புரோக்கர்களின் பிடியில் கோயம்பேடு ஆம்னி பஸ் நிலையம்

கோயம்பேடு ஆம்னி பஸ் நிலையத்திற்கு வரும் பயணிகளை, புரோக்கர்கள் வழிமறித்து, இடையூறு ஏற்படுத்துகின்றனர். இதனால், பயணிகள் கடும் அவதிப்படுகின்றனர்.கோயம்பேடு ஆம்னி பஸ் நிலையத்தில் இருந்து, தமிழகம் மற்றும் கேரளா, கர்நாடகா உள்ளிட்ட அண்டை மாநிலங்களுக்கு, 600க்கும் மேற்பட்ட ஆம்னி பஸ்கள் இயக்கப்படுகின்றன. தினசரி, 50 ஆயிரத்திற்கும் மேற்பட்ட பயணிகள் வந்து செல்கின்றனர்.முன்பு, வார இறுதி நாட்களில் மட்டும் கூட்டம் அலைமோதும். தற்போது, அனைத்து நாட்களிலும், ஆம்னி பஸ்களில் பயணிக்கும் கூட்டம் அதிகரித்துக் கொண்டே செல்கிறது. பெரும்பாலானோர் டிக்கெட்களை, "ஆன்-லைன்' மூலம் பதிவு செய்து விடுகின்றனர். முன்பதிவு செய்யாமல், பஸ் நிலையத்திற்கு வருபவர்களை, இங்குள்ள புரோக்கர்கள் வழிமறித்து, அடாவடி செய்கின்றனர்.பயணிகளிடம், வழக்கமான பஸ் கட்டணத்தை விட, கூடுதல் கட்டணம் வசூலித்துக் கொண்டு, பஸ்களில் ஏற்றுகின்றனர். இதற்காக, சம்பந்தப்பட்ட பஸ் உரிமையாளர்களிடம், கமிஷன் பெற்றுக் கொள்கின்றனர். இதனால், பாதிக்கப்படுவது பயணிகள் தான்.உதாரணமாக, சென்னையில் இருந்து பெங்களூருக்கு, பஸ் உரிமையாளர்கள் நிர்ணயித்த கட்டணம், 600 ரூபாய் என்றால், புரோக்கர்கள் அதனை 700, 800 ரூபாய் என நிர்ணயிக்கின்றனர்.இதனால், பயணிகள், 100 முதல் 200 ரூபாய் வரை, கூடுதல் கட்டணம் செலுத்த வேண்டியுள்ளது. புரோக்கர்களை மீறி, பயணிகள் செல்ல முடியாது. அந்தளவிற்கு, புரோக்கர்கள் சுற்றி வளைத்துக் கொள்வர்.கிட்டத்தட்ட புரோக்கர்களின் பிடியில் தான், ஆம்னி பஸ்களே செயல்படுகின்றன என்று கூறுமளவிற்கு, அவர்களது எண்ணிக்கை அதிகம் உள்ளது. இதற்கு, லோக்கல் போலீசார் ஆசியும் உள்ளதாகக் கூறப்படுகிறது.இது குறித்து, ஆம்னி பஸ் உரிமையாளர் ஒருவர் கூறும்போது, "ஆம்னி பஸ்களில், கட்டணம் அதிகம் வசூலிக்கின்றனர் என்று புகார் கூறுகின்றனர். உண்மையில் பஸ்களில் கூடுதல் கட்டணம் வசூலிப்பது புரோக்கர்கள் தான். "இதனால், பெரும்பாலான பஸ் உரிமையாளர்கள், "ஆன்-லைன்' மூலம் டிக்கெட் முன்பதிவு முறையை அமல்படுத்தியுள்ளோம். ஆனால், தீபாவளி, பொங்கல் போன்ற பண்டிகை நாட்கள், விடுமுறை நாட்களில், புரோக்கர்கள் "ஆன்-லைன்' மூலம் டிக்கெட் பதிவு செய்து கொள்கின்றனர். "பின்னர் அவற்றை, பயணிகளிடம் கூடுதல் விலைக்கு விற்பனை செய்கின்றனர். ஆனால், கெட்ட பெயர் என்னவோ எங்களுக்குத் தான் வருகிறது' என்றார்.அனுமதிபெற்ற டிராவல்ஏஜன்சியினரை தவிர, நூற்றுக்கும் மேற்பட்ட புரோக்கர்கள் கோயம்பேடு ஆம்னி பஸ் நிலையத்தைச் சுற்றி வருகின்றனர். எவ்வித முதலீடும் இல்லாமல், நாளொன்றுக்கு 2,000 ரூபாய் வரை சம்பாதித்துச் செல்கின்றனர். புரோக்கர்களின் ஆதிக்கம் குறித்து, நடவடிக்கை எடுக்க வேண்டியது போலீசார் தான்."என்ன நடவடிக்கை எடுத்துள்ளீர்கள்' என, கோயம்பேடு போலீஸ் அதிகாரி ஒருவரிடம் கேட்டபோது, "ஆம்னி பஸ் நிலையத்தில், புரோக்கர்கள் சுற்றுவது உண்மை தான்.ஆனால், அவர்கள் மீது பயணிகள் யாரும் புகார் கூற முன்வருவதில்லை. பஸ் உரிமையாளர்கள், பாதிக்கப்பட்ட பயணிகள் யாராவது புகார் அளித்தால், கண்டிப்பாக புரோக்கர்கள் மீது நடவடிக்கை எடுக்கப்படும்' என்றார்.
நமது சிறப்பு நிருபர் தினமலர்