1500 விருந்தினர்கள் முன்னிலையில் பூடான் மன்னர் திருமணம் கோலாகலமாக நடந்தது

திம்பு, அக். 13-

பூடான் மன்னார் திருமணம் இன்று கோலாகலமாக நடந்தது. புத்தமத துறவிகள் இந்த திருமணத்தை நடத்தி வைத்தனர்.

இந்தியாவின் வடக்கு எல்லையில் அமைந்துள்ள குட்டி நாடான பூடான். இந்த நாட்டின் மன்னராக இருப்பவர் ஜிக்மே நாம்கியால் வாஞ்சுக் (வயது31). இவர் ஆக்ஸ்போர்டு பல்லைக்கழகத்தில் படித்தவர். இவர் மாணவர் பருவத்தில் இருக்கும் போது அறிமுகமான ஜெட்சன் பெமாவை காதலித்து வந்தார். விமானியின் மகளான பெமா இந்தியாவில் படித்தவர்.

இவர்கள் இருவரும் திருமணம் செய்து கொள்ள முடிவு செய்தனர். இதற்கு மன்னார் குடும்பத்தினர் ஒப்புக்கொண்டனர். இதையடுத்து திருமண ஏற்பாடுகள் தொடங்கின.

திம்பு நகரில் இருந்து 71 கி.மீ. தொலைவில் உள்ள சரித்திர நகரமான புனாகாவில் உள்ள 17-ம் நூற்றாண்டு கோட்டையில் திருமண ஏற்பாடுகள் நடந்து வந்தன. அந்த கோட்டை புதுப்பிக்கப்பட்டது.

இன்று அதிகாலை 4 மணிக்கு திருமண சடங்குகள் தொடங்கின. புத்தமத துறவிகள் 100 பேர் கலந்து கொண்டு வேதங்களை ஓதினார்கள். இந்த சடங்குகள் எல்லாம் முடிந்த உடன் மன்னரும், மணப்பெண்ணும் தனித்தனியே கோட்டைக்கு ஊர்வலமாக அழைத்து வரப்பட்டனர். இருவரும் பாரம்பரிய திருமண உடை அணிந்திருந்தனர்.

கோட்டையின் மைதானத்தில் பெண்கள், ஆண்கள், குழந்தைகள் என ஆயிரக்கணக்கானோர் திரண்டிருந்தனர். காலை 10 மணி அளவில் ஜிக்மே-பெமா திருமணம் கோலாகலமாக நடந்தது. புத்தமத தலைமை குரு ஜெ கென்போ இவர்களது திருமணத்தை நடத்தி வைத்தார்.

திருமணத்தில் 1500 விருந்தினர்கள் கலந்து கொண்டனர். இந்தியா சார்பில் பூடானுக்கான இந்திய தூதர் பவான் கே.வர்மா, மேற்கு வங்காள கவர்னர் எம்.கே.நாராயணன், மத்திய மந்திரி ஜோதிர் ஆதித்யா சிந்தியா ஆகியோர் கலந்து கொண்டனர். மாலைமலர்