மிஸ் ஆசியா பசிபிக் அழகிப் போட்டி: இந்திய அழகி தான்விசிங்லா 4-வது இடம்

மும்பை, அக் 21-

மிஸ் ஆசியா பசிபிக் வேர்ல்டு-2011 அழகிப் போட்டி கொரியாவில் நடந்தது. இதில் 57 நாடுகளைச் சேர்ந்த அழகிகள் கலந்து கொண்டனர். இந்தியாவில் இருந்து தான்வி சிங்லா (வயது 19) என்ற மும்பை அழகி பங்கேற்றார். இறுதிச் சுற்றுக்கு முந்தைய போட்டியில், பிரான்ஸ், கொரியா, ரஷியா மற்றும் இந்தோனேஷியா அழகிகளிடம் தான்வி தோல்வி அடைந்தார். எனினும் இவருக்கு 4-வது இடம் கிடைத்தது.

இதுபற்றி தான்வி கூறியதாவது:-

கொரியாவில் நடந்த அழகிப் போட்டியில் கலந்து கொள்வதற்காக, ஒருமாதம் நன்கு பயிற்சி எடுத்துக் கொண்டேன். அதன் பிறகே மும்பையில் இருந்து கொரியாவுக்கு கிளம்பினேன். என்னுடன் 57 நாடுகளைச் சேர்ந்த அழகிகள் போட்டியில் கலந்து கொண்டனர். போட்டி மிகவும் கடுமையாக இருந்தது. கொரியா அழகிக்கு சொந்த மண் என்ற அம்சம் சாதகமாக அமைந்தது.

போட்டியில் பங்கேற்ற அழகிகளுக்கு அந்தந்த நாட்டின் ஆதரவு இருந்தது. ஆனால் எனக்கு மட்டுமே சொந்த நாட்டின் ஆதரவு கிடைக்கவில்லை. சொந்த முயற்சியில் சென்று நான்காவது இடத்தை பிடித்தேன். எனக்கு சிறிய அளவில் ஆதரவு கிடைத்திருக்குமானால், அழகி பட்டத்தை வென்றிருப்பேன். மிஸ் யுனிவர்ஸ் போட்டியில் இந்தியா சார்பில் பங்கேற்றவர்களில் கடைசியாக கடந்த 2000-ம் ஆண்டில் லாரா தத்தா இந்த பட்டத்தை கைப்பற்றினார். அதன் பிகு இந்திய அழகிகள் யாரும் இந்த பட்டத்தை பெறவில்லை.

கொரியாவில் நடந்த போட்டியில் பங்கேற்றதன் மூலம், எனக்கு புதிய துணிச்சல் வந்துள்ளது. இனிவரும் போட்டிகளில் தயக்கம் இன்றி பங்கேற்பேன்.

இவ்வாறு அவர் கூறினார்.

மாலைமலர்