திருச்செந்தூர் கோவிலில் சூரசம்ஹாரம், லட்சக்கணக்கான பக்தர்கள் தரிசனம்

திருச்செந்தூர் சுப்பிரமணிய சுவாமி கோவிலில் நேற்று சூரசம்ஹாரம் நடந்தது. இதில் லட்சக்கணக்கான பக்தர்கள் கலந்து கொண்டு தரிசனம் செய்தனர்.

கந்த சஷ்டி திருவிழா

முருகப்பெருமானின் 2-வது படை வீடாக கருதப்படும் திருச்சீரலைவாய் என்று அழைக்கப்படும் திருச்செந்தூரில், முருகக்கடவுள் சுப்பிரமணிய சுவாமியாக அருள் பாலிக்கிறார். சூரபத்மனை வென்று தேவர்களை காத்த இந்த திருத்தலத்தில் ஆண்டு தோறும் கந்தசஷ்டி திருவிழா வெகு விமரிசையாக நடைபெறும்

இந்த ஆண்டு கந்தசஷ்டி விழா கடந்த 26-ந்தேதி யாக சாலை பூஜையுடன் தொடங்கியது. அன்று முதல் தொடர்ந்து 5 நாட்கள் காலை மற்றும் மாலை யாக சாலை பூஜைகள் நடந்தன. தினமும் சுவாமி ஜெயந்திநாதர், வள்ளி, தெய்வானை அம்பாளுடன் தங்க சப்பரத்தில் சண்முக விசால மண்டபத்துக்கு எழுந்தருளி பக்தர்களுக்கு காட்சி அளித்தார். தொடர்ந்து சுவாமிக்கும், அம்பாள்களுக்கும் பல்வேறு அபிஷேகங்கள் நடைபெற்றன.

சஷ்டி விழாவின் 6-ம் நாளான நேற்று அதிகாலை 1 மணிக்கு கோவில் நடை திறக்கப்பட்டது. 1.30 மணிக்கு விஸ்வரூப தீபாராதனை, 2 மணிக்கு உதய மார்த்தாண்ட அபிஷேகம், 9 மணிக்கு உச்சிகால அபிஷேகம், உச்சிகால தீபாராதனை ஆகியன நடைபெற்றது.


மாலை 3 மணிக்கு ஆனந்தவல்லி அம்பாள் சமேத சிவக்கொழுந்தீவரர் கோவிலில் இருந்து சூரபத்மன் தனது படைகளுடன் நகரின் முக்கிய வீதிகள் வழியாக வலம் வந்து கோவில் கடற்கரைக்கு வந்து சேர்ந்தான். சுவாமி ஜெயந்திநாதர் மலர் மாலைகள் அணிந்து அலங்காரத்துடன் கையில் வேல் ஏந்தி, ஆணவத்தின் மொத்த உருவமான சூரபத்மனை வதம் செய்ய மாலை 4.35 மணிக்கு கடற்கரை நோக்கி புறப்பட்டார்.

கடற்கரையில் நடந்த நிகழ்ச்சியில் 5.50 மணிக்கு சூரபத்மனை சம்ஹாரம் செய்தார். அப்போது வானத்தில் கருடன் சுற்றி வந்தது. கடற்கரையில் கூடியிருந்த பக்தர்கள் அரோகரா கோஷம் விண்ணை பிளந்தது.

லட்சக்கணக்கான பக்தர்கள்

சூரசம்ஹாரம் நடந்த பின்னர் பக்தர்கள் கடலில் புனித நீராடி பல மணி நேரம் வரிசையில் காத்து நின்று சுவாமி தரிசனம் செய்தனர். விழாவுக்கு தமிழகத்தின் பல்வேறு பகுதிகளில் இருந்தும், வெளி மாநிலம், வெளிநாடுகளில் இருந்தும் லட்சக்கணக்கான பக்தர்கள் வந்து இருந்தனர்.

மேடை சரிந்தது

சூரசம்ஹார நிகழ்ச்சியை காண அமைச்சர் மற்றும் முக்கிய பிரமுகர்களுக்காக தனியாக மேடை அமைக்கப்பட்டு இருந்தது. அதில் ஏராளமானோர் அமர்ந்து இருந்ததால், அந்த மேடை சரிந்துவிட்டது. இதில் மேடைக்கு அருகில் நின்ற ஒரு பெண்ணுக்கு லேசான காயம் ஏற்பட்டது.

தினதந்தி

பகிர்வுக்கு நன்றி தல