100 கோடி அபராதம் - நான் அவனில்லை....

கடந்த 2008 ஆம் ஆண்டு கோர்ட் ஊழியர்களின் பிராவிடண்ட் பணத்தை நீதிபதிகள் கையாடல் செய்துவிட்ட ஒரு ஊழலை "டைம்ஸ் நவ்' என்ற டி.வி. சேனல் அம்பலப்படுத்திக் கலக்கியது. அப்போது சம்பந்தப்பட்ட நீதிபதிகளில் ஒருவராகத் தவறுதலாக முன்னாள் உச்சநீதிமன்ற நீதிபதி பி.பி. சாவந்த்தின் படத்தை 15 வினாடிகள் ஒளிபரப்பி விட்டது. கோபமடைந்த அவர் சேனலை அணுக, தவறை ஒப்புக்கொண்டு நேயர்களிடமும் மன்னிப்பு கேட்டது டைம்ஸ் நவ்.

திருப்தி அடையாத நீதிபதி, புனே கோர்ட்டில் வழக்கு தொடுக்க, அந்த மாவட்ட நீதிபதி அளித்த தீர்ப்பு, 100 கோடி அபராதம். அதிர்ந்து போன சேனல், மும்பை உயர் நீதி மன்றத்தை அணுகியது. அங்கே சொல்லப்பட்ட தீர்ப்பு, 20 கோடி பணத்தையும் மீதி 80 கோடிக்கு வங்கியின் கியாரண்டியையும் டெபாஸிட் செய்து விட்டு அப்பீல் செய்யுங்கள் என்பதுதான். இதை ஏற்காத சேனல் சுப்ரீம் கோர்ட்டுக்குப் போனபோது அவர்கள் உயர் நீதிமன்றம் சொன்னதைச் செய்யுங்கள் என உத்தரவிட்டிருக்கிறது.

மீடியாவுக்கு எதிரான மான நஷ்ட வழக்கில் இவ்வளவு பெரிய அளவில் அபராதம் விதித்திருப்பது உலகிலேயே இதுவே முதல்முறை. நாட்டின் பெரிய பத்திரிகைகளின் ஆசிரியர்கள், மீடியா குழுமங்களின் தலைவர்கள் இதைக் கண்டித்திருக்கிறார்கள். டி.வி. செய்தி சேனல்கள் சமூக பொறுப்பின்றி இயங்குகின்றன. சுய கட்டுப்பாடுகளை மேற்கொள்ள வேண்டும் என சேனல்களைச் சாடிக் கொண்டிருக்கும், பிரஸ் கவுன்ஸிலின் தலைவராகத் தேர்ந்தெடுக்கப்பட்டிருக்கும் முன்னாள் உச்ச நீதிமன்ற நீதிபதி கூட, இது தவறான தீர்ப்பு, அபராதத்தின் அளவு மிக அதிகம், என சொல்லியிருக்கிறார்.

இவ்வளவு பெரிய அபராதத்தை விதிப்பதன் மூலம், மீடியாவின் குரல்வளை நசுக்கப்படுகிறது என்று அலறல் கிளம்பியுள்ளது. "நேரமின்மை', "பிரஷர்', "அவசரம்' என்று ஆயிரம் காரணங்கள் அடுக்கப்படுகின்றன. சட்டம் விழித்துக் கொண்டால், என்ன அபாயம் நேரும் என்பதை இப்போது 24 மணி நேர அதிரடி சேனல்கள் புரிந்து கொண்டிருக்கும்!

- ரமணன்.

//தவறுதலாக முன்னாள் உச்சநீதிமன்ற நீதிபதி பி.பி. சாவந்த்தின் படத்தை 15 வினாடிகள் ஒளிபரப்பி விட்டது//
அபராதம் மிக அதிகம் ...பழிவாங்க கிடைத்த ஒரு வாய்ப்பாக இதை நீதிமன்றம் பயன்படுத்துகிறதோ

100 கோடி அதிகம்

100 கோடி அதிகம் தான்