கல்விக்கான பிரித்தானியா விசாவில் புதிய வங்கிக் கணக்கு முறை அறிமுகம்

கல்விக்கான பிரித்தானியா விசாவில் புதிய வங்கிக் கணக்கு முறை அறிமுகம்
[ வியாழக்கிழமை, 27 ஒக்ரோபர் 2011, 10:05.27 AM GMT +05:30 ]
இந்திய மாணவர்களுக்கான பிரித்தானியா விசாவில் வங்கிக்கணக்கு முறையை பிரத்தானியா அரசு மாற்றியுள்ளது.

இந்தியாவில் இருந்து ஆண்டுதோறும் ஆயிரக்கணக்கான மாணவர்கள் பிரித்தானியாவிற்க்கு உயர்கல்வி படிக்கச் செல்கின்றனர். பிரித்தானியாவில் படிப்புச்செலவு, தங்கும் செலவு என அனைத்திற்கும் சேர்த்து மாணவர்களிடம் நிதி இருக்க வேண்டும் என்பது பிரித்தானியாவின் மாணவர் விசா விதிகளில் ஒன்று.

அதன்படி மாணவர்கள் தங்கள் விசா விண்ணப்பத்துடன் எவ்வளவு வைப்புத் தொகை வைத்திருக்கிறோம் என்பதற்கான வங்கியின் கணக்கு அறிக்கையையும் சேர்த்து சமர்ப்பிக்க வேண்டும். இதுவரை இந்தியாவில் உள்ள எந்த ஒரு வங்கியில் மாணவர் சேமிப்பு கணக்கு வைத்திருந்து, அந்த வங்கி கணக்கு அறிக்கையை சமர்ப்பித்தால், அதை பிரித்தானியா அரசு ஏற்றுக் கொள்ளும்.

ஆனால் தற்பொழுது பிரித்தானியா உள்துறை அமைச்சகம் வெளியிட்டுள்ள அறிக்கையில், இந்தியாவில் உள்ள 1,900 வங்கிகளின் கணக்கு அறிக்கை, ஏற்றுக் கொள்ளப்பட மாட்டாது. இந்த வங்கிகள் அனைத்தும் கூட்டுறவு வங்கிகள். அவை இந்தியாவின் பல மாநிலங்களில் செயல்பட்டு வருபவை என தெரிவிக்கப்பட்டுள்ளது.

அந்த அறிக்கையில் மேலும் கூறப்பட்டுள்ளதாவது, மாணவர்களின் விசா விண்ணப்பங்களை பரிசீலிக்கும் போது அவர்களின் வங்கி கணக்கு அறிக்கையை பரிசோதிப்பதற்காக சம்பந்தப்பட்ட கூட்டுறவு வங்கிகளைத் தொடர்பு கொண்டால், அங்கிருந்து சரியான பதில் வருவதில்லை அல்லது தொடர்பே கொள்ள முடிவதில்லை அல்லது எந்த பதிலும் தெரிவிப்பதில்லை.

பிரித்தானியா குடியேற்ற சட்டப்படி ஒரு வங்கி தொடர்ந்து இதுபோன்ற சரியான பதிலை அளிக்கவில்லையெனில், அதன் கணக்கு அறிக்கையை நாங்கள் ஏற்றுக் கொள்ள வேண்டிய அவசியமில்லை.

எனவே கூட்டுறவு வங்கிகளுக்குப் பதிலாக, இந்தியாவில் உள்ள தேசியமயமாக்கப்பட்ட மற்றும் சர்வதேச வங்கிகள் 85 வங்கிகளில் மாணவர்கள் சேமிப்பு கணக்கு வைத்திருந்து, அதன் அறிக்கையை விசா விண்ணப்பத்துடன் அனுப்பினால் ஏற்றுக் கொள்ளப்படும்.

தகுதி வாய்ந்த 85 வங்கிகளின் பட்டியலிலும் மேலும் சில மாற்றங்கள் விரைவில் மேற்கொள்ளப்படும் என்கிறது பிரித்தானியா அரசு. மேலும் இந்த புதிய விதிமுறை நவம்பர் 24ம் திகதி முதல் நடைமுறைக்கு வருகிறது என தெரிவிக்கப்பட்டுள்ளது.

முன்னதாக பாகிஸ்தான் மற்றும் பிலிப்பைன்ஸ் நாடுகளின் வங்கிகளின் கருப்புப் பட்டியலையும் பிரித்தானிய அரசு வெளியிட்டது குறிப்பிடத்தக்கது

newindianews