான அதிகாரமிக்க அமைச்சர்கள் குழு கூடிதான் முடிவு செய்யும்.

விரைவில், உ.பி., உட்பட சில மாநிலங்களுக்கு சட்டசபை தேர்தல் வரவுள்ள நிலையில், அதை காரணம் காட்டி இவற்றின் விலை உயர்வை தள்ளிப்போட வாய்ப்பு இருக்கிறது. இருப்பினும், பெட்ரோல் விலை உயர்வு தவிர்க்க முடியாது என்பதால், இன்னும் இரண்டு வாரத்திற்குள் அறிவிப்பு வெளியாகும்.

ஏற்கனவே விக்கிற விலை வாசில மக்கள் விழி பிதுங்கி போய் எந்த செலவை குறைப்பது என்று தெரியாமல் இருக்கிறார்கள்.இதில் பெட்ரோல் விலை ஏற்றமும் சேர்ந்துடுச்சா. போச்சு இனிமே பஸ் டிக்கெட்ல ஆரம்பிச்சு காய் கரி வரைக்கும் எல்லாம் விலை ஏறிடுமே