வேட்பாளர்கள் தேர்தல் செலவை அரசு ஏற்கலாமா?சட்ட அமைச்சகத்திற்கு அமைச்சர்கள் குழு உத்தரவு

புதுடில்லி : வேட்பாளர்களின் தேர்தல் செலவுகளை அரசே ஏற்கும் திட்டம் தொடர்பாக, ஆக்கப்பூர்வமான யோசனைகளைத் தெரிவிக்கும்படி, மத்திய சட்ட அமைச்சகத்தை நிதியமைச்சர் பிரணாப் முகர்ஜி தலைமையிலான குழு கேட்டுக் கொண்டுள்ளது.

லோக்சபா மற்றும் சட்டசபை தேர்தல்களில் போட்டியிடும் வேட்பாளர்களின் தேர்தல் செலவுகளை அரசே ஏற்கும் திட்டம் தொடர்பாக, நீண்ட நாட்களாக விவாதிக்கப்பட்டு வருகிறது. இந்த யோசனைக்கு காங்கிரஸ் பொதுச் செயலர் ராகுலும் ஆதரவு தெரிவித்துள்ளார். இருந்தாலும், இந்த விஷயத்தில் ஒருமித்த கருத்து எட்டப்படவில்லை.

இந்த யோசனைக்கு, தேர்தல் கமிஷன் ஏற்கனவே எதிர்ப்புத் தெரிவித்துள்ளது. "தேர்தல் செலவுகளை அரசு ஏற்றால், சட்டப்பூர்வமான செலவுகளை மட்டுமே கொடுக்க முடியும். ஆனால், தேர்தலின் போது, பல்வேறு வகையிலும் கோடிக்கணக்கான பணம் செலவிடப்படுகிறது. எனவே, இந்த முறை சரிப்படாத ஒன்று. தேர்தல் செலவை அரசு ஏற்பதால், கறுப்புப்பண பிரச்னையும் தீராது' என, தலைமை தேர்தல் கமிஷனர் குரேஷி கூறியுள்ளார்.தேர்தல் சீர்திருத்தங்கள் தொடர்பாக வரக்கூடிய நாட்களில், அனைத்துக் கட்சி கூட்டம் ஒன்றை நடத்தவும் மத்திய சட்ட அமைச்சகம் திட்டமிட்டுள்ளது. அப்போது, இப்பிரச்னை குறித்து விவாதிக்கப்பட உள்ளது.

இந்நிலையில், ஊழல் ஒழிப்பு தொடர்பாக, மத்திய நிதியமைச்சர் பிரணாப் முகர்ஜி தலைமையில் அமைக்கப்பட்டுள்ள அமைச்சர்கள் குழு, "வேட்பாளர்களின் தேர்தல் செலவை அரசே ஏற்பது தொடர்பாக ஆக்கப்பூர்வமான யோசனைகளை தெரிவியுங்கள். மேலும், இதற்காக அரசியல் சட்ட திருத்தங்களை அல்லது வேறு சட்ட ரீதியான திருத்தங்களை மேற்கொள்ள வேண்டுமா என்பதையும், இதுதொடர்பான திட்ட யோசனைகள வகுக்கும்படியும்' மத்திய சட்ட அமைச்சகத்தை கேட்டுக் கொண்டுள்ளது. தினமலர்