வரி கட்டாமல் மாயமானவர்கள்: கண்டுபிடிக்க அரசு புதிய திட்டம்

புதுடில்லி:இதுவரை வசூலிக்கப்படாமல் இருக்கும் 1 லட்சம் கோடி ரூபாய் வருமான வரி பாக்கியை வசூலிக்க, சிறப்புப் பிரிவு ஒன்றை வருமான வரித்துறை அமைத்துள்ளது. இதன் மூலம் வரி பாக்கி செலுத்தாமல் மாயமாகி விட்டவர்களை கண்டுபிடிப்பது அல்லது வரி பாக்கி வைத்திருப்போருக்கு, அவற்றை செலுத்தும் அளவுக்கு போதுமான சொத்துகள் உள்ளதா என்பதை கண்டறிந்து அதற்கேற்ற வகையில் நடவடிக்கை எடுப்பது போன்ற பணிகள் மேற்கொள்ளப்படும்.

இந்த ஆண்டு ஜூன் மாதத்தில், மத்திய நேர்முக வரிகள் வாரியம், வருமான வரித்துறை டைரக்டர் ஜெனரல் (நிர்வாகம்) தலைமையில் கமிட்டி ஒன்றை அமைத்தது. வருமான வரி தொடர்பாக நிலுவையில் உள்ள வழக்குகளை ஆய்வு செய்யவும், வருமான வரி செலுத்தாமல் ஏமாற்றுவோரை கண்டு பிடிக்கவும் இந்த கமிட்டி அமைக்கப்பட்டது.கறுப்புப் பணத்தை மீட்க மத்திய அரசு மேற்கொண்ட நடவடிக்கைகளின் ஒரு பகுதியாக, இந்த கமிட்டி அமைக்கப்பட்டது. இந்த கமிட்டியில் வருமான வரித்துறையின் விசாரணை மற்றும் புலனாய்வுப் பிரிவைச் சேர்ந்த உயர் அதிகாரிகள் பலர் இடம் பெற்றனர். இந்த கமிட்டி மேற்கொண்ட ஆய்வில், 1 லட்சத்து, ஆயிரத்து 836 கோடி ரூபாய் அளவுக்கு வருமான வரி பாக்கி நிலுவையில் உள்ளது கண்டறியப்பட்டுள்ளது.

இதையடுத்து, 1 லட்சம் கோடி ரூபாய்க்கு மேல் நிலுவையில் உள்ள இந்த வருமான வரி பாக்கிகளை வசூலிப்பதற்காக, சிறப்பு பிரிவு ஒன்றை தற்போது வருமான வரித்துறை அமைத்துள்ளது. இந்தப் பிரிவினர், வருமான வரி பாக்கி செலுத்தாமல் தலைமறைவானவர்கள் எங்குள்ளனர் அல்லது வரி செலுத்தாமல் ஏமாற்றுவோருக்கு, வரிகளைச் செலுத்தும் அளவுக்கு போதுமான சொத்துகள் உள்ளதா என்பதை கண்டறிந்து அதற்கேற்ற வகையில் நடவடிக்கை எடுக்கும்.வரி செலுத்தாமல் ஏமாற்றுவோரை கண்டுபிடிக்க, கம்பெனிகளின் பதிவாளர் மற்றும் நிதி உளவுப் பிரிவினரை அணுகுவது, வங்கிகள் முதல் உள்ளூர் போலீஸ் நிலையங்களை தொடர்பு கொண்டு பேசி விவரம் சேகரிப்பது, நகராட்சி நிர்வாகத்தினரை அணுகுவது, இன்பார்மர்கள் மூலம் தகவல் பெறுவது போன்ற வழிகளை கடைபிடிக்கவும், இந்த சிறப்புப் பிரிவினர் தீர்மானித்துள்ளனர்.

தலைநகர் டில்லியில் செயல்படும் இந்தச் சிறப்புப் பிரிவுக்கு, நாடு முழுவதும் உள்ள வருமான வரித்துறை ஆணையர்களும், அவ்வப்போது தகவல்கள் அனுப்ப வேண்டும் என்றும் தெரிவிக்கப்பட்டுள்ளது. இதன் மூலம் வருமான வரி பாக்கிகளை பெருமளவில் வசூலிக்கத் திட்டமிட்டுள்ளதோடு, இனி யாரும் செலுத்தாமல் ஏமாற்றாமல் தடுக்கவும் நடவடிக்கை எடுக்கப்பட்டுள்ளது.

இதற்கிடையில், 10 கோடி ரூபாய்க்கு மேல் வரி செலுத்தாமல் ஏமாற்றுவோரின் பெயர்களை பகிரங்கமாக வெளியிட, சமீபத்தில் வருமான வரித்துறையினர் முடிவு செய்தனர். அதற்கு முன்னதாக, சம்பந்தப்பட்ட நபர்களுக்கு விளக்கம் கேட்டு நோட்டீஸ் அனுப்ப தீர்மானிக்கப்பட்டுள்ளது. அதற்கு அந்த நபர்கள் இந்த மாத இறுதிக்குள் பதில் அளிக்க வேண்டும். இல்லையெனில், அவர்களின் பெயர்கள் பகிரங்கமாக வெளியிடப்படும்.

தினமலர்

நடக்கட்டும் நடக்கட்டும்