எம்.பி.பி.எஸ். புதிய தேர்வு மதிப்பெண் முறைக்கு இடைக்காலத் தடை

மதுரை, அக்.10: எம்.பி.பி.எஸ். முதலாம் ஆண்டு மாணவர்களுக்கு தமிழ்நாடு டாக்டர் எம்.ஜி.ஆர். மருத்துவ பல்கலைக்கழகம் அறிமுகப்படுத்திய புதிய தேர்வு மதிப்பெண் முறைக்கு உயர் நீதிமன்ற மதுரைக் கிளை திங்கள்கிழமை இடைக்காலத் தடை விதித்துள்ளது.

மேலும், முதலாமாண்டு மாணவர்களை இரண்டாமாண்டில் அனுமதிக்குமாறும் நீதிமன்றம் உத்தரவிட்டுள்ளது.

இது தொடர்பாக, அரசு மற்றும் தனியார் மருத்துவக் கல்லூரிகளில் இரண்டு மாதங்களுக்கு முன்பு எம்.பி.பி.எஸ். முதலாமாண்டு தேர்வு எழுதி தேர்ச்சியடையாத பூர்ணசெüந்தரி உள்ளிட்ட 23 மாணவர்கள் நீதிமன்றத்தில் தாக்கல் செய்துள்ள மனுக்கள் விவரம்:-

தமிழ்நாடு டாக்டர் எம்.ஜி.ஆர். மருத்துவ பல்கலைக்கழகத்தின் 39-வது கல்வி மன்றக் கூட்டத்தில் எம்.பி.பி.எஸ். தேர்வு மதிப்பெண் கணக்கீட்டு முறையில் சில மாற்றங்களைக் கொண்டுவர முடிவு செய்யப்பட்டுள்ளது. உடற்கூறியல் ("அனாடமி'), உடல் இயங்கியல் ("ஃபிஸியாலஜி'), உயிர் வேதியியல் ("பயோகெமிஸ்ட்ரி') ஆகிய பாடங்களில் தலா இரண்டு தாள்களுக்கான தேர்வு நடைபெறும். அதில் ஒவ்வொன்றிலும் குறைந்தபட்சம் 50 சதவிகிதம் மதிப்பெண் பெற வேண்டும். இவ்வாறு மொத்தம் 100 மதிப்பெண் பெற்றால்தான் முதலாமாண்டு மாணவர், இரண்டாமாண்டில் சேரத் தகுதி பெறுவார்.

ஏதாவது ஒரு தாளில் குறைந்த மதிப்பெண்ணும், மற்றொன்றில் கூடுதல் மதிப்பெண்ணும் பெற்று இரண்டையும் சேர்த்து மொத்தம் 100 மதிப்பெண் பெற்றிருந்தாலும் தேர்ச்சி பெற்றதாக அறிவிக்க இயலாது என 14.1.2011-ல் பல்கலைக்கழக துணைவேந்தர் அறிவிப்பு வெளியிட்டார்.

""நான் உடல் இயங்கியல் ("ஃபிஸியாலஜி') பாடத்தில் முதல் தாளில் 59 மதிப்பெண்ணும், இரண்டாம் தாளில் 42 மதிப்பெண்ணும் பெற்றுள்ளேன். மொத்தம் 101 மதிப்பெண் பெற்றிருந்தும் நான் தேர்ச்சி பெறவில்லை எனக் கூறி, இரண்டு பாடத்தையும் மீண்டும் எழுத வேண்டும் என பல்கலைக்கழகம் அறிவித்துள்ளது சரியல்ல. இதேபோன்று ஏராளமான மாணவ, மாணவியர் பாதிக்கப்பட்டுள்ளனர்'' என்று பூர்ணசௌந்தரி தனது மனுவில் கூறியுள்ளார்.

கடந்த 1997-ல் இந்திய மருத்துவக் கவுன்சில், ஒரு மதிப்பெண் கணக்கீட்டு முறையை அறிவித்தது. அதை எதிர்த்து உயர் நீதிமன்றத்தில் தொடரப்பட்ட வழக்கில், இரண்டு தாள்களிலும் சேர்த்து ஒரு மாணவர் மொத்தம் 100 மதிப்பெண் பெற்றிருந்தாலே அவரை தேர்ச்சிபெற்றவராக அறிவிக்குமாறு நீதிமன்றம் உத்தரவிட்டுள்ளது.

எம்.ஜி.ஆர். மருத்துவப் பல்கலைக்கழகத்தின் தற்போதைய அறிவிப்பு அந்த நீதிமன்ற உத்தரவுக்கு முரணானது ஆகும். எனவே, இதற்குத் தடை விதித்து, புதிய தேர்வு மதிப்பீட்டு முறையை ரத்து செய்யவேண்டும். எம்.பி.பி.எஸ். இரண்டாம் ஆண்டில் மாணவர்களை அனுமதிக்க உத்தரவிடவேண்டும்'' என மாணவர்கள் மனுவில் குறிப்பிட்டிருந்தனர்.

மனுவை விசாரித்த நீதிபதி டி.ராஜா, எம்.ஜி.ஆர். மருத்துவப் பல்கலை.யின் புதிய தேர்வு மதிப்பெண் கணக்கீட்டு முறைக்கு இடைக்காலத் தடை விதித்தார்.

மேலும் மாணவர்களை இரண்டாமாண்டு வகுப்பில் அனுமதிக்க உத்தரவிட்டார். பல்கலைக்கழகப் பதிவாளர், தேர்வு கட்டுப்பாட்டு அதிகாரி, மருத்துவக் கல்வி இயக்குநர், இந்திய மருத்துவக் கவுன்சில் தலைவர் ஆகியோர் ஒரு வாரத்திற்குள் பதிலளிக்குமாறு நோட்டீஸ் அனுப்பவும் உத்தரவிட்டார்.

சென்னை உயர் நீதிமன்றத்திலும்...மதிப்பெண் முறையை எதிர்த்து எம்.பி.பி.எஸ். முதலாம் ஆண்டு தேர்வில் தேர்ச்சி பெறாத பல மாணவர்கள் சென்னை உயர் நீதிமன்றத்தில் ஏற்கெனவே வழக்கு தொடர்ந்துள்ளனர்.

இந்த வழக்கில் தமிழ்நாடு டாக்டர் எம்.ஜி.ஆர். பல்கலைக்கழகத்துக்கு சென்னை உயர் நீதிமன்றம் நோட்டீஸ் அனுப்ப உத்தரவிட்டுள்ளது. இந்த வழக்கு சென்னை உயர் நீதிமன்றத்தில் வரும் 14-ம் தேதி மீண்டும் விசாரணைக்கு வருகிறது.
தினமணி