காதலிக்க மறுத்ததால் 2 மாணவிகள் கொலை: கத்தியால் குத்தி கழுத்தை அறுத்த கொடூரம்

**இளமாறன்** · **இளமாறன்** Sun Oct 30, 2011 2:04 pm

நகரி, அக். 30-

ஆந்திர மாநிலம் வாரங்கல் மாவட்டம் மல்லிடுகுதிர் கிராமத்தைச் சேர்ந்தவர் சுவாதி (வயது24) என்ஜினீயரிங் கல்லூரியில் 4-ம் ஆண்டு படித்து வந்தார். இவரை அதே பகுதியைச் சேர்ந்த வாலிபர் நஜீர் காதலித்தார். ஆனால் அவரது காதலை சுவாதி ஏற்கவில்லை. தன்னை காதலிக்கும்படி பலமுறை வற்புறுத்தியும் சுவாதி மறுத்து விட்டார்.

நேற்று மாலை சுவாதி தனது தோழியுடன் அனுமகொண்டா என்ற இடத்தில் நடந்து சென்று கொண்டு இருந்தார். அப்போது நஜீர் அவரை வழிமறித்தார். தன் காதலை ஏற்றுக்கொள்ளும்படி வற்புறுத்தினார். சுவாதி மறுக்கவே ஆத்திரம் கொண்ட நஜீர் கத்தியால் அவரை குத்தி கழுத்தை அறுத்தார். அதன் பிறகும் ஆத்திரம் தீராமல் வயிற்றில் 10 இடங்களில் சரமாரியாக குத்தினார். உடன் சென்ற தோழி அதிர்ச்சி அடைந்தார். அக்கம் பக்கத்தினர் உதவியுடன் சுவாதியை ஆஸ்பத்திரியில் சேர்த்தனர். ஆனால் அவர் பரிதாபமாக இறந்தார்.

தோழி கொடுத்த தகவலின் பேரில் போலீசார் வாலிபர் நஜீரை கைது செய்து விசாரணை நடத்தி வருகிறார்கள்.

இதேபோல் நிஜமாபாத் மாவட்டத்தில் காதலிக்க மறுத்த மாணவி கொலை செய்யப்பட்டார். அவரது பெயர் ரபியா (17) பிளஸ்-2 படித்து வந்தார். பிச்சுகுண்டு என்ற இடத்தில் வாடகை வீட்டில் பெற்றோருடன் வசித்து வந்தார். வீட்டு உரிமையாளரின் மகன் லட்சுமணன் (22) ரபியாவை காதலித்தார். ஆனால் தனது படிப்பு பாதிக்கப்படும் என்பதால் ரபியா காதலிக்க மறுத்து விட்டார்.

நேற்று வீட்டில் ரபியா தனியாக இருந்தார். லட்சுமணன் வீட்டிலும் அவரது பெற்றோர்கள் இல்லை. இதனால் லட்சுமணன் ரபியாவை தனது படுக்கை அறைக்கு அழைத்து வந்தார். காதலை ஏற்றுக்கொள்ளும்படி வற்புறுத்தினார். ஆனால் ரபியா மறுக்கவே அங்கிருந்த உலக்கையால் அவரது தலையில் அடித்தார். மண்டை பிளந்த நிலையில் ரபியா அதே இடத்தில் சாய்ந்தார்.

அதன் பிறகும் ஆத்திரம் தீராத லட்சுமணன் பிளேடால் அவள் உடல் முழுக்க கிழித்தார். பின்னர் தனது உடலையும் பிளேடால் கிழித்து தற்கொலைக்கு முயன்றார். ரத்த வெள்ளத்தில் கிடந்த அவர்களை பெற்றோர்கள் ஆஸ்பத்திரியில் சேர்த்தனர். ஆனால் ரபியா இறந்து போனார். லட்சுமணன் உயிருக்கு ஆபத்தான நிலையில் சிகிச்சை பெற்று வருகிறார். இது குறித்து போலீசார் விசாரணை நடத்தி வருகிறார்கள்.

மாலைமலர்

ARR · ARR Sun Oct 30, 2011 2:13 pm

இவர்களுக்குத் தரப்படும் தண்டனை, அடுத்து வருவோர்க்கு பயத்தைத் தருமாறு இருத்தல் வேண்டும்.. ஆனால் அது நடக்குமா..?

இப்பவே, எத்தன கருப்புக்கோட்டு வக்காலத்து வாங்கக் கிளம்பியிருக்கோ..?