மரபணு மாற்றம் செய்யப்பட்ட அரிசி சோதனை

"மரபணு மாற்றம் செய்யப்பட்ட அரிசி சோதனை: நிபுணர்களின் கருத்துக்காக காத்திருக்கிறோம்'

First Published : 28 Oct 2011 12:57:01 AM IST


கொல்கத்தா, அக்.27: மரபணு மாற்றம் செய்யப்பட்ட அரிசியை சோதனை செய்வது தொடர்பாக நிபுணர்களின் கருத்துக்காக காத்திருப்பதாக மேற்கு வங்க சுற்றுச்சூழல் துறை அமைச்சர் கோஷ் தஸ்திதார் தெரிவித்துள்ளார்.

இதுகுறித்து அவர் மேலும் கூறியது: மரபணு மாற்றம் செய்யப்பட்ட அரிசி சோதனை தொடர்பாக அமைக்கப்பட்ட 3 நபர் குழு வரும் 30-ம் தேதி அறிக்கையை தாக்கல் செய்யவுள்ளது. அதன்பிறகே இந்த விவகாரத்தில் இறுதி முடிவு எடுக்கப்படும். இந்த அரிசி தொடர்பான சோதனை கொல்கத்தாவில் உள்ள சின்சுரா அரிசி ஆராய்ச்சி நிலையத்தில் நடைபெறுவதாக இருந்தது. பின்னர் நிறுத்தப்பட்டது.

இந்த சோதனையை தனியான இடத்தில் நடத்த வேண்டும். மற்ற விவசாய நிலங்களில் இருந்து 300 மீ. தொலைவில் சோதனை நடத்தும் பகுதி இருக்க வேண்டும். பல்வேறு பன்னாட்டு நிறுவனங்கள் மரபணு மாற்றம் செய்யப்பட்ட விதைப் பண்ணைகளை தங்களின் கட்டுப்பாட்டில் வைத்துள்ளன. அதனால் அவற்றை இங்கு கொண்டு வருவதற்காக தீவிர முயற்சி மேற்கொண்டுள்ளன.

இதுபோன்ற மரபணு மாற்றம் செய்யப்பட்ட பயிர்களின் சோதனை உணவுப் பாதுகாப்புக்கு அழிவை ஏற்படுத்தும். இங்குள்ள விதைப் பண்ணைகளையும் பன்னாட்டு நிறுவனங்களின் கட்டுப்பாட்டுக்குள் கொண்டு செல்லும் என்று தெரிவித்தார்.

"மரபணு மாற்றம் செய்யப்பட்ட அரிசி வகைகள் இந்திய பல்லுயிர்ப்பெருக்க முறைகளுக்கு அச்சுறுத்தலாகவும், மற்ற விதைகளுக்கு பாதிப்பு ஏற்படுத்துவதாகவும் அமையும். மேலும் உணவுப் பாதுகாப்புக்கு இடையூறு ஏற்படுத்தும்' என்று விவசாய நிபுணர்கள் கவலை தெரிவித்துள்ளனர்.

அதிகளவில் இரும்புச்சத்து கொண்ட இந்த மரபணு மாற்றம் செய்யப்பட்ட அரிசி "ஒரைஸா சட்டைவா எல்' என்ற பெயரில் சோதனை செய்யப்படவுள்ளது.

இந்த சோதனையை மேற்கொள்வதற்காக கொல்கத்தா பல்கலைக்கழகம், மரபணு பொறியியல் மதிப்பீடு கமிட்டியிடம் கடந்த ஆண்டு நவம்பரில் அனுமதி பெற்றது.

இதற்கு அனுமதியளித்த மரபணு பொறியியல் மதிப்பீடு கமிட்டி, மரபணு மாசு ஏற்படுவதை தவிர்க்கும் வகையில் மற்ற பயிர்கள் விவசாயம் செய்யப்பட்டுள்ள இடத்தில் இருந்து 200 மீ தொலைவில் உள்ள பகுதியில்தான் சோதனை நடத்த வேண்டும் என்று கூறியது.

முன்னதாக மரபணு மாற்றம் செய்யப்பட்ட கத்தரிக்காய் சோதனை, உணவுப் பாதுகாப்பை கருத்தில் கொண்டு கைவிடப்பட்டது. பல்வேறு பகுதிகளில் உள்ள விவசாயிகளிடம் இருந்தும் அதற்கு கடும் எதிர்ப்பு ஏற்பட்டது.

தினமணி