மூன்று வேளை சாப்பாடு, ரூ.200 கூலி தொழிலாளர்கள் கிடைக்காமல் விவசாய பணிகள் பாதிப்பு

கோவை : மூன்று வேளை சாப்பாட்டுடன் தினமும் ரூ.200 கூலி கிடைப்பதால் தொழிலாளர்கள் விவசாய பணிகளை புறக்கணித்து விட்டு தேர்தல் பிரசாரத்துக்கு செல்கின்றனர். இதனால் விவசாய பணிகள் பாதிப்படைந்துள்ளன. உள்ளாட்சி தேர்தல் 17, 19 ஆகிய தேதிகளில் நடக்கிறது. இதற்கான தேர்தல் பிரசாரம் விறுவிறுப்படைந்துள்ளது. நகர்ப்புற உள்ளாட்சி அமைப்புகளில் கவுன்சிலர் பதவிகளுக்கு போட்டியிடுவோர் வாக்காளர்களை நேரடியாக சந்தித்து ஓட்டு சேகரித்து வருகின்றனர்.

கிராமப்புறங்களிலும் பிரசாரம் சூடு பிடித்துள்ளது. கிராம பஞ்சாயத்துகளில் வார்டு உறுப்பினர், பஞ்சாயத்து தலைவர், ஒன்றியக்குழு, மாவட்ட பஞ்சாயத்து உறுப்பினர் என 4 பதவிகளுக்கு ஓட்டு போட வேண்டும். இதனால் போட்டியிடுவோர் தனித்தனியே பிரசாரத்தில் ஈடுபட்டு வருகின்றனர். சிற்றூராட்சி வார்டு உறுப்பினர் மற்றும் பஞ்சாயத்து தலைவருக்கு சுயேச்சை சின்னங்கள், ஒன்றியக்குழு மற்றும் மாவட்ட பஞ்சாயத்து உறுப்பினர் பதவிகளுக்கு கட்சி சின்னங்களும் ஒதுக்கப்பட்டுள்ளது.

வழக்கமாக கிராமப்புறங்களில் தேர்தலுக்கு முன்பாக மூன்று அல்லது நான்கு சுற்றுகள் சென்று வாக்காளர்களை சந்திக்கும் நிலை இருந்தது. ஆனால் இப்போது ஒருமுறை கூட முழுமையாக எல்லா வாக்காளர்களையும் சந்திக்கமுடியவில்லை என்கின்றனர் வேட்பாளர்கள். குறிப்பாக விவசாய கூலி தொழிலாளர் குடும்பங்கள் அதிகமாக வசிக்கும் பகுதிகளில் இந்த பிரச்னை அதிகமாக உள்ளது. தற்போது தேர்தல் பிரசாரத்திற்கு பெருமளவில் கூலி தொழிலாளர்களையே வேட்பாளர்கள் அதிகமாக பயன்படுத்தி வருகின்றனர். பிரசாரத்திற்கு வந்தால் ஒரு நாள் கூலியாக க்ஷீ 150 முதல் ரூ. 200 வரையிலும், மூன்று வேளை உணவும் ஏற்பாடு செய்து கொடுக்கின்றனர்.

கிராமப்புற வேலை உறுதியளிப்பு திட்டத்தில் வழங்கப்படும் சம்பளத்தை காட்டிலும் கூடுதலாக வழங்கப்படுவதால் தொழிலாளர்கள் காலை நேரத்திலேயே வேட்பாளர்களை தேடி செல்கின்றனர். ஈரோடு, திருப்பூர் மாவட்டங்களில் விவசாய தொழிலாளர்கள் பலரும் தற்போது வேட்பாளர்களுடன் தீவிர ஓட்டு வேட்டையில் ஈடுபட்டு வருகின்றனர். இதனால் விவசாய தொழிலுக்கும் கூலி தொழிலாளர்கள் கிடைப்பதில்லை என்கின்றனர் நிலக்கிழார்கள்.

தினகரன்

காற்றுள்ள போதே தூற்றிக்கொள்