6.9 ரிக்டர் அளவில் பெருநாட்டில் நிலநடுக்கம்: கட்டிடங்கள் இடிந்தன

**இளமாறன்** · **இளமாறன்** Sat 29 Oct 2011 - 13:39

லிமா, அக்.29-

பெருநாட்டில் 6.9 ரிக்டர் அளவில் நிலநடுக்கம் ஏற்பட்டது. இதனால் கட்டிடங்கள் இடிந்தன. தென் அமெரிக்கா கண்டத்தில் உள்ள பெருநாட்டில் நேற்று திடீரென நிலநடுக்கம் ஏற்பட்டது. பசிபிக் கடல் பகுதியில் ஏற்பட்ட நிலநடுக்கத்தால் தலைநகர் லிமா மற்றும் அதை சுற்றியுள்ள பல நகரங்கள் குலுங்கின. இதனால் பீதி அடைந்த மக்கள் வீடுகளை விட்டு வெளியேறினர்.

தெருக்களில் தஞ்சம் புகுந்தனர். நில நடுக்கம் சில வினாடிகள் தொடர்ந்தது. இதனால் லிமா, இகா ஆகிய நகரங்களில் கட்டிடங்கள் இடிந்தன. மின்சாரம் மற்றும் டெலிபோன் இணைப்பு துண்டிக்கப்பட்டது. எனவே, ஆயிரக்கணக்கான மக்கள் தங்கள் வீடுகளை விட்டு வெளியேறி பாதுகாப்பான இடங்களில் தங்கினர். கட்டிடங்கள் இடிந்ததில் 3 பேர் காயம் அடைந்தனர். அவர்கள் ஆஸ்பத்திரியில் அனுமதிக்கப்பட்டு சிகிச்சை பெற்று வருகின்றனர்.

இதற்கிடையே 6.9 ரிக்டர் அளவில் நிலநடுக்கம் பதிவாகி உள்ளதாக அமெரிக்க புவியியல் ஆய்வு மையம் தெரிவித்துள்ளது. லிமா நகரின் தென்கிழக்கே 35 கி.மீட்டர் தூரத்தில் இது ஏற்பட்டுள்ளது. இந்த நிலநடுக்கம் லிமா, இகா தவிர கல்கோ, அரிகுபா, அயாகுகோ உள்ளிட்ட பல நகரங்களிலும் உணரப்பட்டது.

கடலில் உயரமான அலைகள் எழும்பின. எனவே, சுனாமி ஏற்படும் என பொதுமக்கள் அச்சத்தில் இருந்தனர். ஆனால் சுனாமி எச்சரிக்கை எதுவும் விடப்படவில்லை. நில நடுக்கம் காரணமாக ஏற்பட்ட சேத விவரங்கள் எதுவும் வெளியிடப்படவில்லை.

பெருநாட்டில் கடந்த 2007-ம் ஆண்டு இகா மாகாணத்தில் 7.9 ரிக்டர் அளவில், நிலநடுக்கம் ஏற்பட்டது. அதில் 600 பேர் பலியாகினர். ஏராளமான கட்டிடங்கள் இடிந்து தரைமட்டமாகின. பசிபிக் பிராந்தியத்தில் உள்ள பெருநாடு பூகம்ப அபாயத்தில் உள்ளது. கடந்த 2009-ம் ஆண்டு முதல் இதுவரை இங்கு 140 தடவை லேகான நிலநடுக்கம் ஏற்பட்டுள்ளது.

மாலைமலர்