பைனலில் தேவ்வர்மன்!: சென்னை ஓபனில் சாதனை

சென்னை: சென்னை ஓபன் டென்னிஸ் பைனலுக்கு முன்னேறிய முதலாவது இந்திய வீரர் என்ற சாதனை படைத்தார் இந்தியாவின் சோம்தேவ் தேவ்வர்மன். அரையிறுதியில் காயம் காரணமாக ஜெர்மனி வீரர் ரெய்னர் ஷட்லர் விலகியதால் இவருக்கு அதிர்ஷ்டம் அடித்தது. இன்று நடக்கும் பைனலில் சோம்தேவ், மரின் சிலிச் மோதுகின்றனர். இதில் சாம்பியன் பட்டம் வென்று சோம்தேவ் சாதிப்பார் என எதிர்பார்க்கப்படுகிறது. உலகின் முன்னணி வீரர்கள் பங்கேற்கும் ஏ.டி.பி., அந்தஸ்து பெற்ற "சென்னை ஓபன் டென்னிஸ்' தொடர் சென்னையில் நடக்கிறது. இம்முறை ஒற்றையர் பிரிவில் இளம் சோம்தேவ் தேவ்வர்மன் சூப்பர் ஆட்டத்தை வெளிப்படுத்தி வருகிறார். இரண்டாவது சுற்றில் உலகின் முன்னாள் "நம்பர்-1' வீரரான கார்லோஸ் மோயாவை வென்றார்.

வாய்ப்பு நழுவியது: காலிறுதியில் குரோஷியாவின் இவோ கார்லோவிச்சை வீழ்த்தி இன்னொரு அதிர்ச்சி அளித்தார்.ஷட்லர் சோகம்:நேற்றைய அரையிறுதியில் சோம்தேவ், ஜெர்மனியின் ரெய்னர் ஷட்லரை எதிர்த்து விளையாட இருந்தார். ஆனால் மணிக்கட்டு காயம் காரணமாக ஷட்லர் விலக, பைனலுக்கு எவ்வித சிரமும் இல்லாமல் சோம்தேவ் முன்னேறினார். இதன் மூலம் சென்னை ஓபன் பைனலுக்கு முன்னேறும் முதலாவது இந்திய வீரர் என்ற பெருமை பெற்றார். முன்னதாக 1998ல் பயஸ் அரையிறுதி வரை விளையாடியது தான் இந்திய வீரரின் சிறப்பான செயல்பாடு. வாய்ப்பு நழுவியது குறித்து ஷட்லர் கூறுகையில்,""மணிக்கட்டு பகுதியில் அதிகமாக வலி ஏற்பட்டது. காயத்தின் தன்மை அதிகரித்து விடக் கூடாது என்பதற்காகவே விலகினேன். தொடரின் பாதியில் வெளியேறியது மிகுந்த ஏமாற்றம் அளித்தது,'' என்றார். சோம்தேவ் கூறுகையில்,""ஷட்லருடன் அரையிறுதியில் விளையாட முடியாதது எனக்கு ஏமாற்றம் அளித்தது. இன்றைய பைனல் கடுமையாக இருக்கும். மரின் சிலிச் மிகச் சிறந்த வீரர்,''என்றார்.


மற்றொரு அரையிறுதியில் குரோஷிய வீரர் மரின் சிலிச், ஸ்பெயினின் மார்சல் கிரானலர்ஸ் மோதினர். இதில் அபார ஆட்டத்தை வெளிப்படுத்திய சிலிச் 6-4, 6-3 என்ற செட் கணக்கில் எளிதாக வென்று பைனலுக்கு தகுதி பெற்றார்.

எழுச்சி நாயகன்:சென்னை ஓபனில் ஒவ்வொரு முறையும் யாராவது ஒரு வீரர் சூப்பர் ஸ்டாராக எழுச்சி காண்பர். இம்முறை இளம் சோம்தேவ் தேவ்வர்மன் நட்சத்திர வீரராக உருவெடுத்துள்ளார். அசாமில் உள்ள கவுகாத்தியில் பிறந்த சோம்தேவ் தேவ்வர்மன் சென்னை மற்றும் அமெரிக்காவில் வசித்து வருகிறார். தற்போது 23 வயதான இவர் உலக ரேங்கிங் பட்டியலில் 202 வது இடத்தில் உள்ளார். சென்னை ஓபனில் "வைல்டு கார்டு' முறையில் வாய்ப்பு பெற்ற இவர் மகத்தான எழுச்சி கண்டார். முன்னணி வீரர்களை எல்லாம் எளிதாக வீழ்த்தி அசத்தினார்.


அரையிறுதியில் இவரது ஆட்டத்தை காண நேற்று ஏராளமான ரசிகர்கள் திரண்டிருந்தனர். ஆனால் ஷட்லர் விலகியதால், சோம்தேவ் நேரடியாக பைனலுக்கு முன்னேறினார். ஏ.டி.பி., அந்தஸ்து பெற்ற தொடரின் பைனலுக்கு முதன் முறையாக முன்னேறியுள்ள சோம்தேவ், சாம்பியன் பட்டம் வென்று சாதிக்க காத்திருக்கிறார்.