வெடிகுண்டு கார் பற்றி 12 நாளுக்கு முன்பே தெரியும்: ஆர்.டி.எக்ஸ். பாகிஸ்தானில் இருந்து வந்தது

தீபாவளி சமயத்தில் டெல்லியை தகர்க்க லஷ்கர்-இ-தொய்பா, பப்பர் கல்சா தீவிரவாதிகள் செய்த முயற்சியை நேற்று போலீசார் முறியடித்தனர். 5 கிலோ ஆர்.டி.எக்ஸ் வெடிப் பொருட்கள், டெட்டனேட்டர்கள், டைமர்களுடன் வந்த மர்ம காரை அரியானா மாநிலத்தில் உள்ள அம்பாலா ரெயில் நிலையத்தில் கண்டு பிடித்து பறிமுதல் செய்தனர்.

டெல்லியில் கடந்த 2005ம் ஆண்டு தீபாவளிக்கு முந்தைய நாள் தீவிரவாதிகள் நடத்திய கார் குண்டு தாக்குதலில் 62 பேர் உயிரிழந்தனர். அதே போன்று இந்த ஆண்டும் நாசவேலை செய்ய பாகிஸ்தான் தீவிரவாதிகள் திட்டமிட்டதை கடந்த மாத இறுதியில் உளவுத்துறையினர் அறிந்தனர். அவர்களது தீவிர முயற்சியால் குறிப்பிட்ட எண் கொண்ட இண்டிகா காரில் ஆர்.டி.எக்சுடன் 2 தீவிரவாதிகள் வருவது உறுதிப்படுத்தப்பட்டது.

இது தொடர்பாக 12 நாட்ளுக்கு முன்பே டெல்லி போலீசாரை உளவுத்துறை உஷார்படுத்தியது. இதையடுத்து டெல்லி போலீசாரின் சிறப்புப்படை காஷ்மீரில் நோட்டமிட்டது. இந்த வாரத் தொடக்கத்தில் ஜம்முவில் அந்த இண்டிகா காரை டெல்லி போலீசார் பார்த்தனர்.

ஜம்முவில் இருந்து புறப்பட்ட அந்த கார், அரியானாவுக்குள் வந்தது. டெல்லி போலீசாரும், அந்த காரை ரகசியமாக பின் தொடர்ந்து வந்தனர். அம்பாலா நகரில் கடும் போக்குவரத்து நெரிசலில் சிக்கியதால் தீவிரவாதிகள் காரை போலீசார் தவற விட்டு விட்டனர்.

இந்த நிலையில் அந்த இண்டிகா கார் அம்பாலா ரெயில் நிலையத்தில் கேட்பாரற்று நின்றதை உள்ளூர் போலீசார் கண்டு பிடித்தனர். அவர்கள் காரை திறந்து பார்த்த போது காலி சுவீட் பாக்ஸ் மட்டுமே இருந்தது. மறைத்து வைக்கப்பட்டிருந்த ஆர்.டி.எக்சை அவர்களால் கண்டுபிடிக்க இயலவில்லை.

இதற்கிடையே இண்டிகா கார் அம்பாலா ரெயில் நிலையத்தில் சிக்கியதை அறிந்த தேசிய பாதுகாப்புப் படை போலீசார், அந்த காரை தங்கள் கட்டுப்பாட்டுக்குள் கொண்டு வந்து ஆய்வு செய்தனர். அப்போது டிரைவர் இருக்கை பகுதியில் உள்ள கார் கதவுக்குள் 5 டைமர் கருவிகள் பதுக்கி வைக்கப்பட்டுள்ளதை கண்டு பிடித்தனர். கார் தரை விரிப்புக்கு கீழ் ஆர்.டி.எக்ஸ் வெடிப் பொருட்கள் இருந்ததை வெடிகுண்டு நிபுணர்கள் கண்டுபிடித்து எடுத்தனர். அது போல டெட்டனேட்டர்களும் நூதனமான முறையில் காருக்குள் பதுக்கி வைக்கப்பட்டிருந்தன. டெல்லி கொண்டு செல்லப்பட்டுள்ள அந்த காரை உளவுத்துறையினரும் ஆய்வு செய்து வருகிறார்கள்.

மாலைமலர்