கேலிக்கூத்தாகும் மாணவர்களின் ப்ராஜெக்ட்

மாணவர்களின் ஆராய்ச்சித் திறன்களை வளர்ப்பதற்காக திட்டமிடப்பட்ட ப்ராஜெக்ட் பணிகள், சடங்குகளாக மாறிவிட்டன.

கல்லூரி மற்றும் பல்கலைப் படிப்புகளில் செய்யப்படும் மாணவர்களின் ப்ராஜெக்ட் மற்றும் ஆராய்ச்சிப் பணிகள், பெரும்பாலும் பிறரின் பணிகளை காப்பியடிப்பதாக உள்ளன என்ற புகார்கள் சில வருடங்களாகவே அதிகளவில் வந்து கொண்டுள்ளன. மதிப்பெண்களைப் பெறுவதற்கான ஒரு கட்டாய செயல்முறையாகவே இதனை மாணவர்கள் கருதுகிறார்கள்.

இணையதளங்களிலிருந்து எடுப்பதும், ஒரே தலைப்பில் ஏற்கனவே வேறு சிலர் செய்ததை பின்பற்றுவதும், நண்பர்களின் ப்ராஜெக்ட் பணியை காப்பியடிப்பதும் இன்று பரவலாக நடைபெறும் விஷயங்களாகி விட்டன. இத்தகைய விஷயங்களை எளிதாக செய்யும் மாணவர்கள், இவற்றால் வரும் பின்விளைவுகளைப் பற்றி யோசிப்பதில்லை.

படிப்பிற்கு பிறகான காலகட்டத்தில், நல்ல வேலை வாய்ப்புகளைப் பெறுவதற்கான திறமையை வளர்க்கும் நோக்கத்தில் உருவாக்கப்பட்ட இந்த ப்ராஜெக்ட் பணிகள் திட்டமானது, தற்போது வெறும் சடங்காக மாறிவிட்டது. இணையதளங்களிலிருந்து விஷயங்களை இறக்குமதி செய்து, தனது சொந்த பணிபோல்(தேவையான காரண-காரியங்கள் இல்லாமலேயே) சமர்ப்பிக்கும் போக்கு மாணவர்களிடம் அதிகரித்து விட்டது. பரீட்சையில் காப்பியடிப்பதற்கும், இதற்கும் எந்த வித்தியாசமுமில்லை என்று கல்வியாளர்கள் இதனைக் கூறுகின்றனர்.

மேலும், ப்ராஜெக்ட் பணியின் முடிவில் இணைக்கப்பட வேண்டிய விவரக்குறிப்புகள்(Bibliography) விஷயத்தில், பல மாணவர்கள் அலட்சியமாகவே இருக்கிறார்கள்.

"இத்தகைய ப்ராஜெக்ட் பணிகள், பல படிப்புகளுக்கு மதிப்பெண் வாங்கும் அம்சமாக இருப்பதால், அந்த நோக்கத்திலேயே மாணவர்கள் செயல்படுகிறார்கள். ஆனால், இந்த ப்ராஜெக்ட் பணியை ஒரு விருப்ப அம்சமாக மாற்றிவிட்டால் விரும்பும் மாணவர்கள் மட்டுமே அதைத் தேர்ந்தெடுத்து செய்வார்கள்" என்று சில கல்வியாளர்கள் தெரிவிக்கின்றனர்.

ப்ராஜெக்ட் பணிகளுக்கான தலைப்புகளைத் தேர்ந்தெடுக்கையில், எளிதில் வெளியிலிருந்து காப்பியடிக்கும் வகையிலேயே மாணவர்கள் தங்களுக்கான தலைப்புகளைத் தேர்ந்தெடுக்கின்றனர். "10 ப்ராஜெக்ட் பணிகளை எடுத்துக் கொண்டால், அவற்றில் குறைந்தபட்சம் 7 பணிகளாவது, தொடர்பில்லாமலும், இணையதளங்களிலிருந்து திருடப்பட்டவையாகவும் இருக்கின்றன. கேம்பஸ் இண்டர்வியூவில் பங்கேற்க முடியாமல் போதல், ப்ராஜெக்ட் பணியை அரியர்ஸ் கணக்கில் சேர்த்து மீண்டும் செய்ய வேண்டியிருத்தல் உள்ளிட்ட பலவித தண்டனைகளுக்கு இதுபோன்ற தவறுகளை செய்யும் மாணவர்கள் ஆளாக நேரிடும்.

சில கல்லூரிகள், இத்தகைய ப்ராஜெக்ட் பணிகளை இன்டர்ன்ஷிப் தொடர்பானவையாக மாற்றுவதற்கு முனைந்துள்ளன. இதன்மூலம் அந்த இன்டர்ன்ஷிப்பில் தான் கற்றதை ஒரு மாணவர் தனது ப்ராஜெக்டில் வெளிப்படுத்த வேண்டியிருக்கும்.

மேலும், ஒரு மாணவரிடம் இளநிலை அளவில் அதிகமாக எதிர்பார்க்க முடியாது என்றும், அந்த நிலையில் ஒரு மாணவர் ஆராய்ச்சிக்காக தயார்படுத்தப்பட வேண்டும் என்றும் சில கல்வி நிலைய வட்டாரங்கள் தெரிவிக்கின்றன.

மேலும், இந்த ப்ராஜெக்ட் கலாச்சாரம் சீரழிய இன்னொரு முக்கிய காரணம் என்னவெனில், கல்லூரிகளுக்கு இடையே இருக்கும் ஒரு மறைமுக ஒப்பந்தம். அதாவது ஒரு ப்ராஜெக்ட் பணியை ஆய்வுசெய்ய வேறு கல்லூரியிலிருந்து ஒரு ஆய்வாளர் வருவது வழக்கம். அந்த வகையில் 2 கல்லூரிகளுக்கிடையே மாறி மாறி வெளி ஆய்வாளர்கள் செல்கையில், ஒருவர் ஒரு கல்லூரியில் தவறைக் கண்டுபிடித்து விட்டால், சிக்கிய கல்லூரியைச் சேர்ந்த ஒரு ஆய்வாளர், கண்டுபிடித்த கல்லூரிக்கு ஆய்வாளராக செல்கையில், பழிக்குப் பழி வாங்கிவிடுவார். இதனால்தான், கல்லூரிகள் தங்களுக்குள் பரஸ்பரம் ஒப்பந்தங்கள் ஏற்படுத்திக்கொண்டு, திருடப்படும் ப்ராஜெக்ட் பணிகளை கண்டுகொள்ளாமல் விட்டுவிடுகின்றன. இதனால் மாணவர்கள் தங்களின் தவறுகளை எந்தவித பயமுமின்றி தொடர்கின்றனர்.

எனவே, மாணவர்கள், ப்ராஜெக்ட் பணிகளை தங்களின் எதிர்கால வாழ்விற்கான திறன்களை மேம்படுத்துவதற்கான ஒரு வழிமுறையாகக் கருதி, சரியான முறையில், கடின முயற்சியெடுத்து, சுயமாக சிந்தித்து செய்ய வேண்டும். ப்ராஜெக்ட் கண்காணிப்பாளர்களும், தங்களது பணியின் புனிதம் கருதி முறையாக செயல்பட வேண்டும்.

நன்றி :தினமலர்