பிரபல வழக்கறிஞர் பிரசாந்த் பூஷனுக்கு அடி, உதை

ஜம்மு - காஷ்மீர் தொடர்பாக, பிரபல வழக்கறிஞர் பிரசாந்த் பூஷன் தெரிவித்த கருத்தால், கோபமடைந்த இரு வாலிபர்கள் அவரை அடித்து உதைத்தனர். சுப்ரீம் கோர்ட் வழக்கறிஞர்கள் சேம்பரிலேயே நேற்று மாலை இந்தச் சம்பவம் நடந்தது. தாக்கிய இளைஞர்கள் ஸ்ரீராம்சேனா அமைப்பைச் சேர்ந்தவர்கள் எனக் கூறப்படுகிறது.

ஊழல் ஒழிப்பு மற்றும் பலமான லோக்பால் மசோதாவை வலியுறுத்தி போராட்டம் நடத்தி வரும் சமூக சேவகர் அன்னா ஹசாரேயின் குழுவில் இடம் பெற்றுள்ளவர்களில் முக்கியமானவர் பிரசாந்த் பூஷன். பிரபலமான சுப்ரீம் கோர்ட் வழக்கறிஞர். இவர் நேற்று மாலை சுப்ரீம் கோர்ட்டிற்கு எதிரேயுள்ள, புதிதாக கட்டப்பட்ட வழக்கறிஞர்கள் சேம்பரில் உள்ள தன் அறையில் தொலைக்காட்சி சேனல் ஒன்றுக்கு பேட்டி அளித்துக் கொண்டிருந்தார். அப்போது, பிரசாந்த் பூஷனை சந்திக்க தாங்கள் அனுமதி வாங்கியிருப்பதாகக் கூறிக் கொண்டு, இரண்டு வாலிபர்கள் அவரது அலுவலகத்திற்குள் வேகமாக நுழைந்தனர். உள்ளே நுழைந்த இரண்டு பேரும் பிரசாந்த் பூஷனை சரமாரியாக தாக்கினர்; அடித்து, உதைத்தனர். அவரை நாற்காலியில் இருந்து கீழே இழுத்துப் போட்டு தாக்கியதோடு, நெஞ்சிலும் மிதித்தனர். இந்தத் தாக்குதலில், பூஷனின் சட்டை கிழிந்ததோடு, அவரின் மூக்குக் கண்ணாடியும் கீழே விழுந்து நொறுங்கியது.

இந்தத் திடீர் தாக்குதலை சற்றும் எதிர்பாராத, பூஷன் அலுவலக ஊழியர்களும், மற்றவர்களும் அங்கு கூடி, தாக்குதல் நடத்தியவர்களை பிடிக்க முற்பட்டனர். அதில், ஒரு வாலிபர் சிக்கினார்; மற்றொரு வாலிபர் தப்பி ஓடி விட்டார். பின்னர் பிடிபட்ட நபரை போலீசாரிடம் ஒப்படைத்தனர். தாக்குதலுக்கு ஆளான பிரசாந்த் பூஷனை, ராம் மனோகர் லோகியா மருத்துவமனையில் சேர்த்தனர். தாக்குதலுக்குப் பின் நிருபர்களிடம் பேசிய பிரசாந்த் பூஷன், ""ஜம்மு - காஷ்மீர் தொடர்பாக நான் தெரிவித்த கருத்துக்கு எதிர்ப்பு தெரிவித்தே இரண்டு வாலிபர்களும் என்னை தாக்கியுள்ளனர். குறிப்பாக, காஷ்மீரில் கருத்துக் கணிப்பு நடத்த வேண்டும் என நான் தெரிவித்த கருத்துக்கு ஆட்சேபம் தெரிவித்தே, தாக்குதல் நடத்தியுள்ளனர்,'' என்றார். தாக்குதல் சம்பவம் தொடர்பாக வழக்கு பதிவு செய்யப்பட்டு, ஒருவர் கைது செய்யப்பட்டுள்ளார்.

பிரசாந்த் பூஷன் தாக்கப்பட்டதற்கு, மத்திய உள்துறை அமைச்சர் சிதம்பரம் கடும் கண்டனம் தெரிவித்துள்ளார். சம்பவம் பற்றி தகவல் அறிந்ததும், டில்லி போலீஸ் கமிஷனர் பி.கே.குப்தாவை தொடர்பு கொண்டு பேசிய அவர், போலீஸ் அதிகாரிகளை அனுப்பி, பிரசாந்த் பூஷன் நிலை பற்றி அறிந்து வரும்படி உத்தரவிட்டார். தாக்குதல் தொடர்பாக ஒருவர் கைது செய்யப்பட்டுள்ளதாகவும், தப்பி ஓடிய மற்றொரு நபரை போலீசார் தேடி வருவதாகவும் கூறினார்.