நூற்றாண்டு கண்ட சிலுவைப் பாதைச் சித்திரங்கள்

by **சிவா** Mon Dec 22, 2008 3:19 am

குமரி மாவட்டம் புத்தன்துறை கடற்கரைக் கிராமத்தில் 1700-ம் ஆண்டு உருவானது புனித ஜெபமாலை அன்னை ஆலயம்.

1902-ம் ஆண்டு கொல்லம் ஆயர் அலாய்சியஸ் மரிய பென்சிகர் என்பாரால் அர்ச்சிக்கப்பட்ட முதல் ஆலயம் இது.

இவ்வாலயத்துக்கு ஐரோப்பாவிலிருந்து 14 சிலுவைப் பாதைச் சித்திரங்களை வாங்கி வந்து பரிசளித்தார் ஆயர்.

102 ஆண்டுகளுக்குப் பிறகும் இந்த சிலுவைப் பாதைச் சித்திரங்கள் சிதிலமடையாமல் பாதுகாக்கப்பட்டு வருகின்றன.

இயேசு நாதருக்கு எதிராகத் தீர்ப்பு வழங்கப்பட்டு, அவரது தோளில் சிலுவை சுமத்தப்பட்டது. அதை அவர் சுமந்துகொண்டு சென்று கல்வாரி மலை மீது ஏறுகிறார். அங்கே அவர் அச் சிலுவையில் அறையப்படுகிறார். பின்னர் அவரது விலாவில் ஈட்டியால் குத்தப்படுகிறார். அவர் மரித்த பிறகு, அவரது புனித உடல் இறக்கப்பட்டு அடக்கம் செய்யப்படுகிறது. இச் சம்பவங்கள் அனைத்தும் 14 நிலைப்பாடுகளாகப் பிரிக்கப்பட்டுள்ளன. அவற்றைச் சித்திரிப்பதுதான் சிலுவைப் பாதைச் சித்திரங்கள். ஒவ்வொரு நிலைப்பாடாகத் தியானித்து, பிரார்த்தனை செய்வது சிலுவைப் பாதை வழிபாடாகும்.

அனைத்து தேவாலயங்களிலும் இயேசுவின் சிலுவைப் பாதைச் சித்திரங்கள் அல்லது சொரூபங்கள் நிறுவப்பட்டிருப்பதைக் காணலாம். எனினும் இந்த ஆலயத்தில் உள்ள சித்திரங்கள் தனிச் சிறப்பு வாய்ந்தவை.
இவ்வூரின் பழைய ஆலயம் சிதிலமடைந்துவிட்டது. அதனால், பழைய பாரம்பரியத் தோற்றம் மாறாமல் புதிய ஆலயத்தை ரூ. 1 கோடி செலவில் மக்கள் கட்டி எழுப்பியுள்ளனர்.

by **சிவா** Mon Dec 22, 2008 3:20 am

கிறிஸ்தவர்களின் வழிபாட்டில் முக்கிய இடம்பெற்ற மற்றொன்று ஜெபமாலை. இது 53 மணிகளைக் கொண்டது. இதன் தத்துவத்தைப் பிரதிபலிக்கும் வகையில், புத்தன்துறையில் புதியதாகக் கட்டப்பட்டுள்ள தேவாலயம் 53 அடி அகலமும், 53 அடி உயரமும் கொண்டதாக அமைக்கப்பட்டுள்ளது. ஆலயத்தின் நீளம் 153 அடி. இது இவ்வாலயத்தின் தனிச் சிறப்பு.

இவ்வாலயத்தில் உள்ள மாதா சொரூபம், கடல் அலையால் கரையில் ஒதுங்கியதாகக் கூறப்படுகிறது. அந்தச் சொரூபம் இன்றும் போற்றிப் பாதுகாக்கப்படுகிறது.

1922-ல் ஜெரேமியாஸ் டி குரூஸ் என்ற பங்குப் பணியாளர் காலத்தில் இக் கிராமத்தில் கொள்ளை நோய் பரவியது. இதில் 125-க்கு மேற்பட்டவர்கள் பலியாயினர்.

அதையடுத்து ஊர்மக்கள் கொல்லம் சென்று ஆயர் பென்சிகரிடம் முறையிட்டனர். இரவோடு இரவாக புத்தன்துறைக்கு வந்த ஆயர், அந் நோய் நீங்க ஜெபித்து அர்ச்சித்தார். அன்றிலிருந்து அக் கொள்ளை நோய் ஒழிந்தது. அதனால் ஆயர் பென்சிகர் மீது இங்குள்ள மக்கள் மிகுந்த பாசம் கொண்டனர்.
ஆயர் பென்சிகர் இறந்த பிறகு அவரது உடல் திருவனந்தபுரம் பாங்கோடு கார்மல் மடத்தில் அடக்கம் செய்யப்பட்டது.

ஆயர் இறந்த ஆகஸ்ட் 17-ம் தேதி, அவரது நினைவைப் போற்றும் வகையில், ஆண்டுதோறும் இவ்வூர் மக்கள் அவரது கல்லறைக்குச் சென்று திருப்பலி நிறைவேற்றி பிரார்த்தனை செய்கின்றனர்.

நூற்றாண்டு கண்ட சிலுவைப் பாதைச் சித்திரங்கள்

நூற்றாண்டு கண்ட சிலுவைப் பாதைச் சித்திரங்கள்

Re: நூற்றாண்டு கண்ட சிலுவைப் பாதைச் சித்திரங்கள்