"அன்புடை நெஞ்சம்"-அம்மாவின் பாஸ் புக்கில்...

by **rameshnaga** Sun Oct 09, 2011 4:30 pm

இந்தத் தீபாவளி கொஞ்சம் ஸ்பெஷல்...
எனக்கும் என் மனைவிக்கும்.

அம்மாவை-
நான் முதியோர் இல்லத்திலிருந்து
மூன்று நாட்களுக்கு மட்டும்
அழைத்து வரப் போகிறேன்.

குழந்தைகளிடம்-
பாட்டி...வெளியூரிலிருந்து வரப் போவதாய்
சொல்லி வைத்திருக்கிறேன்.

அவர்கள்-என்னைத்
தப்பாய் நினைத்துவிடக் கூடாதுதானே.
தவிரவும்-
நான் எப்போதோ படித்த
அப்பாவிற்காக பையன் பாதுகாத்து வைக்கச் சொன்ன
"செருப்பு மூலைத் தட்டு" கதை
என்னை அவ்வப்போது உறுத்திக் கொண்டே இருந்தது.

அம்மா-
என்னை வளர்த்த நாட்களிலெல்லாம்-
கால் தேய கறிகாய் விற்றும்...
கை ரேகைகள் அழியப் பாத்திரம் தேய்த்தும்..
ஒரு அலுவலகத்தில்..பெருக்கியும்..கூட்டியும்..
வளர்த்த நாட்களிலும் வந்த தீபாவளியை....
அசுரனைக் கடவுள் அழித்த நாள் என்பார்.

பாவம்! கடவுளுக்கு இப்போது அசுரர்களைக்
கொல்ல முடியாமல் போயிருக்கலாம்.
அவருக்கும் வயதாகிக் கொண்டே போகிறதுதானே.
தவிரவும்...இப்போதெல்லாம் தினம் தினம்
புதுப் புது வடிவத்தில் அசுரர்கள்.
எத்தனை பேரைத்தான்..எத்தனை விதத்தில் கொல்ல
கடவுளாலும் முடியும்?

இந்த முறை...தீபாவளிக்கு..
என் சம்பளத்தை அப்படியே அவள் கையில்
கொடுத்த போது...
அவள்தான் "விழித்துக் கொண்டு கேட்டது"...
அம்மாவின் கணக்கில் தீபாவளி மாத வரவு எப்படியும்
போனஸ்.,பஞ்சப்படி எல்லாம் சேர்ந்து
ஒரு பத்தாயிரம் வருமென.

அன்று இரவில்தான்..
அவளுக்கு மாமியார் மேலும் எனக்கு என் அம்மா மேலும்
பாசம் பீறிட்டு வந்ததே.
அவளும் நானும் "அன்புடை நெஞ்சமாய்"
அம்மாவின் பென்ஷன் பாஸ் புக்கை புரட்டிப் புரட்டிப் பார்த்தது.

பாவம்தான்! கடவுள்!
அவரும் இத்தனை அசுரர்களை எப்படி...
அவர் காலத்திற்குள்...அழித்து முடிப்பார்?

by kitcha Sun Oct 09, 2011 4:39 pm

கவிதை கொஞ்சம் மன வலியைக் கொடுக்கிறது.இப்ப உள்ள ஆண்கள் இந்த நிலைக்குத் தான் மாறி வருகிறார்கள்.
நன்றி கெட்ட உலகமடா என்று தான் எண்ணத் தோன்றுகிறது.
பணம் இருந்தால் தான் பாசம் இருக்கும் -

by **rameshnaga** Sun Oct 09, 2011 4:42 pm

ரொம்பவும் நன்றி! கிச்சா.

by **கோவிந்தராஜ்** Sun Oct 09, 2011 4:44 pm

"அன்புள்ள அம்மாவின் வங்கிப்புத்தகம்
ஆசை மனைவியின் சிந்தனையில்"
அவஸ்த்தை படும் கணவன் .
அருமை !!!

by **rameshnaga** Sun Oct 09, 2011 4:47 pm

ரொம்பவும் நன்றி! கோவிந்தராஜ்.

by **பிளேடு பக்கிரி** Sun Oct 09, 2011 5:01 pm

நாம் உலகம் இப்படி தான் மாறி கொண்டிருக்கிறது...
நல்ல சிந்தனையுள்ள கவிதை அருமையிருக்கு

by சதாசிவம் Sun Oct 09, 2011 5:04 pm

நல்ல கவிதை,

ஆனால் இந்த மருமகளுக்கும் இந்த நிலை வரும், பெரும்பாலான பெண்கள் எப்போதும் மிகக் குறுகிய வட்டத்தில் தான் சிந்திக்கின்றனர்.
"பாவம் ஒரு பக்கம் பழி ஒரு பக்கம்", எல்லாக் கதைகளும் ஆண்களை மட்டுமே குறை சொல்கிறது.

எல்லா அம்மாக்களும் நல்லவர் தான் தங்கள் பிள்ளைகளுக்கு, ஆனால் தங்கள் மாமியாருக்கு ......"தீதும் நன்றும் பிறன் தர வாரா"