அணுசக்தி ஒத்துழைப்பு: ஜப்பானுடன் இந்தியா பேச்சு

டோக்கியோ, அக்.29: அணுசக்தியை ஆக்கபூர்வமான பணிகளில் பயன்படுத்தவது தொடர்பாக ஜப்பானுடன் இந்தியா பேச்சுவார்த்தையைத் தொடங்கியுள்ளது. அணுசக்தி ஒத்துழைப்பு, வர்த்தகம் உள்ளிட்ட பல்வேறு விஷயங்களில் இரு நாடுகளும் ஒருங்கிணைந்து செயல்படுவது தொடர்பாக ஜப்பானுடன் பேச்சு நடத்த மத்திய வெளியுறவு அமைச்சர் எஸ்.எம். கிருஷ்ணா டோக்கியோ சென்றுள்ளார்.

அங்கு ஜப்பான் வெளியுறவு அமைச்சர் கோசிரோ கெம்பாவுடன் அவர் பேச்சு நடத்த உள்ளார். பேச்சுவார்த்தைக்கு முன்பாக செய்தியாளர்களிடம் பேசிய கிருஷ்ணா, இரு நாடுகளும் ஒருங்கிணைந்து செயல்படுவதன் மூலம் பரஸ்பரம் பலன் கிடைக்கும். மொத்தம் 3 சுற்று பேச்சு நடத்த முடிவு செய்யப்ட்டுள்ளது. இந்த பேச்சு வார்த்தையில் பல்வேறு விஷயங்கள் விவாதிக்கப்பட உள்ளன என்றார் கிருஷ்ணா.

நல்லெண்ன நடவடிக்கையாக 7 இந்திய நிறுவனங்கள் மீது விதிக்கப்பட்டிருந்த தடையை ஜப்பான் நீக்கியுள்ளது என்று குறிப்பிட்ட கிருஷ்ணா, இதன் மூலம் இந்நிறுவனங்கள் எதிர்பார்த்த பலனை எட்டும். 7 நிறுவனங்களில் இந்தியன் ரேர் எர்த் லிமிடெட் நிறுவனமும் ஒன்றாகும். இந்த தடை விலக்கல் மூலம் இந்திய, ஜப்பானிய நிறுவனங்களிடையே ஒத்துழைப்பு அதிகரிப்பதற்கான வாய்ப்பு பிரகாசமடைந்துள்ளது.

இந்தியாவில் மெட்ரோ ரயில் திட்டம் நிறைவேற்றப்படுவதில் ஜப்பானின் ஒத்துழைப்பு மிகவும் குறிப்பிடத்தக்கது. அடுத்தகட்டமாக புல்லட் ரயில் தொழில்நுட்பத்தை அளிக்கவும் ஜப்பான் தயாராக இருப்பதாக ஜப்பானிய வெளியுறவு அமைச்சர் கெம்பா குறிப்பிட்டார். இது தொடர்பாக ஜப்பானிய நிறுவனங்கள் இந்திய அரசு அல்லது இத்திட்டத்தை நிறைவேற்ற முன்வரும் நிறுவனங்களுடன் ஒப்பந்தம் செய்து கொள்ளத் தயாராக உள்ளது என்றார்.

புல்லட் ரயில் திட்டத்தை தில்லி, ஆக்ரா, பெங்களூர், சென்னை மார்க்கங்களிலும், பெங்களூர்-ஹைதராபாத் இடையிலும் செயல்படுத்துவதற்கான வாய்ப்புகள் உள்ளன. பிரத்யேக விரைவு சரக்கு ரயில் சேவை மற்றும் புல்லட் ரயில் வழித்தடம் ஆகியன இந்தியாவுக்கு ஜப்பான் அளிக்க உள்ள உடனடி ஒத்துழைப்பு திட்டங்களாகும் என்று அவர் குறிப்பிட்டார்.

இரு நாடுகளும் கடல் பகுதி பாதுகாப்பை வலுப்படுத்த வேண்டியது மிகவும் அவசியம் என்று குறிப்பிட்ட கெம்பா, இது தொடர்பாக விரிவாக பேச உள்ளதாகக் கூறினார். ஜப்பானில் கடந்த மார்ச் 11-ம் தேதி ஏற்பட்ட பூகம்பம் மற்றும் அதைத் தொடர்ந்த சுனாமி பாதிப்புகளுக்கு நிவாரணமாக எத்தகைய உதவியையும் அளிக்க இந்தியா தயாராக இருப்பதாக குறிப்பிட்டதாகவும் கிருஷ்ணா கூறினார்.

2012-ம் ஆண்டில் இந்தியா, ஜப்பான் இடையிலான தூதரக உறவு தொடங்கி 60 ஆண்டுகளாகிறது. இதை விரிவாகவும், விமரிசையாகவும், ஆக்கபூர்வமாகவும் கொண்டாடுவது குறித்து இரு தலைவர்களும் ஆலோசனை நடத்தினர். இரு நாட்டு கடற்படையும் இணைந்து செயல்படுவது தொடர்பாக அடுத்த சில நாள்களில் பாதுகாப்பு அமைச்சர் ஏ.கே. அந்தோனி முடிவு செய்வார் என்று கிருஷ்ணா குறிப்பிட்டார்.

இந்தியா, அமெரிக்கா, ஜப்பான் ஆகிய மூன்று நாடுகளிடையிலான பேச்சுவார்த்தைக்கும் ஜப்பான் சம்மதம் தெரிவித்ததாக அவர் கூறினார். இரு நாடுகளிடையிலான பொருளாதார ஒருங்கிணைந்த ஒப்பந்தம் காரணமாக இந்தியாவில் ஜப்பானின் முதலீடு அதிகரித்துள்ளது. இது அடுத்து வரும் ஆண்டுகளில் மேலும் அதிகரிக்கும் என்று கிருஷ்ணா நம்பிக்கை தெரிவித்தார். தினமணி