லஞ்சம் கேட்கின்றனரா? புகார் கொடுக்க "ஹெல்ப்லைன்'

by **இளமாறன்** Sat Oct 22, 2011 1:00 am

புதுடில்லி: அரசுத் துறையில் பணியாற்றும் அதிகாரிகள், தங்களது பணிகளைச் செய்வதற்கு லஞ்சம் கேட்டால், அதுகுறித்து புகார் செய்வதற்காக, மத்திய லஞ்ச ஒழிப்பு கண்காணிப்பு ஆணையத்தால், இலவச "ஹெல்ப்லைன்' அமைக்கப்படவுள்ளது. பாதிக்கப்பட்டவர்கள், 1964 என்ற எண்ணை அழைத்து, தங்கள் புகார்களை பதிவு செய்யலாம். இந்த திட்டம் விரைவில் அமல்படுத்தப்பட உள்ளது. மத்திய லஞ்ச ஒழிப்பு கண்காணிப்பு ஆணைய வட்டாரங்கள் கூறியதாவது: அரசுத் துறையில் லஞ்சம் மற்றும் ஊழலை ஒழிப்பதற்காக பல்வேறு நடவடிக்கைகள் எடுக்கப்பட்டு வருகின்றன. இதன் ஒரு பகுதியாக, அரசுத் துறையில் பணியாற்றுவோர், தங்களது கடமையைச் செய்வதற்கு, பொது மக்களிடம் லஞ்சம் கேட்டால், அதுகுறித்து புகார் செய்வதற்காக இலவச "ஹெல்ப்லைன்' அமைக்க திட்டமிடப்பட்டுள் ளது. பாதிக்கப்பட்ட மக்கள், 1964 என்ற எண்ணை அழைத்து, தங்கள் புகார்களை பதிவு செய்யலாம்.
மத்திய அமைச்சரவை அலுவலகங்கள், மத்திய அரசுத் துறை அலுவலகங்கள், பொதுத் துறை நிறுவனங்கள் உள்ளிட்டவற்றில் பணியாற்றுவோரால் பாதிக்கப்படும் பொதுமக்கள், இந்த ஹெல்ப்லைனை தொடர்பு கொண்டு புகார் தெரிவிக்கலாம். மத்திய லஞ்ச ஒழிப்பு கண்காணிப்பு ஆணையம், கடந்த 1964ல் ஏற்படுத்தப்பட்டது. இதை நினைவுபடுத்தும் வகையிலேயே, ஹெல்ப்லைனுக்கு இந்த எண் கொடுக்கப்பட்டுள்ளது. இத்திட்டத்தை அமல்படுத்துவதற்கான தொழில்நுட்பப் பணிகள் இன்னும் முடிவடையவில்லை. இந்த பணிகள் முடிவடைந்ததும், இந்த ஹெல்ப்லைன் செயல்படத் துவங்கும். இந்த ஹெல்ப்லைன், 24 மணி நேரமும் செயல்படும். இது தவிர, ஊழல் மற்றும் லஞ்சத்துக்கு எதிரான நடவடிக்கைகளை மேற்கொள்வதற்காக, "கால் சென்டர்' ஒன்றும் விரைவில் அமைக்கப்படவுள்ளது. இவ்வாறு லஞ்ச ஒழிப்பு கண்காணிப்பு ஆணைய வட்டாரங்கள் தெரிவித்தன.

தினமலர்