இந்தியாவின் கல்லறைக் கோயில்

இந்தியாவில் உள்ள பழைமையான கிறிஸ்தவ தேவாலயங்களில் பல, சுமார் 500 ஆண்டுகளுக்குமுன் கட்டப்பட்டவையாக இருந்தாலும்கூட, ஈராயிரம் ஆண்டுகளுக்கு முன்னரே கிறிஸ்தவ மதம் இந்தியாவுக்கு வந்துவிட்டது. முதன்முதலாக கிறிஸ்துவின் போதனைகளை இந்தியாவில் போதித்தவர், அவரது நேரடிச் சீடரான புனித தோமையார். கேரளத்தின் மலபார் கடற்கரை நகரான கிரேங்கனூருக்கு கி.பி. 52-ல் தோமையார் வந்தார் என்பது கிறிஸ்தவ வரலாற்றறிஞர்களின் கருத்து.

அவர் கேரளத்திலிருந்து தென்கடற்கரையோரமாக கிறிஸ்துவின் போதனைகளை மக்களுக்குப் போதித்தவாறு, சென்னை வரை வந்துள்ளார். சென்னையில் மயிலாப்பூரில் தனது கிறிஸ்தவ மறைபரப்புப் பணிகளைத் தொடர்ந்துள்ளார்.
அப்போது மயிலையை ஆண்டுவந்த ராஜா மகாதேவனின் அன்பைப் பெற்றார் தோமையார். கிறிஸ்தவ மத போதனையைச் செய்துகொள்ள அவருக்கு அந்த மன்னன் அனுமதி அளித்தான். அவரது போதனைகளைக் கேட்க மக்கள் திரண்டனர். மக்கள் மத்தியில் அவருக்கு ஆதரவு பெருகியது. மன்னனின் அனுமதியுடன் மயிலைப் பகுதியில் ஒரு தேவாலயத்தை அமைத்து அங்கு வழிபட்டுவந்தார் தோமையார்.

மக்களிடம் அவருக்கு மதிப்பு அதிகரித்துவருவதைக் கண்ட மன்னனின் அமைச்சர்கள், தோமையாரைத் தீர்த்துக்கட்டிவிடத் திட்டமிட்டனர்.
சின்னமலைக் குகையில் மறைந்திருந்த அவர், அருகில் உள்ள பெரிய மலையில் (இப்போதைய புனித தாமஸ் மலை) தனிமையில் பிரார்த்தனை செய்வதுடன் ஓய்வெடுப்பது வழக்கம். அவ்வாறு பிரார்த்தனை செய்துகொண்டிருந்தபோது கி.பி. 72-ல் அவர் குத்திக் கொல்லப்பட்டார். அங்கு அவர் இருப்பதை அறிந்த அவரது எதிரிகள் மறைந்திருந்து அவரை ஈட்டியால் குத்திக் கொன்றனர்.

அவரது புனித உடல், மயிலாப்பூரில் அவர் கட்டியிருந்த தேவாலயத்திலேயே அடக்கம் செய்யப்பட்டது. அவர் உடலிலிருந்த ஈட்டியின் முனையும் அவரது ரத்தம் தோய்ந்த மண்ணும்கூட அவருடன் சேர்த்து அடக்கம் செய்யப்பட்டன. ஆனால், அக் கல்லறையிலிருந்து புனிதப் பொருள்கள், பின்னர் தோண்டி எடுக்கப்பட்டு ஆசியா மைனர் பகுதியில் உள்ள எடஸ்ஸô-வுக்குக் கொண்டுசெல்லப்பட்டன. பின் அங்கிருந்து இத்தாலியில் உள்ள ஒர்தானா நகருக்குக் கொண்டு செல்லப்பட்டுவிட்டன. இப்போதும் அவற்றை அங்கே காணலாம்.

மயிலாப்பூரில் தோமையார் கட்டிய தேவாலயம் நாளடைவில் சிதிலமடைந்தது. ஆனால், கி.பி. 1500-களில் இந்தியாவுக்கு வந்த போர்த்துகீசியர்கள், ஏற்கெனவே தோமையார் கட்டியிருந்த தேவாலயம் இருந்த இடத்தில் புதிதாக ஓர் ஆலயத்தை எழுப்பினர். அப்போது அங்கிருந்த கல்லறையையும் புதுப்பித்தனர்.

கடற்காற்றால் பாதிக்கப்பட்டு அந்த ஆலயமும் சிதிலமடைந்ததால், 1896-ல், தற்போது காட்சி தரும் பெரிய ஆலயம் எழுப்பப்பட்டுள்ளது. அப்போது மீண்டும் அக் கல்லறை புதுப்பிக்கப்பட்டது. ஆனாலும் பக்தர்கள் அப் புனிதரின் கல்லறையைத் தரிசிப்பதற்கு இடவசதி குறைவாக இருந்தது.
தற்போதைய ஆலயத்தைப் புதுப்பிக்கும் பணி கடந்த (2003) ஆண்டு தொடங்கியது. அப்போது, புனித தோமையார் கல்லறையும் புதுப்பிக்கப்பட்டது. அதோடு, கல்லறைச் சிற்றாலயமும் கோயிலின் கீழ்ப் பகுதியில் ""சுரங்கக் கோயிலாக'' எழிலுறக் கட்டப்பட்டுள்ளது. 2004, ஜூலை 3-ம் நாள் புனித தோமையார் திருவிழா நாளில், (மறைந்த) சென்னை~மயிலை பேராயர் அருள்தாஸ் ஜேம்ஸ் அதைப் புனிதப்படுத்தினார்.